Փաստ ինֆո

ԱՄՆ-ի Կոնգրեսում պարբերաբար տարբեր հարցերով քննարկումներ լինում են, կարող են ինչ-որ փաստաթուղթ ընդունել, դա կգնա համապատասխան կոմիտե, որի ընդունած փաստաթուղթը Կոնգրեսի փաստաթուղթ չի լինի: Այդ քննարկումները չեն նշանակում, որ ԱՄՆ-ն պատրաստվում է ինչ-որ պատժամիջոց կիրառել Ադրբեջանի դեմ, կամ ստիպել, որ Բերձորի միջանցքը բացեն: «Փաստինֆոյի» եթերում ասել է կովկասագետ, տարածաշրջանի հարցերով փորձագետ, «Հայկական նախագիծ» ՀԿ համահիմնադիր Կարեն Իգիթյանը:

Բանախոսի դիտարկմամբ, քաղաքագիտության մեջ ընդունված է, որ ժողովուրդն ինքը իրանով ոչինչ չի անում: Յուրաքանչյուր հասարակություն պետք է ունենա հիերարխիա, այսինքն, պետք է լինեն մարդիկ, որոնք որոշումներ են կայացնում և իրականացնում դրանք: Փաշինյանը փորձում է բոլորին ամեն ինչի մեջ մեղադրել, և այն մարդկանց, որոնք առաջնորդ դառնալու պոտենցիալ ունեն՝ վարկաբեկում է:

Կովասագետի խոսքերով, Ադրբեջանը ասում է սա իմ տարածքն է, Փաշինյանը գնում է Ալմա-Աթայի հռչակագրի շուրջ փաստաթուղթ է ստորագրում, հաստատում է, որ դա իրենց տարածքն է, որից հետո Ադրբեջանը բլոկադայի է ենթարկում Արցախը: Ադրբեջանը խախտում է նախկինում եղած պայմանավորվածությունները, միջազգային իրավունքը. Ադրբեջանը ցանկանում է հայաթափել Արցախը, հետո Սյունիքը և Երևանը: «Չպետք է մեզ խաբենք, թե Արցախով որևէ խնդիր լուծվում է: Նախկինում մեր իշխանությունները ասում էին Լեռնային Ղարաբաղի հակամարտություն, իսկ Ադրբեջանում ավելի ճիշտ էին ասում՝ հայ-ադրբեջանական, Լեռնային Ղարաբաղի խնդիր. նրանք կարծում էին, որ իրենց խնդիրը Հայաստանի հետ էր»,- ասել է Կ. Իգիթյանը:

Անդրադառնալով ՀՀ գործող իշխանությունների քաղաքականությանը, բանախոսը նշեց, որ այս կառավարությունը 5 տարիների ընթացքում վերցրել է 5 միլիարդ դոլարի վարկ, իսկ նախկին իշխանությոևւնները՝ 27 տարվա մեջ՝ 6.5 միլիարդ: Այս փողերի հաշվին նրանք որոշակի ծախսեր են անում և փորձում են ցույց տալ, թե փող կա, բայց դա պարտք է: Խաղաղության օրակարգը տապավել է և իշխանությունը ժողովրդին վախեցնելու միտում ունի, և Փաշինյանը կրկնում է Ադրբեջանի կարգախոսները:

Մանրամասները՝ տեսանյութում:

Աղբյուր` Փաստինֆո