Փաստ ինֆո

Շուշիի հետ կապված Նիկոլ Փաշինյանի հայտարարությունը նորություն էր։ Պարոն Փաշինյանը մանրամասն ներկայացրեց Շուշիի հետ կապված խնդիրն ինչի հետ է կապված եղել։ Այս մասին ասաց ՀՀ ԱԺ Պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը։

Հիշեցնենք, որ ավելի վաղ Նիկոլ Փաշինյանն ԱԺ-ում հայտարարել էր, որ Արցախյան Երկրորդ պատերազմի օրերին Շուշին ամրացնելու իր հրահանգից կարճ ժամանակ անց Արցախի նախագահն իրեն տեղեկացրել են, որ թշնամու մի խումբ ճեղքել է պաշտպանությունը և կանգնել Լաչին-Ստեփանակերտ ճանապարհին։ Իր խոսքով, սակայն, այդ տեղեկությունը չէր հաստատել ՀՀ ԶՈՒ ԳՇ-ն։ Փաշինյանը հայտարարել է, որ տասնյակի են հասել դեպքերը, երբ ԳՇ հերքել է Արցախի նախագահի հայտնած ճշգրիտ տեղեկությունը։ Ըստ նրա՝ Շուշիի անկումը սկսվել է հենց այդտեղից։ Փաշինյանը նաև հայտնել էր, որ Շուշիի անկման մասին ՀՀ ԳՇ պետ Օնիկ Գասպարյանն իրեն զեկուցել է նոյեմբերի 7-ի կեսօրին միայն, ինչից հետո ինքը հրահանգել է վերադարձնել Շուշին։ Նոյեմբերի 9-ին, իր խոսքով, իրեն վստահեցրել են, որ Շուշին վերադարձնելու գործողությունները հաջող են ընթանում։ Նոյեմբերի 10-ին, սակայն, պարզվել է, որ Շուշիում ոչ մի հայ զինվոր չկա։

Ավելի վաղ քննիչ հանձնաժողովը հանդիպել էր նաև Օնիկ Գասպարյանի հետ՝ փակ ձևաչափով։ Անդրանիկ Քոչարյանը հայտարարեց, որ
«Օնիկ Գասպարյանի ասածները որևէ հակասության մեջ չէին պարոն Փաշինյանի այսօր ներկայացրած փաստարկների հետ»,- ասաց նա։
Անդրադառնալով հանձնաժողովում Օնիկ Գասպարյանի հետ հանդիպումից հետո իր հայտարարությանը, որ Օնիկ Գասպարյանը պարտությունից հետո անելիք ուներ՝ Անդրանիկ Քոչարյանը հայտարարեց, որ իր տեսակետն այս ամենից հետո որևէ փոփոխության չի ենթարկվել։

«Օնիկ Գասպարյանի հետ կապված ՔԿ-ում բազմաթիվ գործերով քննություն է գնում, նաև Շուշիի հետ կապված։ Մենք հանձնաժողովում իր հետ այդ (իսկանդերի հետ կապված - խմբ.) հարցը քննել ենք»,- ասաց նա։
Նա հայտնեց, որ իրենք ՀՀ ԳՇ նախկին պետից ստացել են իրենց հուզող բոլոր հարցերի պատասխանները։ Միևնույն ժամանակ, Քոչարյանը չբացառեց Գասպարյանին կրկին հանձնաժողով կանչելու հավանականությունը։ Հայտարարեց, որ ամեն հրավիրյալից հետո կարող են հավելյալ հարցեր առաջանալ, ինչպես եղավ Արշակ Կարապետյանի պարագայում։

Հետաքրքիր է, որ Անդրանիկ Քոչարյանն ասում է, թե Փաշինյանի հայտարարությունները նորություն էին ու հետո էլ ավելացնում, թե նույնական էին Օնիկ Գասպարյանի ներկայացրածի հետ։ Վերջինս քննիչ հանձնաժողով այցելել է ավելի վաղ, եւ եթե հայտնած տվյալները նույնական էին, ապա Փաշինյանի ասածների նորությունը ո՞րն էր։

Աղբյուր` Փաստինֆո