Փաստ ինֆո

«Իրականում, զինանշանները սիմվոլիկ բնույթ են կրում և, ոչ մի դեպքում, իրենց բովանդակության մեջ իրական պատկերներ չեն ներառում։ Այսինքն՝ այն, ինչ ասվել է Փաշինյանի կողմից՝ ՀՀ զինանշանի վերաբերյալ, առաջին հայացքից կատեգորիկ անգրագիտության դրսևորում կարելի էր համարել, եթե մենք չիմանայինք, թե ո՞վ է Փաշինյանը և ի՞նչ նպատակով է նա այս կամ այն վիճահարույց հայտարարություններն անում»,- «Փաստինֆո» լրատվականի հետ զրույցում ասել է կլինիկական հոգեբան Միհրդատ Մադաթյանը։

Հիշեցնենք, որ երեկ ՀՀ Ազգային Ժողովի ամբիոնից ՀՀ-ում վարչապետ աշխատող անձն անդրադարձել էր պետական սիմվոլ հանդիսոացող զինանշանի թեմային՝ հայտարարելով, թե ի՞նչ կապ ունի ՀՀ զինանշանը մեր պետության հետ։ Վարչապետ աշխատող անձը, մասնավորապես, քննարկման թեմա էր դարձրել զինանշանի վրա առկա՝ առյուծի, ինչպես նաև՝ Արարատ լեռան և Նոյյան տապանի պատկերները։

Հոգեբանը նկատում է՝ կասկածելի մոտիվացիաներն այս վարչապետի մոտ նոր սովորություն չեն.«Այն, որ Փաշինյանը, դեռևս 2018-ին իշխանության ղեկը զավթել էր բացառապես հայ ազգային ինքնության և անկախ պետականության բոլոր հիմքերն ու հետքերը ջնջելու և վերացնելու հստակ նպատակադրվածությամբ, ես, դեռևս, պարզել էի կարդալով իր հեղինակած այն բանը, որի անունն ինքը գիրք է դրել։ Ինձ համար, արդեն, ի սկզբանե, ամեն ինչ պարզ էր՝ և՛ Լանզարոտեի կոնվենցիայի ընդունման, և՛ դասագրքերից հայրենասիրություն ու Հայրենիք տերմինների հեռացման, և՛ Հայ եկեղեցու պատմություն առարկայի դպրոցներից հեռացման բոլոր շարժառիթները։ Եվ, բնական է, որ այս ամենի հետևանքը ընդհուպ մինչև ազգային գերագույն արժեքներ համարվող պետական սիմվոլների պղծմամբ և մերժմամբ պետք է ավարտվեր ու սա, գոնե, ինձ համար, իսկզբանե պարզ էր»։

Միհրդատ Մադաթյանը հիշում է՝ նույնիսկ Խորհրդային Միության տարիներին Արարատ լեռը պատկերված է եղել հայկական պետական սիմվոլների վրա և դա Խորհրդային Միության ղեկավարների մոտ խնդիրներ չի առաջացրել.«Իհարկե, նույնիսկ, այն տարիներին Արարատի պատկերը մեր զինանաշանի վրա անհանգստացրել է ժամանակի թուրքական իշխանություններին, սակայն, որևէ տեսակի քննարկման արդյունքում այն չի վերանայվել, էլ չեմ խոսում՝ գերբի վրայից հանվելու մասին։ Դե, ուրեմն, եկեք փորձենք պատկերացնել, թե ո՞վ է այսօր ղեկավարում Հայաստանի Հանրապետությունը, որ քննարկման թեմա կամ խնդիր է դարձնում անկախ Հայաստանի զինանշանի վրա առկա Արարատ լեռան սիմվոլը։ Առիթ եմ ունեցել մի քանի անգամ ասելու, հիմա էլ կկրկնեմ՝ եթե ես լիենի Թուրքիայի ղեկավարը, Հայաստանի հետ կանեի ճիշտ նույն բաները, ինչ անում է Նիկոլ Փաշինյանը ՀՀ-ում։ Իսկ ի՞նչ է անում նա՝ հրաժարվում է Արցախից, պատրաստվում է տրամադրել Սյունիքի միջանցքը, չի վարանում խոսել այն մասին, որ ցանկանում է փոխել ՀՀ Սահմանադրությունը, խոսում է զինանշանը փոխելու և այնտեղից Արարատը հանելու մասին ակնարկներ է անում (ի դեպ, այս թեմայով օվերտոնի պատուհանը նա բացեց ամիսներ առաջ, երբ խոսեց Արագած լեռան մասին), իր վարչախմբի բերանով հրաժարվում է Ցեղասպանության ճանաչման գործընթացից, չի բացառվում, որ սրան կարող է հետևել, նաև Ցեղասպանության հուշահամալիրի ապամոնտաժման թեմայով նոր օվերտոնի պատուհանի բացումը։ Նա վերախմբագրել է տալիս դպրոցական դասագրքերը, ինչպես նաև, արդեն իսկ, դպրոցներում մտցվել է հարևան որևէ երկրի լեզուն սովորելու պարտադիր պայմանը և ՀՀ որոշ դպրոցներում դասավանդվում է ադրբեջաներեն։ Գիտե՞ք, ես դեմ չեմ հարևանների հետ բարիդրացիական հարաբերություններ կառուցելուն, բայց դա չի կարող լինել անարժանապատիվ ստրուկի կեցվածքով, այսինքն, այնպիսին, ինչպիսին տեսնում ենք օրվա այս իշխանությունների օրինակով»,- ասում է հոգեբանը։

