Փաստ ինֆո

Կարեն Անդրեասյանը կորցրել է իրականության հետ կապը, որովհետև նման պայմաններով նույն հիմքերով իմ վերաբերյալ կարգապահական վարույթը քննվել է դռնբաց, այդպես էլ պետք է լիներ, որովհետև այլ կերպ հնարավոր չէր քննարկել հրապարակային ասված խոսքի իրավաչափությունը կամ անօրինական լինելը։ Այս մասին «Փաստինֆո»-ի հետ զրույցում ասաց Զարուհի Նախշքարյանը։

«Այսինքն, ԲԴԽ-ի այս վարույթի քննության հիմնական առաքելությունը պետք է լիներ թափանցիկությունը, այն է՝ ո՞ր դատավորը ո՞ր դեպքերում ո՞ր արտահայտությունների համար և ի՞նչ պայմաններում ասված խոսքի դեպքում կարող է պատասխանատվության ենթարկվել։ Դա հասարակության համար է իրականացվում։ Եթե դու հասարակությանը մեկուսացնում ես և կարող ես առհասարակ քննարկել բոլորովին վարույթի հետ չառնչվող հարցեր, կամայական որոշումներ կայացնել և դրա վերաբերյալ հասարակությունը կարող է տեղեկություն չունենալ։ Ես՝ որպես քաղաքացի, որպես փաստաբան իրավունք ունեմ մտածելու, որ ԲԴԽ-ի դռների հետևում տեղի է ունենում անօրինական գործողություն, որովհետև դուք կայացրել եք դռնփակ դատական նիստ կայացնելու որոշում»,-ասաց Նախշքարյանը՝ հավելելով, որ նույնիսկ չեն պարզաբանել, թե ինչու են դռնփակ ռեժիմով քննում.«Վստահ եմ՝ պարոն Անդրեասյանը վախեցավ լրագրողների, փաստաբանների, դատավորների ներկայությունից»։

Անդրադառնալով դատավոր Դավիթ Հարությունյանի նկատմամբ կարգապահական վարույթին՝ Նախշքարյանը նշեց, որ դատավորների որս է իրականացվում, որն ուղղված է դատական իշխանության ակախության կործանմանը, ոչնչացմանը. «Սա այլ կերպ չի կարող քննարկվել կամ դիտարկվել»։

Նշենք, որ դատավոր Զարուհի Նախշքարյանի լիազորությունները դադարեցվել են՝ համակարգային խնդիրների բարձրաձայնման համար։ Նախկին դատավորն իրավունքների վերականգնման համար դիմել է ՄԻԵԴ՝ վիճարկելով խոսքի ազատության սահմանափակման և դատավորին արդարադատության համակարգից մեկուսացման հարցերը։

Հեղինակ՝ Իզաբել Սահակյան

Աղբյուր` Փաստինֆո