Փաստ ինֆո

Ադրբեջանական կողմն այսօր ևս թիրախավորել է Երասխի տարածքում կառուցող մետալուրգիական գործարանը «Փաստինֆո»-ի հետ զրույցում այս մասին ասաց համայնքապետ Սարո Այվազյանը։ Նրա խոսքով՝ գործարանի ուղղությամբ կրակոցները եղել են աշխատանքների մեկնարկից կարճ ժամանակ անց։ Հնչել է երկու կրակոց՝ մոտավորապես 3 րոպե ընդմիջումով։ Գյուղի բնակելի տարածքի ուղղությամբ, ըստ մեր զրուցակցի, այդուհանդերձ, այսօր չեն կրակել։ Նպատակն, ըստ նրա, ակնհայտ է՝ պարալիզացնել կառույցի աշխատանքը։

«Այսօր կրակոցներն սկսվեցին առավոտյան ժամը 10։00-ից։ Երկու կրակոց արձակեցին տեխնիկայի վրա։ Կրակողները դիպուկահարներ են։ Այս պահին աշխատանքները կրկին դադարեցված են։ Հենց շինարարական աշխատանքները մեկնարկում են, կռաններն սկսում են աշխատել այդ ընթացքում սկսում են կրակել»,- պատմեց մեր զրուցակիցը։
Դրանից ելնելով՝ Այվազյանի խոսքով, տեղի բնակիչները համոզված են՝ գործարանում աշխատանքները վերսկսելու դեպքում կարող են նոր կրակոցներ լինել։ Այվազյանի խոսքով՝ առաջին օրվա վիրավորներից հետո ադրբեջանական կողմն այսօր կրակել է տեխնիկայի ուղղությամբ։

«Դա այն զենքն է, որով կրակելուց հետո որևէ երկաթի կպնելու դեպքում բեկորներ է առաջացնում ու այդ բեկորները հարվածում են մարդկանց»,- ասաց նա։

Այդուհանդերձ, «Փաստինֆո»-ի զրուցակցի խոսքով, գյուղում խուճապ չկա։ Բնակիչները շարունակում են բնականոն կյանքը, չեն դադարել նաև երեխաների համար խաղահրապարակի կառուցման աշխատանքները։ Գյուղացիները շարունակում են աշխատել նաև այգիներում ու արոտավայրերում։

Աղբյուր` Փաստինֆո