Վերջինս նկատում է՝ չի զարմանա, եթե վարչապետն առաջարկի ՀՀ զինանշանի վրա ոչխար պատկերել՝ պայմանավորելով ոչխարի այսօր ՀՀ-ում գրանցած կենդանական ամենամեծ պոպուլացիայի տեմպերով. «Միամիտ մարդիկ մտածում են, որ օրինակ, ՀՀ գերբն ու դրոշը, Արարատ լեռը, Ցեղասպնության թեման կամ հուշահամալիրն այն գերարժեքներն են, որոնց Փաշինյան Նիկոլը երբեք չի կպնի, բայց նրանք սխալվում են։ Ամենավտանգավոր օվերտոնի պատուհանները, որ պատրաստվում է բացել այս վարչապետն իր թիմով, դեռևս առջևում են։ Ես համոզված եմ, որ, եթե, հանկարծ, վաղը ՀՀ նոր զինանշանի համար մրցույթ հայտարարվի, լիքը արվեստագետներ, մի քանի կոպեկ փողի համար, հերթ կկանգնեն՝ ներկայացնելով Փաշինյանի պատկերացրած թշվառ Հայաստանի նոր գերբի ոչխարազարդ տարբերակները»։

Նիկոլ Փաշինյանն, ըստ հոգեբանի մասնագիտական վերլուծության, ամեն քայլ նախանձելի հետևողականությամբ է իրականացնում։ Ավելին՝ մասնագետը պնդում է, որ Նիկոլ Փաշինյանին հոգեկան խանգարում վերագրողները, նրան անմիջապես սրբացնողներն են.«Պարզապես, մենք ազգովի սխալվեցինք այնտեղ, որտեղ Փաշինյանի մեջ հայ տեսանք, իսկ արարքների մեջ՝ սխալմունք և դավաճանություն փնտրեցինք։ Փաշինյանը սխալմունք կամ դավաճանություն թույլ չի տվել։ Նա, հետևողական կերպով պրոադրբեջանաթուքական քաղաքականություն վարող է։ Նա չի վարանում, անգամ, լկտիաբար դա արտահայտել ՀՀ պետական, ինչպես նաև՝ միջազգային ամենաբարձր հարթակներում։ Իրականում, մենք գործ ունենք մի մարդու հետ, ով իրեն ավելի թուրք կամ ադրբեջանցի է զգում, քան հայ և, նույնիսկ դա չի թաքցնում, երբ ասում է, թե ինքը չի վիրավորվում, երբ իրեն թուրք են ասում։ Երբ դեռևս պատերազմից առաջ Իտալիայում նա հայտարարեց, թե Արցախի հիմնախնդրի լուծումը պետք է ընդունելի լինի նաև ադրբեջանցիների համար, արդյո՞ք սա վտանգավոր կարմիր լույս չէր, որ վառվեց մեզ համար։ Կամ հիմա, երբ միջազգային ամենատարբեր հարթակներից մեզ ասում են, թե Ալիև- Էրդողան- Փաշինյան հանդիպումները սիրուհիների խաղ են հիշեցնում, արդյո՞ք սա, նույնպես, կարմիր լույս չէ։ Օրինակները շատ են, հետևանքը մեկը՝ այն փաստացի իրավիճակը, որ ունենք մենք այսօր Հայաստանում և Արցախում»,- ամփոփելով զրույցն ասում է կլինիկական հոգեբան Միհրդատ Մադաթյանը։

Աղբյուր` Փաստինֆո