Փաստ ինֆո

«Եթե հիշում եք՝ մի քանի տարի առաջ Նիկոլ Փաշինյանը հայտարարում էր, թե Արցախի վերաբերյալ միջազգային բանակցությունների ընթացքում, ինքն իրեն գժի տեղ դնելու գնով, փորձում է պաշտպանել Արցախի շահը։ Ժամանակը ցույց տվեց, սակայն, որ այդ մարդն, իրականում, իրեն գժի տեղ դնելով, հասավ մինչև Հայաստանի ինքնիշխան տարածքների հանձնմանը։ Եվ հիմա, կոնկրետ այսօր, նույն այդպիսի դեմքով Կառավարության նիստի ընթացքում նա հայտարարում է, թե Լաչինի անցանելիությունը երեկվանից լիովին զրոյացվել է՝ արտաքին աշխարհից, անգամ, սնունդ չի մտնում Արցախ։ Եվ սա այն դեպքում, երբ ստեղծված իրավիճակի համար առաջին պատասխանատուն, եթե չասենք՝ հանցավոր փոխհամաձայնություն թույլ տված պատասխանատուն, հենց ինքն է»,- «Փաստինֆո» լրատվականի հետ զրույցում ասում է քաղաքացիական ակտիվիստ Անի Կաղինյանը։

Բանախոսը վստահ է՝ Հակարիի կամրջի հարևանությամբ տեղադրված ադրբեջանական անցակետի շուրջ նախօրեից տեղի ունցեղ զարգացումները, որի արդյունքում՝ Արցախն՝ իր 120.000 բնակիչներով հանդերձ, այլևս հայտնվել է տոտալ շրջափակման մեջ, Ալիև - Փաշինյան հերթական հանցավոր պայմանավորվածության հետևանք է.«Այն, որ Փաշինյանն ինքն է առաջինը խախտել 2020 թ. նոյեմբերի 9-ի եռակողմ փաստաթղթի կետերը՝ առանց մեկ կրակոցի և անհասկանալի պայմաններում հանձնելով Բերձորը, Սուսն ու Աղվավնոն, դնելով Արցախն այն իրավիճակում, որում հայտնվել է, արդեն, վեցը ամիս շարունակ, սա փաստ է։ Չեմ խոսում այն մասին, որ Արցախը Հայաստանին կապող կամրջի, ինչպես նաև՝ պատշաճ ճանապարհների շինարարությամբ պետք է շահագրգռված լիներ և զբաղվեր, հենց, հայկական կողմը՝ ապահովելով ՀՀ քաղաքացի հանդիսացող Արցախում ապրող մեր հայրենակիցների անարգելք և անխափան ելումուտը, ինչը ոչ միայն հանցավոր անգործության արդյունքում չի արվել, այլև թողնվել է թշնամու հայեցողությանը։ Ադրբեջանն է զբաղվել ճանապարհների շինարարությամբ, ինչպես նաեւ՝ կամրջի կառուցմամբ և հիմա վերահսկում է այն այնպես, ինչպես ցանկանում է։ Այս ամենը խոսում են այն մասին, որ գոյություն է ունեցել և մինչ այս պահն առկա է Ալիև - Փաշինյան հանցավոր համագործակցություն»,- ասում է Կաղինյանը։

