Փաստ ինֆո

«Եթե Ալիևը վստահ չլիներ, որ Լաչինի միջանցքն իր վերահսկողության տակ է գտնվում, ադրբեջանական կողմն այնտեղ անցակետ չէր տեղադրի, իսկ այդ միջանցքն ադրբեջանական կողմի վերահսկողության տակ է անցել դեռևս 2022 թ. հոկտեմբերի 6-ին՝ Պրահայում կայացած քառակողմ հանդիպման ընթացքում՝ Նիկոլ Փաշինյանի անմիջական և Արևմտյան շրջանակների գլոբալ համաձայնության պայամններում։ Հետևաբար, Ադրբեջանի նախագահ Ալիևի ցանկացած հայտարարություն, հնչի դա լկտի, թե ցինիկ, ունի իր հավաստի հիմքերը։ Իսկ, եթե Հայաստանում դեռևս կան մարդիկ, ովքեր կասկածում են, որ Լաչինի միջանցքը Արբեջանին հանձնողը Նիկոլ Փաշինյանն է, ապա այդ մարդիկ կամ հասարակությունը օբեկտիվերեն արժանի են ապագա չունենալու»,- «Փաստինֆո» լրատվականի հետ զրույցում ասում է քաղաքագետ Երվանդ Բոզոյանը, մեկնաբանելով այսօր Ադրբեջանի նախագահ Իլհամ Ալիևի հնչեցրած հերթական հայտարարությունը։

Հիշեցնենք, որ այսօր Ադրբեջանի ղեկավար Իլհամ Ալիևը Լաչինում՝ Հայաստանի հետ սահմանին անցակետ տեղակայելու որոշումը բնորոշել է որպես իրենց «ուժեղ քաղաքական կամքի ցուցիչ». «Մենք պահանջում ենք, որ ոչ ոք չխառնվի մեր ներքին գործերին։ Մենք պահանջում ենք, որ բոլոր երկրները հարգեն մեր տարածքային ամբողջականությունը ոչ թե խոսքով, այլ գործով, այնուհետև մենք կհարգենք նաև նրանց տարածքային ամբողջականությունը»,- ասել է Ադրբեջանի նախագահը։

Քաղաքագետ Երվանդ Բոզոյանը նկատում է՝ բոլոր այն կողմերը, որոնք հիմա դատապարտում են Արցախը տոտալ շրջափակման մեջ պահելու ադրբեջանական կողմի վարքագիծը, կլինի՝ Արևմտյան ամենաբարձր ատյանները՝ ԵԽԽՎ, ՄԱԿ և այլն, թե անձամբ ինքը՝ Փաշինյանը, այս ամենն էժանագին թատերական ներկայացումներ են. «Եթե Նիկոլ Փաշինյանը հայտարարում է, որ ինքը ճանաչում է Լաչինի միջանցքն, իբրև Ադրբեջանի մաս, սա ավտոմատ կերպով նշանակում է, որ Արցախը, ևս, դառնում է Ադրբեջանի տարածքային ամբողջականության մաս։ 2020թ. նոյեմբերի 9-ի համաձայնագրով նախատեսված նման կետ չի եղել, այդ փաստաթղթով հայտարարվել է, որ Լեռնային Ղարաբաղի, ինչպես նաև՝ Լաչինի միջանցքի ճակատագիրը հստակեցնելու է հետագայում։ Հիմա, երբ Փաշինյանը 2022 թ. հոկտեմբերի 6-ին Պրահայում տվել է իր համաձայնությունն առ այն, որ Արցախը դառնա Ադրբեջանի տարածքային ամբողջականության մաս, մնացյալ բոլոր տեսակի խոսակցությունները ցինիզմի արդյունք են»,- ասում է քաղաքագետը։

Հարցին՝ ուրեմն, ստեղծված իրավիճակում, ինչո՞ւ է ՀՀ վարչապետ աշխատող անձը նախօրեին Կառավարության հերթական նիստի ընթացքում հայտարարում, թե Արցախում իրավիճակը հումանիտար աղետի է վերածվում, Երվանդ Բոզոյանը պատասխանում է՝ սա նույնպես վատ բեմադրված թատերական ներկայացման մաս է, ինչպես նաև՝ ալիբի, որպեսզի հետագայում սովի մատնված Արցախում ստեղծված իրավիճակի մեղավորներ հռչակի, կամ, այսպես կոչված միջազգային հանրությանը, կամ՝ տեղում ծառայություն իրականացնող ռուսական խաղաղապահ զորամիավորմանը, մի խոսքով, բոլորին, բացի իրենից։

Անդրադառնալով Արցախում վերջին մեկ շաբաթվա ընթացքում ստեղծված հումանիտար աղետին, քաղաքագետ Երվանդ Բոզոյանը ցավով նկատում է՝ Արցախում այլևս այլ ելք չի մնացել՝ կամ այդ մարդիկ դատապարտվելու են սովամահության կամ մասսայաբար հեռանալու են Արցախից և այս իրավիճակի ստեղծողն ու պատասխանատուն մեկ մարդ է ՝ Նիկոլ Փաշինյանը, ով 2022 թ. հոկտեմբերի 6-ին՝ Պրահայում կայացած քառակողմ հանդիպման ընթացքում վերախմբագրեց 2020 թ. նոյեմբերի 9-ի համաձայնագիրը։

Աղբյուր` Փաստինֆո