Փաստ ինֆո

Անշնորհակալ գործ է կանխատեսել, թե ադրբեջանական գործողությունները կարող են հանգեցնել լայնածավալ գործողությունների, թե ոչ։ Լրագրողների հետ զրույցում այս մասին հայտարարեց ՀՀ ԱԺ նախագահ Ալեն Սիմոնյանը՝ անդրադառնալով ադրբեջանական ԶՈւ սադրիչ գործողություններին՝ սահմանագոտու տարբեր հատվածներում։

Սիմոնյանը հայտարարեց, որ հայկական կողմն, ամեն դեպքում, պետք է մշտապես պատրաստ լինի ամեն րոպե հնարավոր հարձակման պարագայում։
«Մենք այդ տրամաբանությամբ ենք աշխատում։ Բանակին ուղղված գործողություններն ու բարեփոխումները հենց այդ տրամաբանությամբ են առաջ գնում։ Դրանք (ադրբեջանական սադրանքները- խմբ.) մշտապես եղել են»,- ասաց նա։

Ալեն Սիմոնյանն, այդուհանդերձ, լավատես է վաղը՝ հունիսի 27-ին, Վաշինգտոնում ապասվող Միրզոյան- Բայրամով հանդիպման արդյունքների հարցում։ Իր խոսքով՝ բանակցություններն ընթանում ե բավականին ինտենսիվ ռեժիմով։ Երկու կողմից էլ, ըստ նրա, արդյունք են տալիս թե՛ առաջարկները, թե՛ քննարկումները։

«Այդ փոփոխությունները մի տեղ մենք ենք համաձայնում ձևակերպումների հետ, մի տեղ՝ ադրբեջանական կողմն է համաձայնում ձևակերպումների հետ։ Այնուամենայնիվ, լիահույս եմ ու այս պահի դրությամբ տեսնում եմ, որ առաջընթաց կա»,- ասաց նա։
Սիմոնյան անդրադարձավ նաև լրագրողի հարցադրմանը՝ արդյո՞ք խաղաղության պայմանագրի քննարկման համատեքստում հակասական տպավորություն չի ստեղծվում Ալիևի ռազմատենչ հայտարարությունների ֆոնին։ Հայտարարեց, որ այդ տպավորությունը նոր չէ, որ ստեղծվում է։

«Մեկ ասում է միջանցք, հետո ասում է՝ ես որ ասում եմ միջանցք՝ ես ամեն ինչին եմ տենց միջանցք ասում։ Պետք է քաղաքական գիտելիքներ ունենալ, որ հասկանալ, որ ես դա նկատի չունեմ, բայց ես դա ի նկատի... մի խոսքով՝ իրեն մեկնաբանելը մի քիչ դժվար է»,- ասաց նա։

Սիմոնյանն այս համատեքստում հայտարարեց, որ սրանից բացի այլ ռեալ ճանապարհ նույնպես առկա չէ։ Իսկ ադրբեջանական կողմից պատերազմի ու հարձակման պատրաստվելու պարագայում հայկական կողմը պատրաստվում է պաշտպանվել։ Այդուհանդերձ, Սիմոնյանը հայտարարեց, որ իրենք (ՀՀ իշխանությունները- խմբ.) պատրաստվում են խաղաղության։

Աղբյուր` Փաստինֆո