Փաստ ինֆո

Երևանի ընդհանուր իրավասության դատարանի դատավոր Դավիթ Հարությունյանին կարգապահական պատասխանատվության ենթարկելու միջնորդության քննությունը ԲԴԽ-ում անցնում է համատարած խախտումներով։

«Փաստինֆո»-ի թղթակցի հաղորդմամբ՝ այսօրվա նիստի ընթացքում որպես դատավորի ներկայացուցիչ ներգրավվել են փաստաբաններ Երեմ Սարգսյանը, Հովհաննես Խուդոյանը, Լուսինե Մկրտչյանը։ Այսօրվա նիստը ևս, ինչպես և երեկ, անցել է բավականին լարված մթնոլորտում։ Նախ՝ նոր ներգրավված փաստաբաններին նախազգուշացրել են՝ չբացահայտելու դռփակ ռեժիմով քննվող գործի հանգամանքները, իսկ, թե ինչ գաղտնի տվյալներ են առկա՝ որևէ հոդաբաշխ պարզաբանում այդպես էլ չի ներկայացվել։ Եւ սա այն դեպքում, երբ արդարադատության նախարարը երեկ Հանրային ՀԸ եթերում հարցազրույց է տվել՝ մանրամասներ հայտնելով դատավորի գործից, իսկ երեկ ԲԴԽ նախագահը, մինչ դռնփակ ռեժիմի անցնելը՝ նիստում հանրայնացրել էր դատավորին վերագրվող ենթադրյալ խախտումները։ Փաստացի սահմանափակումները տարածվում են միայն դատավորի և նրա ներկայացուցիչների նկատմամբ։ Այսօր էլ ԲԴԽ-ն մերժել է գործը դռնփակ ռեժիմով քննելու որոշումը վերացնելու մասին դատավոր Դավիթ Հարությունյանի ներկայացուցիչների միջնորդությունը։ Նիստի ընթացքում Խորհուրդը սանկցիա է կիրառել փաստաբաններից մեկի նկատմամբ, որը փորձել է պարզաբանում ստանալ։ Նիստն ընդմիջվել էր մեկ ժամով՝ նոր ներգրավված փաստաբաններին նյութերին ծանոթանալու համար ժամանակ տրամադրելու համար։

Ընդմիջման ժամանակ ԲԴԽ նախագահ Կարեն Անդրեասյանը թիկնապահների ուղեկցությամբ դուրս եկավ շենքից՝ հրաժարվելով պատասխանել լրագրողների հարցադրումներին։ Մասնավորապես, լրագրողներն արձանագրել են, որ Անդրեասյանն իրեն ուղղված մեկ-երկու հարցը որակել էր լրագրողների կողմից ճնշում՝ իր նկատմամբ, արդյո՞ք դատավորների նկատմամբ այս վարույթների շարքն ինքնին ճնշում չէ։ Բացի այդ՝ փորձել են մեկնաբանություն ստանալ նաև Վերաքննիչ քրեական դատարանի դատավորների հետ հանդիպման և «ստվերային» նախագահ ընտրելու, դրա վերաբերյալ ԱԱԾ-ում վարույթ նախաձեռնելու տեղեկությունների շուրջ, սակայն Անդրեասյանը որևէ հարցի պատասխան չտալով հեռացավ թիկնապահների հետ։

Փակ դռների ետևում կայացած նիստի համատարած խախտումների մասին լրագրողների հետ զրույցում տեղեկացրեց փաստաբան Երեմ Սարգսյանը։

«Գիտեք ինչն է ցավալի։ Այսօր ԲԴԽ-ն փորձում է ինչ-որ նիստ անցկացնել, փորձում է գնահատել դատավորի վարքագիծ, բայց եթե հրապարակային լիներ, ինչի միջնորդությունը ներկայացրեցինք, կտեսնեիք, թե ինչ պրիմիտիվ խախտումներ են լինում։ Ես ավելի շատ հակված եմ նրան, որ սա դիտավորյալ է տեղի ունենում, քան՝ չիմանալու պատճառով, բայց դատական նիստի կարգի խախտումները շատ բացահայտ և ակնհայտ են։ Ցավոք՝ ԲԴԽ մյուս անդամներն այդքան էլ չեն միջամտում այս խախտումներին։ Եզակի դեպքերում, երբ մենք շատ ենք բարձրաձայնում, փորձում են ձայն հանել և շտկել իրավիճակը, որովհետև, ըստ էության, ԲԴԽ նախագահն է այդ նիստը վարում։ Սկզբնական փուլում ընդհանրապես փորձ էր արվում զրկելու մեզ որևէ տեսակի հնարավորությունից արտահայտվելու, բայց երբ փորձեցինք ցույց տալ խախտումները, որոշակի առումով փոխվեց իրավիճակը և ԲԴԽ- ն սկսեց թույլ տալ արտահայտվել, միջնորդություններ ներկայացնել, սակայն այս առումով, երբ ներկայացնում ենք միջնորդությունները, նույնսիկ չի հետաքրքրում, թե հակառակ կողմն ինչ է ասում խորությամբ, որովհետև, երբ հակառակ կողմը փորձում է դիրքորոշում արտահայտել., հորդորում են կարճ ասել։ Այսինքն՝ բովանդակությունը կարևոր չէ, իսկ բովանդակությունը կարևոր չի լինում, երբ ի սկզբանե գիտեն, թե ինչ որոշում են կայացելու»,- ասաց Երեմ Սարգսյանը։

