Փաստ ինֆո

Բարձրագույն դատական խորհուրդը թույլ չի տվել Երևանի ընդհանուր իրավասության դատարանի դատավոր Դավիթ Հարությունյանին՝ ամբողջությամբ ներկայացնելու Կարեն Անդրեասյանին բացարկ հայտնելու միջնորդությունը։ «Փաստինֆո»-ի հաղորդմամբ՝ ԲԴԽ-ում այսօր շուրջ չորս ժամ շարունակվել է դատավոր Դավիթ Հարությունյանին կարգապահական պատասխանատվության ենթարկելու միջնորդության քննությունը՝ դռնփակ ռեժիմով։ Գործի, ըստ էության, քննությունը դեռևս չի սկսվել։ Այսօրվա նիստում Դավիթ Հարությունյանի փաստաբաններից մեկը միջնորդություն է ներկայացրել՝ պահանջելով ՀՀ արդարադատության նախարար Գրիգոր Մինասյանին հրավիրել ԲԴԽ և նախազգուշացնել՝ չբացահայտելու դռնփակ ռեժիմով քննվող գործի հանգամանքների մասին։ Խնդիրն այն է, որ դատավոր Դավիթ Հարությունյանը և նրա փաստաբանները նախազգուշացված են և զրկված են հնարավորությունից՝ վարույթի վերաբերյալ տվյալներ հանրայնացնելու, փոխարենը, ԱՆ նախարար Գրիգոր Մինասյանը ինչպես նախօրեին, այնպես էլ՝ այսօր տարբեր ԶԼՄ-ներին տրված հարցազրույցներով մեկնաբանություններ է տվել գործի առնչությամբ, ավելին, ըստ դատավորի ներկայացուցիչների, խեղաթյուրել տվյալները։

Լրագրողների հետ զրույցում դատավոր Դավիթ Հարությունյանն արձանագրեց, որ Անդրեասյանը թե՛ իրեն, թե՛ փաստաբաններին պարտադրում է ստորագրել ինչ-որ անհասկանալի բովանդակությամբ թերթիկ. «Նախազգուշացնում է, որպեսզի տվյալները չհրապարկվեն այդ դատավարության. չգիտեմ՝ ինչ բովանդակությամբ, ինչ գաղտնիքների մասին է խոսքը, ինչ պատասխանատվություն է նախատեսվում հրապարակման համար: Գործի քննությունն ի սկզբանե իրականացվում է դռնփակ, իսկ դռնփակ իրականացնելու նպատակն այն է, որ վերջիններս չեն ցանկանում, որպեսզի հանրությունը տեղեկանա կոնկրետ իմ կողմից ներկայացվելիք փաստերին»:

Անդրադառնալով Գրիգոր Մինասյանի հայտարարությանը, թե իրավախախտների կողմից պաշտպանության միջոց են նմանատիպ արձագանքները, դատավորն ասաց. «Այդ դեպքում իրեն ոչինչ չի խանգարում իր ընկերոջը միջնորդել, որպեսզի գործի քննությունը դռնբաց լինի, որ հատկապես իրավաբանական հանրությունը տեսնի, թե արդյո՞ք կա իրավախախտում դատավորի կողմից, թե՞ ոչ: Ու ընդհանրապես իրավախախտումները դատավորի կողմի՞ց են, թե՞ ԲԴԽ նախագահի ու Արդարադատության նախարարի»:

Նշված միջնորդությունը ԲԴԽ-ն մերժել է՝ այդպիսով պահպանելով ստեղծված անհավասար պայմաններ կողմերի միջեւ։

Ավելին, ԲԴԽ-ն հրաժարվել է ժամանակ տրամադրել կողմերին՝ բացարկի միջնորդության համար ապացուցույցների ներկայացնելու նպատակով եւ անցել Կարեն Անդրեասյանին բացարկի միջնորդության քննարկմանը՝ թույլ չտալով դատավորին և նրա ներկայացուցիչներին միջնորդությունը ներկայացնել մինչև վերջ։ Խորհուրդը նախ սահմանափակել է միջնորդությունը ներկայացնելու ժամանակը, ապա՝ առանց միջնորդությունը մինչև վերջ լսելու հեռացել խորհրդակցական սենյակ՝ որոշում կայացնելու։ Այն կհրապարակվի վաղը։

