Փաստ ինֆո

Ամերիաբանկը հերթական անգամ հանդես է գալիս յուրօրինակ նախաձեռնությամբ։ Team Telecom Armenia-ի հետ համատեղ Հայաստանում առաջին անգամ բանկն ազդարարում է հեռահաղորդակցության ոլորտում բաժնետոմսերի առաջնային հրապարակային տեղաբաշխման մեկնարկը։ Գործընկերները վստահեցնում են, ծրագրի իրականացումը վկայում է թափանցիկ գործելաոճի մասին։ Արդյունքում ստացված ներդրումները կուղղվեն ենթակառուցվածքների զարգացման գործին։

«Ամբողջ գործընթացը կազմակերպված է լինելու My Invest հարթակի միջոցով։ Այն իրականացվելու է օնլայն և ավտոմատացված համակարգի միջոցով։ Բաժանորդները My Invest համակարգի միջոցով հնարավորություն են ունենալու օնլայն ձեռք բերելու բաժնետոմսերն ու հետագայում կառավարելու դրանք, ցանկության դեպքում նաև վաճառելու դրանք»,- «Փաստինֆո»-ի հաղորդմամբ՝ ասել է Ամերիաբանկի տնօրինության նախագահ, գլխավոր տնօրեն Արտակ Հանեսյանը։

Նախատեսվում է, որ Ամերիաբանկն իրականացնելու է ընդհանուր առմամբ 8 մլրդ. 240 մլն. դրամ արժողությամբ բաժնետոմսերի տեղաբաշխումը, կազմակերպելու՝ արժեթղթերի գնանշումը։ Գործընկերները համոզմունք են հայտնում, որ ծրագիրն աննախադեպ ու պատմական ազդակ է դառնալու Հայաստանում կապիտալի շուկայի զարգացման համար։ Այդ գործում, ըստ նրանց, իր ներդրումը կունենա նաև հասարակությունը։

«Բավականին մեծ է հետաքրքրությունը։ Մենք արդեն իսկ բավականին մեծ ակտիվություն ենք նկատում՝ հատկապես մեր հավելվածի միջոցով։ Սա ենթադրում է, որ մենք բավականին երկար և դիվերսիֆիկացված ներդրողների ցանկ ենք ունենալու։ Իսկ դա շատ կարևոր է՝ հրապարակային ընկերության համար։ Որովհետև երկրորդային շուկայում շուկայի խորությունը, գործարքների ակտիվությունը կախված է ներդրողների քանակից»,- ասաց Ամերիաբանկի կապիտալի շուկաների բաժնի ղեկավար Շուշանիկ Հովսեփյանը։

Կապիտալի շուկայի զարգացումը Հայաստանի համար առաջնահերթ ռազմավարական ուղղություն է համարում նաև Կենտրոնական բանկի փոխնախագահ Արմեն Նուրբեկյանը։ Համոզմունք է հայտնում՝ հեռահաղորդակցության ոլորտում առաջին անգամ Ամերիաբանկի աջակցությամբ իրականացվող IPO-ն կարող է փոխել մեր երկրի բնակիչների հնարավորություններն ու նպաստել տնտեսության զարգացմանը։

«Կապիտալի շուկայի զարգացման, և ընդհանրապես, Հայաստանում բիզնեսի զարգացման համար, մեր կարծիքով, ամենակարևոր խնդիրներից մեկը որակյալ կորպորատիվ կառավարումն է։ Իսկ դա, հիմնականում գալիս է, երբ մենք շատ ունենք փոքր ներդրողներ, որոնք կարողանում են ռեալ մասնակցել ընկերությունների կառավարմանը, ինչը խիստ կարևոր է։ Հույս ունենք, որ սա նաև վարակիչ կլինի մեր այլ ընկերությունների համար»,- ասաց ԿԲ փոխնախագահ Արմեն Նուրբեկյանը։
Ծրագրի շրջանակում բաժնետոմսերի տեղաբաշխումը նախատեսված է իրականացնել մինչև այս տարվա հոկտեմբերի 31-ը։ Ամերիաբանկի գլխավոր տնօրենը, կեսկատակ տեսակետ է հայտնում՝ ծրագրի նկատմամբ այսպիսի հետաքրքրության շարունակության դեպքում այդ ժամկետը կարող է անգամ կրճատվել։

Աղբյուր` Փաստինֆո