Փաստ ինֆո

Ձեռք բերված սպառազինությունների վերաբերյալ Փաշինյանի հնչեցրած թվերը սուտ են։ Այս մասին լրագրողների հետ հանդիպմանը հայտարարեց ՀՀ ԱԺ «Պատիվ ունեմ» խմբակցության ղեկավար Հայկ Մամիջանյանը։

Նշենք, որ 44-օրյա պատերազմի հանգամանքներն ուսումնասիրողՀՀ ԱԺ քննիչ հանձնաժողովի հունիսի 20-ի նիստում Նիկոլ Փաշինյանը հատարարել էր, որ ներկայիս կառավարությունը մինչև 2020-ի 44-օրյա պատերազմի մեկնարկը սպառազինության և ռազմական տեխնիկայի ձեռքբերման համար ծախսել է 608 մլրդ դրամ, իսկ 2008-2018 թվականի մայիս, այդ նպատակի համար իրականացվել է ընդամենը 354 մլրդ դրամի ձեռքբերում:

«Ուղղակի, եթե ուսումնասիրեք այդ տարիների մեր պաշտպանական բյուջեն, ապա պարզ է, որ ֆիզիկապես հնարավոր չէ, որ այդ ծավալներով սպառազինության գնում իրականացվեր։ Նշեմ նաև, որ մեզնից մնացել է շուրջ 100 մլն. դոլարի սպառազինության գնման բյուջե, շուրջ 200 մլն. դոլարի վարկային պայմանավորվածություններ և պայմանագրեր, իսկ իր նշած թվում, եթե անգամ այդ թվով խոսենք, ահռելի բաժին են կազմում ՍՈւ-երը, որոնք չունեն մարտագլխիկներ, և որևէ կերպ չեն օգտագործվել ՀՀ և Արցախի անվտանգության ապահովման համար»,- ասաց նա։

Մամիջանյանը նաև հայտարարեց, որ Փաշինյանը փոխել է սպառազինության պլանը, որով նախատեսվում էր 2000 հատ ԱԹՍ-ների գնում իրականացնել։ Իր խոսքով՝ դեռևս Սերժ Սարգսյանի իշխանության տարիներին 50 հազ տոննա անվճար սպառազինություն է ստացվել Հայաստանի ռազմավարական դաշնակցից։

Աղբյուր` Փաստինֆո