Բացարկի հիմքերի մասին լրագրողների հետ զրույցում հայտնելուց դատավորը զերծ մնաց, միայն նշեց, որ առանց կանոնների դատավարությունն է, Կարեն Անդրեասյանի ճաշակով։

Դատավորը նաև հայտնեց, որ հաղորդում ներկայացրել է՝ Կարեն Անդրեասյանին կարգապահական պատասխանատվության ենթարկելու վերաբերյալ, սակայն պատասխան առ այս պահը չի ստացվել, իսկ հանցագործության մասին հաղորդում ներկայացնելուց այս պահին դատավորը զերծ է մնացել։

Ի դեպ, այսօրվա նիստում իրավունքների խախտումների մասին բարձրաձայնել է նաև փաստաբան Միքայել Շխիմյանը, որը ստիպված էր լքել նիստերի դահլիճը փաստաբան Երեմ Սարգսյանի ներկայանալուց հետո, քանի որ ԲԴԽ-ն թույլ չի տվել չորս ներկայացուցչից ավել ունենալ։ Փաստաբանը հայտնել է, որ, թեև Խորհրդի կողմից որոշում չի կայացվել որևէ ներկայացուցչին վարույթից հեռացնելու վերաբերյալ, բոլոր հինգ փաստաբաններն էլ մինչ այս պահը պատշաճ կերպով ներգրավված են վարույթի քննությանը, մինչդեռ, այսօրվա դատական նիստում, առանց որևէ պատճառաբանության, երեք ժամ դատական նիստին մասնակցելուց հետո խորհրդի նախագահը պաշտպանության կողմին, ըստ էության, երկնընտրանքի առջև է կանգնեցրել՝ նշելով, որ դատավոր Դավիթ Հարությունյանը չի կարող միաժամանակ ունենալ հինգ ներկայացուցիչ փաստաբան և որ նրանցից մեկը պարտավոր է լքել դատական նիստերի դահլիճը։

Նշենք, որ ինչպես նախորդ օրերին, այնպես էլ այսօր՝ դատավորին աջակցելու համար ԲԴԽ են եկել փաստաբաններ, դատավորներ։

Հիշեցնենք, որ դատավորի նկատմամբ վարույթը հարուցվել է հարցազրույցի համար։ Խոսքը գնում է, մասնավորապես, ապրիլի 7-ին հրավիրված Դատավորների ընդհանուր ժողովի օրը լրագրողների հետ ունեցած ճեպազրույցի մասին։ Տվյալ օրն ընդհանուր ժողովի օրակարգում ԲԴԽ դատավոր-անդամի ընտրության հարցն էր։ Դրա նախօրեին ԲԴԽ նախագահ Կարեն Անդրեասյանը՝ մամուլի քարտուղարի անունից հաղորդագրություն էր տարածել, որով, ըստ էության, փորձել էր ուղղորդել դատավորներին ընտրությունից առաջ։ Դատավորներն, այդուհանդերձ, ԲԴԽ դատավոր անդամ չեն ընտրել Կարեն Անդրեասյանի թեկնածուին՝ Ռուբիկ Մխիթարյանին՝ իրենց քվեն տալով դատավոր Արշակ Վարդանյանին, որն ունի անկախ դատավորի համբավ։ Դավիթ Հարությունյանն անթույլատրելի էր համարել ԲԴԽ-ի հայտարարությունը՝ նշելով, որ որևէ մեկն իրավունք չունի նման արտահայտություն թույլ տալ՝ որևէ թեկնածուի հասցեին, նման հայտարարության հեղինակը բարեվարքության խնդիր ունի։ Անդրադառնալով հարցին՝ արդյո՞ք կա ուղղորդում իշխանությունների կողմից, Հարությունյանը նշել էր. «Անկախ նրանից՝ ուղղորդումն ում կողմից է, եթե կանգնում ասում են՝ բացարձակ կոնսենսուս կա, այդպես չի կարող լինել։ Եթե բացարձակ կոնսենսուս է, ուրմեն ինչ-որ մեկի կողմից ուղղորդվում է»։ Նա նաև նշել էր, որ 20-ից ավելի դատավորի լիազորություն տարբեր եղանակով անօրինական կերպով դադարեցվել են։

Հեղինակ՝ Իզաբել Սահակյան

Աղբյուր` Փաստինֆո