Փաստ ինֆո

Պատմության հետ հաշտվելու անվան ներքո ջնջվում է հայկական ինքնությունը, հային վերացնում են ու ստեղծում հայաստանցու ինքնություն, «Հայաստան» անունը գուցեեւ մնա, բայց այլեւս չի լինի հայերի երկիր։ «Փաստինֆո»-ի հետ զրույցում իր մտահոգություններն է հայտնել Շիրակի թեմի առաջնորդ Միքայել արքեպիսկոպոս Աջապահյանը:

Սրբազանի դիտարկմամբ, գործող իշխանությունները հայրենիքը փորձում են ստորադասել պետությանը և դա բացարձակ անընդունելի է՝ մանավանդ հայ եկեղեցու համար, որը միշտ հայրենիք հասկացողությունը պահպանել է և այս փոքրիկ հողակտորի վրա ստեղծվել է պետականությունը: Բայց սա ամբողջական հայրենիքը չէ, և չի կարող հայը իր միտքը սահմանափակել այս փոքր պետականության մեջ, քանի որ իր հայրենիքը շատ ավելի մեծ է:

Ըստ Սրբազանի, հիմա այնպիսի մի շրջան է, որ ո՛չ հասարակության զգալի հատվածն է ճիշտ, ո՛չ էլ իշխանությունն է ճիշտ, և եկեղեցին ասում է իր ճշմարտացի խոսքը:

Սակայն գործող իշխանությունը ականջալուր չէ եկեղեցուն, երկխոսության մեջ չի մտնում, շարունակում է իր սխալ ընթացքը, բայց երբ լիակատար ձախողման մատնվի՝ եկեղեցուն կմեղադրի, թե ինչու իր ձեռքը չբռնեց: «Եկեղեցին հրավիրում է բոլորին միավորվել այն տեսլականի շուրջ, որ իր տեսլականն է նաև՝ հզոր հայրենիք, հզոր պետականություն, հայկական հարցի հետապնդում և այս երկրի մեծացում: Այս չափի երկրի մեջ հնարավոր չէ, որ հայ ժողովուրդը անվտանգ լինի»,- ասել է Մ. Աջապահյանը:

Արքեպիսկոպոսը մտավախություն հայտնեց, որ հայկական ինքնությունը ջնջվում է և ստեղծվում է հայաստանցու ինքնություն, որտեղ կրոնական, ազգային պատկանելիությունը երրորդական, չորրորդական են: Հայը և հայ եկեղեցին խոչընդոտ են այդ տեսլականի իրագործման համար: Իրենք չեն ուզում, որ լինի հայ, ուզում են լինի հայաստանցի, որտեղ հայերը պետք է լինեն փոքրամասնություն այս երկրում, հայ առաքելականները պետք է լինեն փոքրամասնություն:

Մանրամասները՝ տեսանյութում:

Աղբյուր` Փաստինֆո