Փաստաբանը նաև տեղեկացրեց, որ ԲԴԽ-ն դռնփակ է անցկացնում նիստը՝ իբրև արդարադատության շահից ելնելով, մինչդեռ, որևէ պարզաբանում չեն ներկայացնում, թե ինչ գաղտնիքի մասին է խոսքը։

«Այդ պարզաբանումը չտրվեց, որովհետև իրենք էլ չգիտեն ինչի մասին է խոսքը, իրենց համար գերխնդիր է դռնփակ անցկացնել, հնարավորինս շուտ քննել»,- նշեց փաստաբանը՝ հավելելով, որ ԲԴԽ-ն փորձում է հանրությունից թաքցնել դատավոր Դավիթ Հարությունյանի շեշտադրումները, հատկապես, բացարկների հարցի քննարկման ժամանակ։ Բացի այդ, ԲԴԽ-ն նոր ներգրավված փաստաբաններին նյութերին ծանոթանալու համար ընդամենը մեկ ժամ ժամանակ է տրվել՝ սահմանափակելով իրավունքները և, ԲԴԽ որոշումները բողոքարկման ենթակա չլինելն ազատություն է տվել ԲԴԽ-ին՝ համատարած խախտումներ թույլ տալու համար։

Փաստաբաններին թույլ չեն տվել նաև ձայնագրել նիստը՝ հղում կատարելով ԲԴԽ աշխատակարգին, մինչդեռ, Դատական օրենսգիրք սահմանադրական օրենքով սահմանված է, որ իրավունք ունեն սղագրում և ձայնագրում իրականացնել։

Հիշեցնենք, որ դատավորի նկատմամբ վարույթը հարուցվել է հարցազրույցի համար։ Խոսքը գնում է, մասնավորապես, ապրիլի 7-ին հրավիրված Դատավորների ընդհանուր ժողովի օրը լրագրողների հետ ունեցած ճեպազրույցի մասին։ Տվյալ օրն ընդհանուր ժողովի օրակարգում ԲԴԽ դատավոր-անդամի ընտրության հարցն էր։ Դրա նախօրեին ԲԴԽ նախագահ Կարեն Անդրեասյանը՝ մամուլի քարտուղարի անունից հաղորդագրություն էր տարածել, որով, ըստ էության, փորձել էր ուղղորդել դատավորներին ընտրությունից առաջ։ Դատավորներն, այդուհանդերձ, ԲԴԽ դատավոր անդամ չեն ընտրել Կարեն Անդրեասյանի թեկնածուին՝ Ռուբիկ Մխիթարյանին՝ իրենց քվեն տալով դատավոր Արշակ Վարդանյանին, որն ունի անկախ դատավորի համբավ։ Դավիթ Հարությունյանն անթույլատրելի էր համարել ԲԴԽ-ի հայտարարությունը՝ նշելով, որ որևէ մեկն իրավունք չունի նման արտահայտություն թույլ տալ՝ որևէ թեկնածուի հասցեին, նման հայտարարության հեղինակը բարեվարքության խնդիր ունի։ Անդրադառնալով հարցին՝ արդյո՞ք կա ուղղորդում իշխանությունների կողմից, Հարությունյանը նշել էր. «Անկախ նրանից՝ ուղղորդումն ում կողմից է, եթե կանգնում ասում են՝ բացարձակ կոնսենսուս կա, այդպես չի կարող լինել։ Եթե բացարձակ կոնսենսուս է, ուրմեն ինչ-որ մեկի կողմից ուղղորդվում է»։ Նա նաև նշել էր, որ 20-ից ավելի դատավորի լիազորություն տարբեր եղանակով անօրինական կերպով դադարեցվել են։

Հեղինակ՝ Իզաբել Սահակյան

Աղբյուր` Փաստինֆո