Փաստ ինֆո

Արցախի Ասկերան ու Նախիջևանիկ համայնքներում երեկ տեղացած կարկուտն ահռելի վնասներ է հասցրել մշակաբույսերին ու այգիներին։

Վնասի չափը դեռ ճշտվում է․ նախնական գնահատականով՝ առանձնապես տուժել են Ասկերան քաղաքի կենտրոնական հատվածից մինչև Նախիջևանիկ ընկած հատվածի այգիներն ու տնամերձ հողատարածքները, իսկ Նախիջևանիկի հողատարածքներում  գրեթե ոչինչ չի մնացել։

«Կազմվել են խմբեր, որոնք հիմա շրջում են քաղաքում, տեղում գնահատում վնասի չափը, բնակիչների ներկայացրած տեղեկությունները։ Երկու օր կպահանջվի, պատկերն ամբողջացնելու համար։ Ըստ բնակիչների՝ նռան այգիներն էլ շատ վնասվել․ ծաղկան փուլում էին, և կարկուտը ծաղկի մեծ մասը թափել է, ինչ էլ որ մնացել է, էլ չի բռի, պտուղ չի դառնա։ Սածիլները լրիվությամբ ջարդվել են, հողում մնացած արմատներն էլ քիչ հավանական է, որ կվերականգնվեն։ Միայն լոլիկը հնարավոր է որոշ չափով վերականգնվի, բայց վարունգի, բիբարի և մյուսների սածիլները լրիվությամբ ոչնչացվել են»-«Փաստինֆո»-ի հետ զրույցում ասաց Ասկերանի քաղաքապետ Հայկ Շամիրյանը։

Նրա ներկայացմամբ՝ բանջարաբոստանային մշակաբույսերին ու այգիներին վնասել է հատկապես երկրորդ անգամ՝ մոտ 5 րոպե տւևողությամբ ինտենսիվ տեղացած կարկուտը, որը բավականին խոշոր չափերի է եղել։

«Մոտ 15 րոպե տեղաց, բայց մանր էր ու քամու հետ էր գալիս։ Կտրվելուց մի քանի րոպե անց արդեն բավականին խոշոր հատիկներով սկսեց տեղալ ու ամենաշատ վնասը հենց այդ ընթացքում եղավ։ Այն աստիճան խոշոր էր, որ մի քնի րոպպեում այնքան տերև թափեց, որ ջրահեռացման համակարգը կոլապսի ենթարկեց։ ԱԻՆ-ի օգնությամբ մի կերպ բացել ենք հորատանցքերը, որ ջուրը չցվի տները։ Այդուհանդեձ, քաղաքի կենտրոնական մասի տների առաջին հարկերը լցվել էին սելավաջրերով։ Հավաբները, սարայները լրիվ ջուր էին լցվել։ Անգամ այն տները, որոնց պատերը դրսից սվաղած չէին, խոնավացել էին»,-նշեց քաղաքապետը։

Նախիջևանիկի գյուղապետ Սևակ Խաչատրյանն էլ մեզ հետ զրույցում ասաց, որ հողատարրածքներում սածիլների ցողուններն են մնացել, որոնք բերք չեն տալու։ Կարկուտը ոչ միայն ամբողջությամբ մշակաբույսերն է փչացրել, այլև՝ խաղողի ու նռան այգիները։

«Մի հատ սածիլ չի մնացել։ Պետք է նորից սերմ ցանել, սածիլ դառնա, որ դնեն, բայց էդ էլ շատ ուշ կլինի․ չեմ կարծում, թե ստացվի։ Խաղողի, նռան այգիների մասին էլ չեմ ասում։ Ոչ ծաղիկ է մնացել, ոչ վազ, ոչ էլ տերև։ Կարկուտն ու սելավն ամբողջությամբ սրբել է տարել»,-նշեց Խաչատրյանը։

Այսօր Նախիջևանիկում ևս խմբերն աշխատում են, փորձում վնասի հստակ չափերը հասկանալ։ Ասկերանում էլ առավոտյան ժամը 6-ից մաքրում են քաղաքի փողոցները, որոնք սելավաջրերի հետևանքով խիճով ու ավազով էին լցվել։

Աղբյուր` Փաստինֆո