Փաստ ինֆո

Երևանի ընդհանուր իրավասության դատարանի դատավոր Դավիթ Հարությունյանին կարգապահական պատասխանատվության ենթարկելու վերաբերյալ միջնորդության քննության ընթացքում համակարգիչը խափանվել է, դատավորի ներկայացուցիչները մտահոգված են՝ հնարավոր է նիստի արձանագրությունը պահպանված չլինի, թեև հարցադրումները, փաստաբանների պնդմամբ՝ էական նշանակության են։

Ինչպես արդեն տեղեկացրել ենք՝ ԲԴԽ-ում այսօր կայացած նիստի ընթացքում դատավոր Դավիթ Հարությունյանի ներկայացուցիչները բացարկի միջնորդություններ են ներկայացրել, որոնք մերժվել են։ Ընդ որում, փաստաբան Միհրան Պողոսյանի դիտարկմամբ՝ առանց պատճառաբանության։

Բացարկի միջնորդությունները մերժելուց հետո Խորհուրդն անցել է ԱՆ միջնորդության բուն քննությանը, որի ընթացքում, ինչպես լրագրողների հետ զրույցում տեղեկացրեց փաստաբան Միհրան Պողոսյանը, տեխնիկական խափանում է եղել։

«Շատ զավեշտալի բան տեղի ունեցավ, երբ հարցեր էինք տալիս, մեկ էլ՝ ԲԴԽ-ում համակարգիչը խափանվեց, ինչը մեզ համար ընդհանրապես անպատկերացնելի իրավիճակ էր։ Այսինքն՝ այս պահին տեղեկատվություն չկա՝ մինչ այդ տեղի ունեցած հարցուպատասխանը պահպանվել է, թե՝ ոչ։ Շատ կարևոր հարցադրումների հետ կապված հանգամանքներ կան, որոնք կարող է, որ ուղղակի գործում չլինեն, այսինքն, մենք ունկնդրել ենք այդ հարցերի պատասխանները, սակայն դատական նիստի արձանագրությունում կարող է և չլինել։ Դա երկուշաբթի պարզ կլինի։ Օրինակ՝ քրեական դատավարությունում դատական նիստի արձանագրության բացակայությունը դատական ակտը վերանայելու հիմք է, այսինքն՝ օրինական դատական ակտ համարվել չի կարող»,- լրագրողների հետ զրույցում ասաց փաստաբանը։

Նշենք, որ դատական նիստը հետաձգվել է մինչև երկուշաբթի օրը՝ հունիսի 26-ը, թեև փաստաբանական համայնքն այդ օրը գործադուլ է իրականացնելու, ինչի մասին դատավորը հայտնել է Խորհրդին, սակայն ԲԴԽ-ն հայտնել է, որ նիստի օրը նախապես հարմարեցրել է։

Նիստի ավարտից հետո ԲԴԽ անդամներից Վիգեն Քոչարյանը, որին դատավորի ներկայացուցիչները ևս միջնորդել էին ինքնաբացարկ հայտնել եւ մերժվել էր, թեև միջնորդության հիմքն այն էր, որ փաստաբաններից Հովհաննես Խուդոյանը նրա դեմ հանցագործության մասին հաղորդում է ներկայացրել, լրագրողների հետ զրույցում հրաժարվեց պատասխանել՝ արդյո՞ք կանխակալ վերաբերմունք չունի փաստաբանի նկատմամբ։ Ինչ վերաբերում է դատավոր Դավիթ Հարությունյանի գործով ցուցաբերվող շտապողականությանը, Խորհրդի գիտնական անդամը դա պայմանավորեց Խորհրդում քննվող այլ գործերով ծանրաբեռվածությամբ։

Հիշեցնենք, որ դատավորի նկատմամբ վարույթը հարուցվել է հարցազրույցի համար։ Խոսքը գնում է, մասնավորապես, ապրիլի 7-ին հրավիրված Դատավորների ընդհանուր ժողովի օրը լրագրողների հետ ունեցած ճեպազրույցի մասին։ Տվյալ օրն ընդհանուր ժողովի օրակարգում ԲԴԽ դատավոր-անդամի ընտրության հարցն էր։ Դրա նախօրեին ԲԴԽ նախագահ Կարեն Անդրեասյանը՝ մամուլի քարտուղարի անունից հաղորդագրություն էր տարածել, որով, ըստ էության, փորձել էր ուղղորդել դատավորներին ընտրությունից առաջ։ Դատավորներն, այդուհանդերձ, ԲԴԽ դատավոր անդամ չեն ընտրել Կարեն Անդրեասյանի թեկնածուին՝ Ռուբիկ Մխիթարյանին՝ իրենց քվեն տալով դատավոր Արշակ Վարդանյանին, որն ունի անկախ դատավորի համբավ։ Դավիթ Հարությունյանն անթույլատրելի էր համարել ԲԴԽ-ի հայտարարությունը՝ նշելով, որ որևէ մեկն իրավունք չունի նման արտահայտություն թույլ տալ՝ որևէ թեկնածուի հասցեին, նման հայտարարության հեղինակը բարեվարքության խնդիր ունի։ Անդրադառնալով հարցին՝ արդյո՞ք կա ուղղորդում իշխանությունների կողմից, Հարությունյանը նշել էր. «Անկախ նրանից՝ ուղղորդումն ում կողմից է, եթե կանգնում ասում են՝ բացարձակ կոնսենսուս կա, այդպես չի կարող լինել։ Եթե բացարձակ կոնսենսուս է, ուրմեն ինչ-որ մեկի կողմից ուղղորդվում է»։ Նա նաև նշել էր, որ 20-ից ավելի դատավորի լիազորություն տարբեր եղանակով անօրինական կերպով դադարեցվել են։

Հեղինակ՝ Իզաբել Սահակյան

Աղբյուր` Փաստինֆո