Փաստ ինֆո

Հայաստանյան կողմը Հռոմի ստատուտի վավերացումը նախաձեռնել է, որպեսզի Ադրբեջանի նախագահ Ալիևի՝ ՀՀ-ի նկատմամբ գործողությունները դատապարտելու համար Հագգայի դատարան դիմի։ Համենյան դեպս, Կառավարությունից իրենց այս նախաձեռնությունն այդպես են մեկնաբանում։ «Փաստինֆո» լրատվականի հետ զրույցում ասում է քաղաքագետ Ստեփան Դանիելյանը։

Ինչ վերաբերում է վավերացման արդյունքում՝ ՀՀ այցելելու դեպքում ՌԴ նախագահ Վլադիմիր Պուտինի հնարավոր ձերբակալությանը, ապա քաղաքագետի դիտարկմամբ՝ ավելի շուտ, Գյումրիում գտնվող ռուսական ռազմաբազան այստեղ՝ Հայաստանում կձերբակալի ում ցանկանա, քան ՀՀ-ում կձերբակալեն Վլադիմիր Պուտինին։ «Սա, իհարկե, աբսուրդ է»,- նշել է Ս. Դանիելյանը։

Հիշեցնենք, որ ՀՀ Կառավարությունը Միջազգային քրեական դատարանի Հռոմի կանոնադրությունը (Հռոմի ստատուտ) առաջիկայում կներկայացնի Ազգային ժողովի վավերացմանը: Այս մասին տեղեկացնում է վարչապետի աշխատակազմի Տեղեկատվության և հասարակայնության հետ կապերի վարչությունը։

Նկատառմանը, թե արդյո՞ք ընդունելի կարո՞ղ է համարվել հայաստանյան իշխանությունների կողմից ռազմավարական դաշնակից համարվող ՌԴ-ի նկատմամբ, հատկապես, վերջին շրջանում ընդգծված ագրեսիվ պահվածքը, որ արտահայտվում է՝ ինչպես ՀՀ իշխանությունների կողմից Հռոմի ստատուտի վավերացման նախաձեռնողականությամբ, այնպես էլՀՀ-ում ՌԴ դեսպանին ներկայացված խիստ դժգոհությամբ՝ Հակարի կամրջի մոտ ռուս խաղաղապահների ներգրավվածությամբ տեղի ունեցած միջադեպի կապակցությամբ, Ստեփան Դանիելյանը պատասխանում է՝ինքն, այլևս, աշխատում է ռազմավարական դաշնակից արտահայտությունը չօգտագործել։ Իրականում դա ուղղակի բառ է դարձել, որի տակ, հիմա, արդեն շատ քիչ բովանդակություն կա, որն էլ մեզ իրականությունից, բոլորովին, այլ կողմ է տանում.«Երբ աշխարհում ողջ միջազգային կարգն է խախտվում, դաշնակիցներ կարող են լինել միայն այս կամ այն միջազգային կոալիցիաներում, որտեղ հստակ հարաբերություններ են գործում։ Երբ այդ հարաբերությունները խախտված են, ապա պարզ չի, թե ով՝ ինչ ճանապարհով է գնում և ով՝ ինչ շահեր ունի։ Մենք տեսնում ենք, թե ինչպես է հիմա իրեն պահում, օրինակ, Հունգարիան, տեսնում ենք, թե ինչպես է իրեն պահում ՆԱՏՕ-ի անդամ Թուրքիան, տեսանք, թե ինչպես իրենց պահեցին ՀԱՊԿ-ի անդամ մի քանի երկրներ մեզ հետ՝44 օրյա պատերազմից առաջ և հետո։ Ակնհայտ էր, որ նրանց աջակցությունը ոչ թե ՀԱՊԿ անդամ երկիր Հայաստանի կողմն էր, այլ՝ Ադրբեջանի։ Այլ կերպ ասած, նրանք այլ համակարգի շահերի կրողն ու պաշտպանն են, որը, դեռևս, չի ձևավորվել։ Խոսքը՝ թուրքական պետությունների համադաշնության մասին է։ Այսինքն, մենք տեսնում ենք, որ ռազմավարական դաշնակից արտահայտությունն իր իմաստը կորցրել է և, նույնիսկ, շատ անհասկանալի է դարձել և այս ամենը վերաբերում է նաև ՌԴ-ի հետ մեր հարաբերություններին։ Այդ իսկ պատճառով, շատ ավելի ճիշտ կլիներ, որ մենք հիմա խոսեինք, ոչ թե դաշնակցային հարաբերությունների մասին, այլ՝ շահերի սպասարկման տեսանկյունից»։

Բանախոսը հավելում է՝ այլ հարց է, թե որքանո՞վ է ճիշտ, ընդհանրապես, Հագգայի դատարան դիմելը և որքանո՞վ դա ազդեցություն կունենա. «Այս հարցի պատասխանը ստանալու համար պետք է հիշենք, թե ի՞նչ կատարվեց Հաագայի՝ ՄԱԿ-ի դատարանի՝ Արցախի շրջափակման առնչությամբ կայացված որոշման հետ, որը որևէ մեկն, ուղղակի, բանի տեղ չդրեց։ Ինչ վերաբերում է Ադրբեջանի նախագահին պատասխանատվության ենթարկելու պատճառաբանությամբ Հագգայի՝ քրեական դատարանի դիմելուն, ապա մենք տեսնում ենք, որ, օրինակ, ԱՄՆ-ն ինչպես թքած ունի այդ դատարանի կայացրած որոշումների վրա և, նույնիսկ, սանկցիաներ է ցանկանում կիրառել այդ դատարանի դատավորների նկատմամբ՝ արգելելով նրանց մուտքը Միացյալ նահանգներ»։

Ստեփան Դանիելյանն, առնվազն, անհասկանալի է համարում, թե ո՞ւմ վրա են հույս դրել ՀՀ իշխանությունները՝ ցանկանալով վավերացնել Հռոմի ստատուտը, եթե, ինչպես տեսնում ենք, գոյություն չունի համաշխարհային կարգ, որին կենթարկվեն պետությունները.«Հետևաբար, ամենայն հավանականությամբ, հայաստանյան օրվա իշխանությունները շարքային PR ով են զբաղված՝ հանրությանը հերթական անգամ հիմարի կարգավիճակում դնելու համար՝ ցույց տալու, թե իրենք ինչ - որ կարևոր գործով են զբաղված։ Նույնը վերաբերում է նաև՝ ՀՀ-ում ՌԴ դեսպանին դժգոհության նոտա հղելու գործողությանը։ Այս իշխանությունը ճանաչել է Արցախն՝ Ադրբեջանի կազմում, որով Ադրբեջանն իրավունք է ձեռք բերել Հակարիի կամրջի հարևանությամբ անցակետ տեղադրել։ Հիմա իրենք որպես ի՞նչ են նոտա հղում ՀՀ-ում Ռուսաստանի Դաշնության դեսպանին։ Պարզ չէ՞, որ սա, նույնպես, հերթական էժանագին PR-ն է, որով զբաղվում և զբաղվել է այս Կառավարությունն՝ իր իշխանության գալու առաջին իսկ օրվանից»։

Աղբյուր` Փաստինֆո