Հարցին՝ ի՞նչ է մտածել Նիկոլ – Ալիև տանդեմն այս անգամ, բանախոսը պատասխանում է՝ երեկվանից մեկնարկել է Արցախի հայաթափման ակտիվ, գործնական և, թերևս, վերջին փուլը.«Ըստ բաց աղբյուրների տարածած տեղեկատվության, հայկական կողմը կրակ է բացել ադրբեջանցիների կողմից կառուցված կամրջի ուղղությամբ, ընդ որում, տեղում ծառայություն իրականացնող ռուս խաղապահների ուղղությամբ՝ նույնպես։ Այն խաղաղապահների, ովքեր այսօր մեր հայրենակիցների ֆիզիկական գոյության, այսինքն ապրելու միակ երաշխավորն են՝ տոտալ շրջափակման մեջ հայտնված Արցախում։ Ուզում եմ հասկանամ՝ ինչո՞ւ… Խնդիրն այստեղ ավելի խորն ու վտանգավոր է, քան կարող է թվալ առաջին հայացքից։ Փաստորեն, սրանով Ալիև - Փաշինյան զույգը լուծում է ոչ միայն ադրբեջանական անցակետի փակման հարցը, այլ նաև՝ հարվածի տակ է դնում ռուսական զորամիավորման աշխատանքը՝ գործուն քայլերով նպաստելով հավաքական Արևմուտքի պլաններին՝ ռուսական զինուժի դուրս բերմանը Արցախից։ Չգիտես ինչպես, կրակահերթի պահին, նույն տեղում են հայտնվում նաև ԵՄ դիտորդներն ու իրենց դիտարանից ոչ միայն հետևում, այլև տեսանկարահում են տեղի ունեցողը։ Եթե այս ողջ պատկերը հավաքում ես մի տեղում, հասկանալի է դառնում Ալիև - Փաշինյան հերթական հակահայկական սադրանքի ողջ քաղաքական նպատակներն ու վտանգավոր էությունը»,- ասում է Անի Կաղինյանը։

Խոսելով անցակետի փակման հետևանքների մասին՝ մեր զրուցակիցը նկատում է՝ ադրբեջանական կողմի նախաձեռնությամբ անցակետի տոտալ փակումը Արցախում հումանիտար լրջագույն աղետ է ստեղծելու.«Մենք տեսնում ենք, որ երեկվանից, առաջին անհրաժեշտության բեռով բարձված ռուսական բեռնատարների շարասյունը կանգնած է մնացել անցակետի մուտքի մոտ և չի կարողանում առաջ շարժվել։ Ի՞նչ է իրենից ներկայացնում հումանիտար օգնությունը՝ դա ոչ միայն սնունդն է, այլև դեղամիջոցներ, առաջին անհրաժեշտության պարագաներ նորածինների համար, դրանք են՝ կերեր, տակդիրներ, հիգիենայի այլ պարագաներ և այլն։ Դեռ չեմ խոսում այն մասին, որ այսպիսի կամայական վարքագիծ դրսևորելու պարագայում, ադրբեջանական կողմը կարող է հայտարարել նաև, որ թույլ չի տալիս Կարմիր խաչի ելումուտը Արցախի տարածք։ Ի՞նչ են անելու այդ պարագայում Արցախում փակված մնացած հիվանդները, հազարավոր ծերերը, հղիները, մոտ 30.000 երեխաներ, որ ապրում են Արցախում։ Այսինքն, հասկանալով, որ արցախցին ամիսների շարունակ դիմադրում է ամեն տեսակ զրկանքների, ձմռան ցրտին դիմանում է առանց գազի ու ջեռուցման, զրկում իրեն ու իր երեխաներին առաջին անհրաժեշտության սննդից, ամիսներով՝ փակ սահմանների պարագայում, անգամ, չի լքում իր հայրենի հողը, հիմա Ալիև - Փաշինյան հանցավոր տանդեմն անցել է Արցախի հայաթափման ամենաբիրտ մեթոդին՝ զրկելով այդ մարդկանց, անգամ, տարրական սննդից»։

Բնախոսն ընդգծում է՝ ստացվում է Ալիևն ու Փաշինյանը միասին, փոխհամաձայնեցված վերջին 6 ամիսների ընթացքում սոցիալ – տնտեսական իրավիճակն Արցախում այն աստիճան սրեցին, որպեսզի այնտեղ սովի մատնված արցախցիներն Արցախից դուրս գալու համար խնդրեն ադրբեջանական կողմին՝ անցակետով դեպի Հայաստան անցնելու համար.«Ահա այն ամենը, ինչ պետք է իմանալ Փաշինյանի վարած հակահայկական և հայատյաց քաղաքականության մասին։ Եթե Ադրբեջանի իշխանությունը որոշում է կայացրել, որ այդ անցակետով, բացարձակապես, ոչ մի մեքենա այլևս չի անցնելու, ապա ստացվում է, որ Արցախում այլևս ոչ թե հումանիտար ճգնաժամ, այլ հումանիտար աղետ է»,-ամփոփելով զրույցն ասում է Անի Կաղինյանը։

Աղբյուր` Փաստինֆո