Փաստ ինֆո

Ադրբեջանը քայլ առ քայլ իրականացնում է Արցախն ամբողջությամբ ու Հայաստանի սահմանամերձ բնակավայրերը հայաթափելու ծրագիր։ Հակառակորդի վերջնական նպատակը տարածաշրջանից հայերիս հետքն ու հայկական պետությունը վերացնելն է և դրա համար թիրախավորել է նաև Արցախի ու Հայաստանի հանքերը։ «Փաստինֆո»-ի հետ զրույցում նման տեսակետ հնչեցրեց ազատամարտիկ Կամո Հարությունյանը։

«Ադրբեջանն ամեն ինչ անում է, որ թուլացնի նաև մեր տնտեսությունը։ Նրանք ոչ մի բան պատահական չեն անում․ պատահական չի նաև այն, որ թիրախավորել են հենց Երասխում կառուցվող գործարանը, դրանից առաջ՝ Սոթքի հանքը։ Ամեն ինչ անում են, որ սահմանամերձ բնակավայրերում ապրելն անհնար դառնա։ Արցախի բլոկադան սկսել են Կաշենի հանքի փակումից, Հայաստանինն էլ Երախի գործարանի կառուցումը թույլ չտալուց, Սոթքի հանքավայրի փակումից են սկսում։ Վաղը, մյուս օրն էլ նույնն անելու են Քաջարանի ու մյուս գործարանների հետ՝ մինչև հասնեն Երևան ու իրենց դրոշը դնեն Երևանի կենտրոնում»,-շեշտեց ազատամարտիկը։

Հիշեցնելով Երկրորդ աշխարհամարտի ժամանակ Չերչիլի հետևյալ խոսքերը՝ «եթե գլուխդ առյուծի բերանում է, ապա ոչ մի բանի շուրջ հնարավոր չէ պայմանավորվել», Հարությունյանը շեշտում է՝ Ադրբեջանի հետ ոչ մի լեզվով հնարավոր չէ խոսել, բացի ռազմականից։

«Մի պարզ բան պետք է հասկանալ․ հակառակորդը հետ չի կանգնելու․ ատամն արդեն բռնել է, կծելու է այնքան, ինչքան կարողացավ։ Կարևորը հիմա հասկանալն է, որ ոչ մեկը՝ ո՛չ եվրոպացիները, ո՛չ ռուսները, ո՛չ պարսիկները, մեզ չեն փրկելու։ Մենք պետք է ի մի բերենք մեր ուժերը, Արցախում ու Հայաստանում քաղաքական կողմնորոշումները, ամբիցիաները մի կողմ դնենք, ձևավորենք մեկ միասնական ճակատ։ Այդ դեպքում անկասկած հաջողության ենք հասնելու։ Գիտեմ, վստահ եմ, որ առողջ ուժեր թե՛ Հայաստանում, թե՛ Արցախում կան, և նրանք շատ լավ գիտակցում են, որ մեր փրկությունը մեզնից է գալու»,-ասաց ազատամարտիկը։

Շեշտելով Արցախի ու ՀՀ սահմանամերձ դարձած բնակավայրերը հայաթափելու՝ թշնամու ակտիվ գործողությունները, Արցախի օկուպացված տարածքներում գտնվող գերեզմանները, հուշարձանները հիմնահատակ ավերելու, ընդամենը երկու օր առաջ Երասխում շինարարության մեջ աշխատողների թիրախավորման փաստերը՝ Հարությունյանը լրիվ անհեթեթ է համարում, այսպես կոչված, խաղաղության մասին ցանկացած զրույց։

«Այսքանից հետո դեռ կասկածող կա՞, որ հակառակորդի նպատակը մեզ վերացնելն է, մեր պետությունը քարտեզից ջնջելն է։ Կրկնում եմ՝ ոչ մի դիտորդ, ոչ մի պատժամիջոց չի կանգնեցնելու Ադրբեջանին։ Դա ասում եմ որպես հակառակորդին շատ լավ ճանաչող մարդ։ Միայն ուժով կարող ենք զսպել նրան։ Ենթադրենք, պատժամիջոց կիրառվեց, ասենք՝ նավթ ու գազ չառան Ադրբեջանից, Արցախին կապող ճանապարհը բացվելու՞ է։ Մեզ տալո՞ւ է ինչ-որ բան դա։ Ես կարծում եմ, որ ոչ․ ավելին՝ այդ դեպքում ավելի ագրեսիվ է դառնալու Ադրբեջանը»,-նկատում է Կամո Հարությունյանը։

Ազատամարտիկն այն համոզմանն է, որ եթե ՀՀ իշխանությունները վերջապես վերադառնան իրականություն, գիտակցեն իրավիճակի լրջությունն ու անկեղծորեն ժողովրդին ասեն, որ մեզ այլ ելք չի մնում, քան ոտքի կանգնել ու պայքարել, ապա շատ արագ դա տեղի կունենա։

«Որպեսզի չմտնեն ու մեզ մեր տներում չկոտորեն, անհապաղ գործել է պետք։ Հակառակորդի ցանկացած ոտնձգություն պետք է համարժեք պատասխան ստանա։ Որ Երասխում 2 հոգու վիրավորել են, ինչո՞ւ մենք պատասխան գործողությամբ 18 ադրբեջանցի չենք վիրավորել։ Երբ ՀՀ տարածքից երկու զինծառայողի բռնում-տանում են, ինչո՞ւ մենք տաս ադրբեջանցու չենք բռնում»,-նկատում է ազատամարտիկն ու հավելում՝ եթե անպատիժ ես թողնում թշնամու հանցագործությունները, ախորժակը բացվում և նորանոր հանցանքներ է գործում։

Աղբյուր` Փաստինֆո