Փաստ ինֆո

Շուշիի անկումից հետո ստիպված էինք ստորագրել 2020 թվականի նոյոմբերի 9-ին եռակողմ հայտարարությունը, քանի որ  հարվածի տալ էր հայտնվելու նաև Ստեփանակերտը։ ԱԺ 44-օրյա պատերազմի քննիչ հանձնաժողովի նիստին այս մասին հայտարարեց Նիկոլ Փաշինյանը։ Նշենք, որ այն տեղի է ունենում դռնբաց, թեեւ նախկինում հանձնաժողովի նիստերը եղել են դռնփակ։

Փաշինյանի խոսքով՝ 2020 թվականի նոյեմբերի 9-ի հայտարարությունը պատերազմը կանգնեցնելու՝ արդեն 5-րդ փորձն է եղել։

Առաջին խոսակցությունն, ըստ նրա, կայացել է դեռևս 2020 թվականի հոկտեմբերի 7-ին, երբ ծննդյան առիթով շնորհավորելու համար ինքը զանգահարել էր ՌԴ նախագահին։ Նրա փոխանցմամբ՝  զրույցի ընթացքում անդրադարձ է եղել Փաշինյանի արած հայտարարությանը, որ ինքը պատրաստ է գնալ կոմպրոմիսների։ Պուտինն առաջարկել է իր կողմից միջնորդական ջանքեր գործադրել՝ հնարավորինս արագ կրակի դադարի հասնելու համար։ Փաշինյանը համաձայնել է՝այն ըմբռնմամբ, որ կրակն առանց նախապայմանների դադարեցնելուց հետո կողմերը պետք է մնան այդ պահին իրենց գտնվելու վայրերում։ Նույն օրը երեկոյան կայացած մեկ այլ հեռախոսազրույցի ընթացքում, Փաշինյանի խոսքով, Պուտինն իրեն հայտնել է, որ այդ թեմայով խոսել է Ադրբեջանի նախագահի հետ, սակայն, Ալիևը հայտարարել է, որ պատրաստ չէ գնալ կրակի դադարեցման։

«Հաջորդ օրը ՌԴ նախագահն ինձ տեղեկացրեց, որ հրադադարի համար ադրբեջանական կողմն ակնկալում է, որ առանց մարտի իրենց հանձնվի Ֆիզուլին, և հայկական ուժերն Արաքսի երկայնքով նահանջեն մինչև Խուդաֆերինի ջրամբար»,- ասաց նա։

Հայտարարվել էր նաև, որ ադրբեջանական կողմն ակնկալում է ստանալ Արցախում սպանության և մարդու առևանգման համար պատիժ կրող Գուլիևին ու Ասկերովին՝ դրա դիմաց հնարավոր համարելով իր հերթին վերադարձնել գերիների։ Այս ամենի դիմաց, այդուհանդերձ, պետք է տեղի ունենար ոչ թե հրադադար, այլ հումանիտար դադար՝ զոհվածների հուղարկավորությունը կազմակերպելու համար։

Փաշինյանի խոսքով՝ ինքը կտրականապես մերժել է Վարանդայի շրջանն առանց մարտի հանձնելու և Արաքսի ափով նահանջելու ադրբեջանական պայմանը։ Արդեն հոկտեմբերի 8-ին կայացած Փաշինյան- Պուտին հեռախոսազրույցի ընթացքում ՌԴ նախագահը հայտնել է ադրբեջանական կողմի պատրաստակամության մասին՝ հրադադար հաստատելու հոկտեմբերի 9-ի կեսգիշերից։ Արդեն հոկտեմբերի 9-ին ՀՀ և ՌԴ արտաքին գործերի նախարարները Մոսկվայում են եղել։ Քննարկվել են նաև գերիներին ու զոհվածների աճյունները վերադարձնելու հարցերը։ Ձեռք բերված համաձայնությունից հետո ՌԴ նախագահը պաշտոնական հայտարարություն է տարածել՝ կոչ անելով Արցախի հակամարտության գոտում ընթացող ռազմական գործողությունների դադարեցում՝ հումանիտար նկատառումներով։ Հիշեցնենք, որ ՀՀ ԱԺ ընդդիմությունն ավելի վաղ բոյկոտել էր Քննիչ հանձնաժողովի այս հանդիպումը և ներկա չէր։

Մանրամասները՝ տեսանյութում։

Աղբյուր` Փաստինֆո