Փաստ ինֆո

Հայաստանի հետ խաղաղության բանակցությունների ավարտը այսօր պետք է նաև մեզ, բայց առաջին հերթին դա պետք է Հայաստանին։ Այս մասին հայտարարել է Ադրբեջանի նախագահ Իլհամ Ալիևը։

«Այս խաղաղության պայմանագիրը պետք է ստորագրվի միջազգային իրավունքի նորմերի և սկզբունքների հիման վրա։ Այս խաղաղ համաձայնագիրը պետք է հաշվի առնի հետպատերազմյան իրողությունները»,- ընդգծել է Ալիևը։

Ինչ վերաբերում է Փաշինյանի հայտարարություններին, Ալիևը նշել է, որ Հայաստանը պաշտոնապես ճանաչել է Ադրբեջանի տարածքային ամբողջականությունը, և դա պետք է ամրագրվի թղթի վրա։

«Միայն այս դեպքում կարող է երկարաժամկետ խաղաղություն տիրել Հարավային Կովկասում»,- ասել է Ադրբեջանի նախագահը։

Ալիևը կրկին խոսել է իր իսկ հորինած տերմինով «Զանգեզուրի միջանցքի» ու Արցախից հայկական ԶՈՒ-ի դուրսբերման մասին՝ դրանք ներկայացնելով իբր որպես խաղաղության նախապայման։

Իրեն բնորոշ ագրեսիվ հռետորաբանությամբ՝ այդ երկրի ղեկավարը հոխորտացել է. «Իրենց մեսիջ ենք ուղարկել, որ եթե իրենց լավ չպահեն, չհարգեն իրենց ստորագրությունը, ապա իրենց համար վիճակը ողբալի կլինի»։

Հետն էլ «մեծահոգի» Ալիևը հավելել է, թե իրենք դեռևս զուսպ ենք պահում իրենց. «Մենք երբեք չենք շտապել, դրա կարիքը չկա։ Համաշխարհային հանրությունն արդեն միանշանակ ճանաչում է Ղարաբաղը որպես Ադրբեջանի անբաժանելի մաս։ Մենք կարող ենք սպասել: Նորից եմ ասում՝ մենք չենք շտապում»։

Աղբյուր` Փաստինֆո