Փաստ ինֆո

Երևանի ավագանու ընտրություններից դեռ երեք ամիս առաջ քաղաքական ուժերի ու դաշինքների ակտիվ դիրքավորման կամայական գործընթաց է սկսվել։ Հետաքրքիր է, որ այսպիսով որոշ քաղաքական միավորներ ժամանակից շուտ, դեռ մի կարգին ճանաչելիություն չունեցած՝ արդեն հիասթափեցնում են։

«Ապրելու երկիր» կուսակցության նախագահ, Երևանի քաղաքապետի թեկնածու Մանե Թանդիլյանն, օրինակ՝ «քաղաքականությունը քո մասին է» գրառմամբ իր պաստառներով հեղեղելով Երևանը, արդեն հասցրել է երևանցիներին տեսողական և մտային առումով հիասթափեցնել։

Քանի որ ինքը «դու»-ի է անցել, ուզում ես, ուղղակի ասել՝ չէ, այն «քաղաքականությունը, որ դու ես առաջ տանում՝քո մասին է»։ Չափազանց պրակտիկ և պրագմատիկ այս տիկինն առաջին մասնագիտությամբ պատմաբան է, բայց իր խոստովանությամբ՝ քանի որ ի սկզբանե գիտեր՝ պատմության ուսուցիչ աշխատելով տուն չես պահի, ուստի տուն պահելու, կամ՝ ֆինանսիստի մասնագիտությունն է ընտրում նա։ Իր գործն է, բնականաբար։

Եկեք անկեղծ լինենք՝ ո՞վ էր և ու՞ր էր Թանդիլյան Մանեն այսպես կոչված՝ «հեղափոխությունից» առաջ։ Կենսագրական տվյալները փաստում են, որ նա «Սինոփսիս Արմենիա» ընկերության ֆինանսական գծով տեղակալը և գլխավոր հաշվապահն է եղել 2009-2018 թվականը։ Այս ընկերությունն, ի դեպ, առաջիններից էր, եթե ոչ՝ առաջինը, որ իր գրասենյակի առջև «Մերժիր Սերժին» ակցիա իրականացրեց։ Հետաքրքիր է՝ պատմաբան-հաշվապահն իր աշխատանքային գործունեության ընթացքում ծանո՞թ էր ընդդիմադիր Փաշինյան-գործչի արժեհամակարգին, նրա մտայնություններին և գաղափարներին, որ Սերժին մերժելով Նիկոլ բերեց։ Պետության և պետական ինստիտուտների, մեր բանակի և զինվորների, ընդհանրապես, արտաքին քաղաքականության մեջ ի՞նչ գաղափարների կրող էր, պետության պաշտպանությունը և անվտանգությունն ի՞նչ տեղ էին զբաղեցնում նրա գործունեության մեջ՝ գիտե՞ր։ Թե՞ այս ամենը նրան չէր հետաքրքրում, կարևորը մերժելն էր, իսկ թե՝ ումո՞վ՝ ու՞մ, բացարձակ նշանակություն չունե՞ր հաշվապահական մտածողություն ունեցողի համար։

Ըստ էության, հաշվարկի արդյունք էր նաև իր հայտնվելը ԱԺ-ում վանաձորյան ծագմամբ կլասիկ պատգամավորի ցուցակով, ապա՝ նաև՝ փաշինյանական կառավարության կազմում՝ որպես սոցապ նախարար, ուր ինքը շատ հանգիստ հրաժարվեց իր նախկին՝ ընդդիմադիր գաղափարներից․ հենց թեկուզ՝ կուտակային կենսաթոշակային համակարգին անցնել-չանցնելը հիշենք։ Անցնելուն մոլի ընդդեմը շատ արագ վերածվեց մոլեռանդ կողմնակցի։ Ճիշտ այնպես, ինչպես՝ առանց մտածելու՝ զուտ անձնական հաշվարկով նիկոլ ընտրողը հիմա դարձել է մոլեռանդ նիկոլամերժ։

Տպավորություն է, թե՝ Թանդիլյանի հիմնական արժանիքը «Всепогодный истребитель» լինելն է՝ ուր գործուղում են, գնում է որպես հերթական հանձնարարություն կատարող։
Ասում է՝ «Իմ նախընտրական շտաբը ղեկավարելու է Մեսրոպ Առաքելյանը, ով չգիտի Մեսրոպին, կարճ ասեմ. սա նշանակում է դատապարտված ենք հաղթանակի»։
Մեսրոպին, իհարկե, չենք ճանաչում, փոխարենը՝ ավելի լավ է մենք մեր դիտարկումն անենք, սոցապնախարարի պաշտոնում Առաքելյանը հաջորդել է Թանդիլյան-Բաթոյան գենդերային հավասարության նշանով նշանակված կանանց։

Իսկ Երևանի քաղաքապետարանի հետ կապված նրա ամենանշանավոր հրապարակային հայտարարությունն էլ կապված էր Երևանի նախկին քաղաքապետ Հրաչյա Սարգսյանի հետ, իր երբեմնի ընկերոջը և կուսակցին նա քաղաքապետի պաշտոնը ստանձնելու օրը հրապարակային վատաբանեց, ինչ-որ զգուշացումներ արեց և․․․ հետո, երևի՝ ասացին՝ լռիր՝ լռեց։ Այս փոքրիկ կադրն, իհարկե, բնորոշում է այս երիտասարդ կադրին։

Բնականաբար, այսօրինակ կադրերի պարագայում շատ դժվար է լինելու ընտրություն կատարել․ մեր դիմաց մարդիկ են, ովքեր ո՛չ պետության, ո՛չ էլ Երևանի առաջնահերթությունները տարբերակելու ունակություն չունեն և անզեն աչքով իսկ տեսանելի է նրանց թեքումներն ու հակումները։

Հուսանք՝ լրջմիտ կադրերի դեռ կհանդիպենք, այլապես արդեն եղած մի շարք անուններ հուշում են, ընտրությունների՝ հատուկ կազմակերպված անլրջության միտումների մասին։

Աղբյուր` Փաստինֆո