Փաստ ինֆո

Արդյո՞ք Արմեն Աշոտյանը գիտեր, որ իր նկատմամբ կարող է նման քայլեր ձեռնարկվեն՝ այո, բայց արդյո՞ք դա նրան ստիպեց լռել, չբացահայտել այն հանցագործությունները, որոնք տեղի են ունենում ՀՀ-ի ու Արցախի շուրջ։ Ճշմարտացի խոսքը ճաղերի հետևքում թացքնելն է հնարավորություն ընձեռում ոմանց շարունակել իրենց թրքական նպատակների իրականացումը, բայց իրենք վստահաբար սխալվել են, որովհետև կան մարդիկ, որոնց խոսքը նման ձևով չի լռեցվի, Արմեն Աշոտյանը պատկանում է այդ մարդկանց դասին։ Այս մասին լրագրողների հետ զրույցում ասաց ՀՀ արդարադատության նախկին նախարար Դավիթ Հարությունյանը՝ անդրադառնալով ՀՀԿ փոխնախագահ Արմեն Աշոտյանի կալանավորման որոշմանը։

Ինչ վերաբերում է հարցի իրավական կողմին և հրապարակված ձայնագրությանը, Հարությունյանը նշեց, որ մի քանի անգամ շատ ուշադիր, թուղթ ու գրիչը ձեռքին, փորձել է կարդալ այն նյութը, որը տարածել է ՔԿ-ն. «Այնտեղ իրավունքի մասին խոսք չկա և մեկնաբանելու ոչինչ չկա։ Կարելի է վերցնել ցանկացած հեքիաթ, յուրաքանչյուր 4-5 բառից հետո գրել «հանցավոր մտադրությամբ», «կատարելով հանցագործություն» , «չարաշահելով պաշտոնական դիրքը», վերջում էլ ավելացնելով «այսպիսով կատարելով փողերի լվացում» բառերը, այդ փաստաթուղթը երևի ավելի շատ աղերս կունենա իրականության հետ, քան այն, ինչ ես ընթերցեցի ՔԿ-ի հրապարակման մեջ»։

Անդրադառնալով ՀՀ-ում և Արցախում ստեղծված իրավիճակում քաղաքական ուժերի անելիքներին, արդյո՞ք կա օրակարգ՝ Հարությունյանը նշեց, որ մի բան ակնհայտ է՝ առաջին հերթին պետք է լինի ուղիղ խոսքը ժողովրդի հետ։ Նրա խոսքով՝ այդ բաց խոսքը գտնում է իր հասցեատիրոջը, մարդիկ ընկալում են ինչ է տեղի ունենում երկրի հետ։
«Երբ խոսում ենք Սահմանադրության մասին, այն ամրագրում է մի շարք բարձրագույն արժեքներ: Ժողովրդական ապստամբությունն ընդունված է և սահմանադրական իրավունքը նաև դիտում է ժողովրդի իրավունք, թեև դրա մասին ուղղակիորեն գրված չէ, բայց բավական է բացել սահմանադրական իրավունքի որևէ դասական միջազգայնորեն ընդունված դասագիրք, և դրա մասին կտեսնեք: Դա չի նշանակում, որ դա միակ եղանակն է: Այս պահին ես չեմ տեսնում որևէ անհրաժեշտություն՝ գործելու ստանդարտ իրավական դաշտից դուրս՝ ապավինելով վերջին միջոցներին»,- ասաց նա:

Աղբյուր` Փաստինֆո