Փաստ ինֆո

Դատարանները բեռնաթափելու համար Արդարադատության նախարարությունն օրենսդրական փոփոխությունների փաթեթ է ներկայացրել Կառավարությանը։ Նախագիծը, որի համաձայն գումարի բռնագանձման պահանջներով գործերի մի մասը կհանձնեն նոտարների քննությանը, այսօր ընդունվել է Կառավարության նիստում։

Նախարարության հեղինակած նախագծով՝ գումարի բռնագանձման պահանջով կարգադրություն արձակելու մասին դիմումի քննությունը ենթակա կլինի նոտարին, եթե դիմումով նեկայացվել է միայն գումարի բռնագանձման պահանջ, իսկ ոչ դրամական բնույթի պահանջները ենթակա չեն լինի քննության նոտարի կողմից։

«Դատական պրակտիկայի ուսումնասիրությունը ցույց է տալիս, որ դատարանների ծանրաբեռնվածությունը հիմնականում պայմանավորված է գումարի բռնագանձման պահանջով հայցադիմումների և վճարման կարգադրություն արձակելու մասին դիմումների քանակով»,-նախագիծը ներկայացնելիս այս մասին ասաց արդարադատության նախարար Գրիգոր Մինասյանը։

Ըստ նրա՝ 2020-2022 թվականի ընթացքում ընդհանուր իրավասության դատարան է ներկայացվել 441 128 հայցադիմում, որից 395 149-ը եղել է գումարի բռնագանձման պահանջի մասին:

«Ստացվում է գումարի բռնագանձման պահանջով հայցադիմումները կազմում ընդհանուրի մոտ 90 տոկոսը։ Այսինքն մեր դատարանները 90 տոկոսով ծանրաբեռնված են գործերով, որոնք իրենցից արդարադատություն չեն ներկայացնում, այլ գրավոր գործարքի հիման վրա վեճեր են»,– նշեց Մինասյանը և հավելեց, որ այդ որոշումները հիմնականում չեն էլ բողոքարկվում, ինչը վկայում է, որ դատական կարգով դրանք լուծելը ինքնանպատակ է։

Հիմնավորման մեջ նշված է, որ բռնագանձման ենթակա գումարի չափը չի կարող գերազանցել 200 000–ը (ներառյալ տուժանքը (տուգանքը, տույժը), տոկոսները և այլ վճարները)։ Նոտարին դիմում կարող են ներկայացնել նաև բանկերը, վարկային կազմակերպությունները, ինչպես նաև էներգետիկայի (էլեկտրաէներգետիկայի, ջերմամատակարարման, գազամատակարարման), ջրային և հեռահաղորդակցության (էլեկտրոնային հաղորդակցության) ոլորտներում կարգավորվող գործունեություն իրականացնող անձինք՝ սպառողների կամ հաճախորդների հետ կնքված պայմանագրերի հիման վրա:

Առաջարկվող օրենսդրական փոփոխությունը, ըստ նախարարի, 80 տոկոսով թեթևացնելու է դատարանների ծանրաբեռնվածությունը։

Աղբյուր` Փաստինֆո