Փաստ ինֆո

Գլխավոր դատախազությունը հայց է ներկայացրել վարչական դատարան՝ պահանջելով անվավեր ճանաչել Երևանի նախկին քաղաքապետ Տարոն Մարգարյանի 2015 թվականի որոշումը։ Այդ որոշմամբ, գործարար, ԱԺ նախկին պատգամավոր Սամվել Ալեքսանյանը, որը հանրության մեջ հայտնի է որպես «Լֆիկ Սամո», կադաստրային գներով գնել ու Էրեբունու շուկային ավելացրել է մոտ 600 քմ հողատարածք։ Դատախազությունից հայտնում եմ, որ 2022-ից ընկերության միակ բաժնետերն Ալեքսանյանի կինն է՝ Շողերինա Մկրտչյանը, իսկ այդ ամբողջ տարածքում այժմ հսկայական առևտրի կենտրոն է գործում՝ Էրեբունի մոլը։

Ալեքսանյանի կողմից ապօրինի ձևով տարածքներ զավթելու օրինակներն այնքանով չեն ավարտվում։
Դեռևս 2020 թվականին վարչական դատարան հայց էր ներկայացրել՝ Երևանի քաղաքապետարանի դեմ։ Նա պահանջել էր օրինական ճանաչել նաև պետական սեփականություն համարվող հողատարածքներում իր կողմից կառուցած շինությունները։ Ալեքսանյանն այդ շինարարությունն իրականացվել էր դեռևս 2005 թվականին։ Այն ընդգրկում է Ալեքսանյանի առանձնատան տարածքը։

Բանն այն է, որ դեռևս 2020 թ. սեպտեմբերի 16-ին Երևանի այդ ժամանակվա քաղաքապետ Հայկ Մարությանը որոշում էր կայացրել՝ «Երևան քաղաքի Մալաթիա-Սեբաստիա վարչական շրջանի Շրջանային փողոցի հ.102/4 հասցեի հետնամասում գտնվող պետական սեփականություն հանդիսացող հողամասերն ապօրինի տիրապետումից ազատելու և ինքնակամ կառույցները քանդելու մասին»։ Դրանից հետո Ալեքսանյանին գրավոր ձևով առաջարկվել է ինքնակամ քանդել այդ շինությունները, ինչին վերջինս չէր համաձայնել՝ հորդորելով օրինականացնել դրանք։

Ի պատասխան գործարարի հորդորներին՝ Երևանի քաղաքապետարանից հայտնել էին, որ տարածքը օրինականացման ենթակա չէ, քանի որ ընդգրկված է անտառային նշանակության հողերում։ Ավելի ուշ խնդրին անդրադարձել էր նաև Երևանի ավագանու անդամ Գայանե Մելքոմ- Մելքոմյանը։ Նա լուսանկար էր հրապարակել՝ հայտարարելով, որ նկարում երևացող շինությունների կառուցմամբ ապօրինաբար զավթվել է Դալմայի այգիների 9 հա տարածքը։

Քաղաքապետարանի որոշումից երկու օր անց արդեն՝ սեպտեմբերի 18-ին Ալեքսանյանը հայց էր ներկայացրել կառույցի դեմ։ Այն մակագրվել էր Վարչական դատարանի դատավոր Ռուզաննա Ազրոյանին։ Արդեն 2021 թվականի ապրիլի 30-ին դատարանը բավարարել էր Սամվել Ալեքսանյանի հայցը։ Դրանից հետո քաղաքապետարանը դիմել էր վերաքննիչ դատարան՝ հայտարարելով, որ ամբողջությամբ առարկում է հայցի դեմ։

Արդեն 2022 թվականի մարտի 21-ին խնդրի մասին խոսել էր նաև Երևանի նախկին քաղաքապետ Հրաչյա Սարգսյանը։ Նա, անդրադառնալով ինքնակամ կառույցների մասին ահազանգերի խնդրին՝ հրապարակավ հայտարարել էր, որ դրանք որևէ դեպքում չեն օրինականացվելու։

«Ես ենթադրում եմ, որ ինչ-որ մարդիկ քաղաքապետարանում ինչ-որ բան են խոսք տալիս այդ մարդկանց։ Ես ձեզ հիմա պաշտոնապես հայտարարում եմ, ինքնակամ կառույցները չենք օրինականացնելու, պրծավ»,- հայտարարել էր նա։

Ավելի ուշ, սակայն, քաղաքապետի այս հայտարարությունից մոտ երկու ամիս անց, անդրադառնալով Ալեքսանյանի կողմից աօպրինաբար կառուցված շինությունների խնդրին՝ Սարգսյանը հայտարարել էր, որ դրանց ապամոնտաժման որոշումը ցանկության հիմքով չէ, այլ կառավարության որոշմամբ։

«Կա կառավարության որոշում, օրենսդրություն, և ես առաջնորդվում եմ օրենսդրությամբ, կառավարության որոշումներով և, եթե համապատասխանում է, անկախ անձից՝ օրինականացնում ենք, եթե չի համապատասխանում՝ ապա չենք օրինականացնում»,- պատասխանեց Հրաչյա Սարգսյանը:

Լրագրողների հետ այս նույն զրույցի ընթացքում Հրաչյա Սարգսյանը հայտնել էր, որ Ալեքսանյանի կողմից շինարարությունը կատարվել էր համայնքային հողատարածքում։ Իր խոսքով՝ իրենք անցել են բոլոր ատյաններով, սակայն, պարտվել են։ Դատարանի որոշմամբ, ստիպված են եղել օրինականացնել Ալեքսանյանի կառուցած շինությունները։

Աղբյուր` Փաստինֆո