Փաստ ինֆո

Վերջին շրջանում փոխվել է Բելառուսի նախագահ Լուկաշենկոյի հռետորաբանությունը Հայաստանի հետ կապված։ Նա հնչեցնում է հայտարարություններ, որոնք, կարծես թե, հույս են տալիս, որ ՀԱՊԿ անդամ երկրների հետ հարաբերությունները կարող են կարգավորվել։ «Փաստինֆո»-ի եթերում ասել է միջազգայնագետ Գրիգոր Բալասանյանը։

Փորձագետը նկատել է, որ ՀԱՊԿ-ում, իհարկե, խնդիրներ կան և Հայաստանը բազմիցս դրանք բարձրաձայնել է, բայց դա չի նշանակում, որ պետք է նեղացած կեցվածք ընդունել և փակել բոլոր դռները, որովհետև ամեն դեպքում լավ թե վատ ՀԱՊԿ-ը պաշտպանիչ վահան է Հայաստանի համար։ «Անդամակցումը ՀԱՊԿ-ին հեռու կպահի Հայաստանի թշնամիներին Հայաստանը ոչնչացնելու իրենց ծրագրերից»,- ասել է Գրիգոր Բալասանյանը եւ ավելացրել. «Իհարկե ՀԱՊԿ-ը դանդաղեց, ինչը պատճառ դարձավ Հայաստանում ոչ միանշանակ դիրքորոշման համար՝ ՀԱՊԿ-ի հետ կապված։ Իհարկե ադրբեջանական ագրեսիայի ժամանակ ՀԱՊԿ-ը պետք է շատ ավելի օպերատիվ գործեր,քան արձագանքեց, իհարկե ՀԱՊԿ-ի զորախումբը պետք է տեղակայվեր Հայաստանում։ Այստեղ արդեն խնդիր առաջացավ ՀԱՊԿ երկրների միջև և մինչ օրս Հայաստանում տեղակայված չէ ՀԱՊԿ խաղաղապահ զորախումբը, սակայն կարծում ենք Արարատ Միրզոյանի այցից հետո այդ հարցը ամեն դեպքում կկարգավորվի»։

Նրա գնահամամբ՝ նկատվում է փափուկ ուժի քաղաքականության դրսևորում, որը միայն ուրախալի է։

«Արարատ Միրզոյանը մասնակցեց ՀԱՊԿ անդամ երկրների արտգործնախարարների նեղ կազմով հանդիպմանը։ Սա նշանակում է, որ, իրոք, ՀԱՊԿ-ի հետ կան խոսելու հարցեր»,- նշել է Գ. Բալասանյանը՝ ավելացնելով, որ Արարատ Միրզոյանը կարևորել է հայ-ադրբեջանական սահմանի լարվածության ֆոնին ՀԱՊԿ-ի միանշանակ արձագանքը։

«Արցախի հարցին անդրադարձել է նաև Հայաստանում ԵՄ դիտորդների ղեկավարը։Տպավորություն է, որ ԵՄ դիտորդների ղեկավարը ցանկանում է ցրել այն նեգատիվ վերաբերմունքը, որը այս պահին կա ԵՄ դիտորդներ նկատմամբ հայ ազգաբնակչության շրջանում»,- ասել է Գրիգոր Բալասանյանը։

Մանրամասները՝ տեսանյութում

Աղբյուր` Փաստինֆո