Փաստ ինֆո

Ադրբեջանն այն երկիրը չէ, որը կարող է հարգել միջազգային իրավունքը, գերտերությունների կարծիքը ու բացել միջանցքը։ Նա հասկանում է միայն ուժի լեզուն։ «Փաստինֆո»-ի եթերում նշել է միջազգայնագետ Գրիգոր Բալասանյանը։

Արդեն 10 օր է, ինչ Արցախ ընդհանրապես չի մտնում ոչ սնունդ, ոչ դեղորայք, սակայն արտաքին աշխարհն անհաղորդ է, սահմանափակվում են միայն հայտարարություններով։ Գ. Բալասանյանի գնահատմամբ՝ առաջինը մենք պետք է քայլեր ձեռնարկենք, որովհետեւ մեր քույրերն ու եղբայրները, ՀՀ քաղաքացիներն են գտնվում շրջափակման մեջ։

«Ադրբեջանն այն երկիրը չէ, որը կհարգի միջազգային իրավունքը, գերտերությունների կարծիքը և կբացի միջանցքը: Ադրբեջանը հարգում է, երբ իրեն ուժ ես ցույց տալիս, իսկ երբ տեսնում է, որ կարողանում է ստանալ՝ անընդհատ նոր պահանջներ է ներկայացնում»,- նշել է փորձագետը՝ ավելացնելով, որ հիմա Ադրբեջանը, կարծես թե, գնում է այդ ճանապարհով: «Ադրբեջանի ԱԳ նախարարը հայտարարում է, որ իրենք անհրաժեշտություն չեն տեսնում լրացուցիչ անվտանգային երաշխիքներ տալ արցախահայությանը, ինչպես Երևանն է պահանջում, քանի որ արցախահայության խնդիրը իրենք համարում են Ադրբեջանի ներքին գործ»,- նշել է միջազգայնագետը:

Նման պայմաններում, Գ.Բալասանյանի դիտարկմամբ, Երևանը որպես արցախահայության անվտանգության երաշխավոր, պետք է սկսի քայլեր ձեռնարկել միաժամանակ մի քանի ուղղություններով։ Նախ՝ թակելով միջազգային հանրության դռները պետք է փորձի միջազգային իրավունքի շրջանակներում լուծել հարցը, ապա նաեւ գտնի այլ տարբերակներ՝ Արցախն առաջին անհրաժեշտության ապրանքներով ապահովելու համար։ Դրանց թվում բանախոսը նշել է նաեւ օդային ճանապարհը։

Բացի այդ՝ Արցախի իշխանությունները եւս պետք է Ադրբեջանի համար անհարմարություններ ստեղծելու ուղղությամբ քայլեր ձեռնարկեն: «Գաղտնիք չէ, որ ադրբեջանցիները Շուշիում գտնվող իրենց զորամասերը կամ Արցախում տեղակայված այլ մատակարարումներն իրականացնում են Կարմիր շուկայի միջոցով: Զարմանալի է, որ մինչ օրս Կարմիր շուկայի հատվածը շրջափակված չէ Արցախի կողմից: Զարմանալի է, որ միչ օրս ադրբեջանցիները կարողանում են ազատ ելումուտ ունենալ Շուշի: Արցախի իշխանությունները ներսից պետք է շջափակեն ադրբեջանական հենակետերը և զորամիավորումները՝ ստիպելով Բաքվին գնալ զիջումների, որովհետև այլ տարբերակ ադրբեջանցիները չեն հասկանում: Ադրբեջանցին սկսում է հարգել այն ժամանակ, երբ վախենում է: 30 տարի հարգել է, 30 տարի վախեցել է, քանի որ իմացել է, որ ցանկացած գործողություն հակազդեցության է հանդիպելու»,- ընդգծել է միջազգայնագետը։

Մանրամասները՝ տեսանյութում։

Աղբյուր` Փաստինֆո