Փաստ ինֆո

Միակ բանը, որ կարելի է ասել այդ կադրերը նայելուց հետո՝ «փառք հայոց բանակին»։ Այս մասին այսօր ԱԺ ճեպազրույցների ժամանակ հայտարարեց ՀՀ ԱԺ «Պատիվ ունեմ խմբակցության ղեկավար Հայկ Մամիջանյանը՝ անդրադառնալով նախօրեին Հայաստանի Հանրապետության տարածքում ադրբեջանցիների կողմից դրոշ տեղադրելու գործողությունները կանխելու փաստին։

Հիշեցնենք, որ հունիսի 15-ին՝ ժամը 08:40-ի սահմաններում, Ադրբեջանի սահմանապահ ծառայության մի խումբ զինծառայողներ Հակարիի կամրջի ուղղությամբ առաջխաղացման փորձ էին կատարել՝ ՀՀ տարածքում դրոշ տեղադրելու նպատակով: Հայկական կողմի ձեռնարկած միջոցների արդյունքում ադրբեջանցի զինծառայողների առաջխաղացման և ՀՀ տարածքում դրոշ տեղադրելու փորձը կանխվել էր:

«Փառք այն տղերքին՝ զինվորներին ու սպաներին, որոնք ի հեճուկս Երևանի վարած տգետ և դավաճանական քաղաքականությանը, շարունակում են պահպանել իմ, Ձեր, մեր ընտանիքների անդորրը։ Սա երևի միակ մեկնաբանությունն է որ ես կարող եմ անել՝ այս հարցի հետ կապված»,- ասաց նա։

Որպես տեղի ունեցածի քաղաքական մեկնաբանությունը՝ Մամիջանյանը հայտարարեց, որ սա է Նիկոլ Փաշինյանի «խաղաղության դարաշրջանը»։ Նա հայտարարեց, որ տեղի ունեցող գործընթացների վերաբերյալ իրենց քաղաքական ուժի վերաբերմունքն ու մոտեցումն ակնհայտ է, սակայն, իր խոսքով, նույնիսկ այս պարագայում, ներկա իշխանություններն անում են այն, ինչ իրենցից պահանջում է Ադրբեջանը՝ անգամ այդ պարագայում էլ չկարողանալով ապահովել իրենց խոստացած խաղաղության դարաշրջանը։

«Որովհետև խաղաղությունը չեն մուրում։ «Որովհետև ամեն ինչ տանք» պրինցիպը երբեք խաղաղության չի բերելու։ Քանի կար՝ Փաշինյանն ինքն իրեն հարց էր տալիս՝ իսկ կարո՞ղ է ադրբեջանցիներն ուզում են վերացնել մեզ, բնաջնջել ու նոր ցեղասպանուևթյուն անել։ Հիմա, կարծես դրա հակառակ պատասխանն է գտել՝ հաշվի առնելով իր խոսույթը»,- ասաց նա։

Այս համատեքստում Մամիջանյանը Փաշինյանին խորհուրդ տվեց նայել ու հասկանալ, թե իրականում ինչ է ադրբեջանցիների ուզածը։

Աղբյուր` Փաստինֆո