Փաստ ինֆո

Մայիսյան հաղթանակի տոների առիթով Ուկրիանայի մայրաքաղաք Կիևում երգիչ երգահան Ռուբեն Հախվերդյանի մասնակցությամբ բարեգործական մեծ համերգներ են տեղի ունեցել, որի արդյունքում հանգանակված պատկառելի հասույթը ուղղվել է ռուս – ուկրաինական ռազմական կոնֆլիկտի ընթացքում ուկրաինացի վիրավոր զինծառայողների բուժման համար։

Թե ինչպե՞ս պատահեց, որ հայ երաժիշտը որոշեց բարեգործական ժեստը կատարել, այսինքն՝ ծառայություն մատուցել մի երկրի մայրաքաղաքում, որի մատակարարած արգելված կասետային զենքերով 44 օրյա պատերազմի օրերին մեր թշնամին սպանում էր հայ զինվորներին, այն պարագայում, երբ նույն պատերազմից հետո, նույն երաժիշտը նմանօրինակ բարեգործական որևէ ակցիա նախաձեռնություն չցուցաբերեց՝ սեփական հայրենիքի համար հաշմանդամ դարձած տասնյակ հազարավոր զինծառայողների բուժման համար, մնում է անպատասխան։

«Փաստինֆո» լրատվականի «Ինչպե՞ս հասկանալ» պոդքաստի առաջին թողարկման ընթացքում դերասան Հրանտ Թոխատյանն ասում է՝ վաղուց արդեն անիմաստ է համարում այս կամ այն իրավիճակով պայմանավորված քննարկման թեմա դարձնել որևէ մեկի անձը, շատ ավելի արդյունավետ է քննարկել երևույթը, փորձել հասկանալ՝ ի՞նչպես վարվել տվյալ իրավիճակում.«Ես չեմ սիրում պայքարել ինչ – որ բանի դեմ, ես սիրում եմ պայքարել հանուն ինչ – որ բանի։ Ճիշտը դա է։ Եթե դու անում ես մի բան, որը հակասում է այսօր քո Հայրենիքում, քո հող ու ջրում ստեղծված իրականությանը, ուրեմն, ինչ – որ տեղ, ինչ – որ ժամանակ դու սխալվել ես քո ընտրած ուղուց։ Ցավոք, կա մի տարիք, որ ընտրած ուղղուց վերադարձնել այլևս անիմաստ է։ Մեր բոլորի կողմից սիրված երգիչ Ռուբեն Հախվերդյանն, առաջին հայացքից վատ արարք չի կատարել՝ բարեգործական համերգ է տվել վիրավոր զինծառայողների համար։ Այլ հարց է, թե ինչո՞ւ ինքն նմանօրինակ նախաձեռնությամբ հանդես չի եկել մեր Հայրենիքում, ասենք՝ Մատենադարանի մոտ կամ Օպերայի, Հանրապետության հրապարակներում, չէ՞ - որ մենք էլ, պատերազմից հետո հազարավոր վիրավոր տղաներ ունենք, որոնք նույնպես օգնության կարիք ունեն, ավելին՝ մինչ այսօր զոհեր կամ վիրավորներ ենք ունենում սահմաններին։

Խոսելով նույն երկրում տեղի ունեցող զուգահեռ իրականությունների մասին, որտեղ մի դեպքում մի արվեստագետ որոշում է համերգներ ունենալ՝ մեզ թշնամի ընկալող պետության վիրավոր զինվորների բուժման համար՝ հանգանակություն հավաքելու նպատակով, մյուս կողմից, միևնույն երկրում, մեկ այլ արվեստագետ ողբերգական մահով վախճանվում է հենց դատարանի դահլիճում, որտեղ պայքարում էր սեփական երկիրը փրկելու փորձի համար, դերասան Հրանտ Թոխատյանն ասում է՝ դատարանի դահլիճում ողբերգական մահով մահացած Արմեն Գրիգորյանն իր ընկերն է, նրա մասին՝ մահից հետո խոսելը, թվում էր՝ պետք է, որ դժվար լիներ, սակայն ասելիք Արմենի մասին շատ կա.«Կգա ժամանակ մարդիկ կհասկանան, որ Արմեն Գրիգորյանի մահով կորցրել են շատ կարևոր մեկին....»։

Զրույցը՝ Պոդքաստում

Աղբյուր` Փաստինֆո