Փաստ ինֆո

Արտաքին ուժեր կան, որոնք կոպտորեն ոտնահարում են ժողովրդավարությունը, ակնհայտ պրոադրբեջանական հայտարարություններ են տարածում։ Այդ ուժերին Արցախը պետք չէ, նրանք ուզում են մեզ ոչնչացնել։ Անկախ ամեն ինչից, մենք պետք է չխառնվենք նրանց խաղին, չկարևորենք, այսպես կոչված, միջազգային հանրության կարծիքը և քայլեր ձեռնարկենք՝ ելնելով բացառապես մեր ազգային, պետական շահերից։ Ամեն ինչ մի կողմ դնել ու անհապաղ համախմբվել է պետք։ Միջազգային հանրություն չկա, մեռել է։ «Փաստինֆո»-ի հետ զրույցում նման տեսակետ հայտնեց Արցախի նախագահի հատուկ հանձնարարությունների գծով ներկայացուցիչ Դավիթ Բաբայանը։

«Միջագային հանրության այլասերվածությունն է առիթ տալիս, որ Ադրբեջանն անի այն, ինչ ուզում է։ Սրանք դեռ ամենավտնագավոր քայլերը չեն։ Քանի դեռ ԱՄՆ Պետդեպը, ոտնահարելով ժողովրդավարական արժեքները, խայտառակ հայտարարություն է տարածում, այսպես կոչված, «համաներման» մասին, Բորելը կանաչ լույս է վառում Ադրբեջանի համար ու պարզ ասում, որ ոչ մի պարագայում նրա ձեռքը չեն բռնելու, այս իրավիճակը շարունակվելու է։ Ստեղծված իրավիճակում մեր առաջնահերթ անելիքը երկպառակտվածությանը վերջ տալն է։ Արցախը, Հայաստանն ու Սփյուռք պետք է համախմբվեն։ Բայց ամենից առաջ Արցախը պետք է հասկանա, թե ինչ է մտածում ՀՀ հասարակությունը․ մեր հետագա քայլերը մեծապես կախված են լինելու դրանից»,-շեշտեց Բաբայանը։

Անդրադառնալով Ստեփանակերտ-Բաքու բանակցությունների ամերիկյան պարտադրանքին՝ Բաբայանը հիշեցրեց՝ Արցախը երբեք դեմ չի եղել Ադրբեջանի հետ հավասարը հավասարի հետ բանակցելու առաջարկին, բայց խնդիրն այն է, որ Ադրբեջանը դա չի ընդունում։

«Ադրբեջանն Արցախի հարցը դիտարկում է որպես ներադրբեջանական հարց և, ցավոք, որոշները ողջունում են դա։ Մեզ համար անընդունելի է ցանկացած բանակցություն, որտեղ Արցախը կարող է դիտարկվել Ադրբեջանի մաս»,-նշեց Բաբայանը։

Մեր իրականությունը համեմատելով թուրքական աշխարհի՝ մասնավորապես Ադրբեջան-Թուրքիա հարաբերությունների հետ՝ Բաբայանը նկատում է՝ նախանձելի միասնականություն կա հակառակ կողմում։

«Թուրքիան եղբայրաբար, ծնողի պես կանգնած է Ադրբեջանի թիկունքին։ Որևէ թուրք պաշտոնյա, Միլի Մեջլիսի որևէ պատգամավոր ո՛չ անցած երեսուն տարվա մեջ, ո՛չ էլ հիմա ասած չկա, թե ոչինչ դե, Արցախը թող լինի Հայաստանի կազմում։ Նման բան չեք լսի նրանցից։ Իսկ ի՞նչ են ասում հայ որոշ պաշտոնյաներ, ամո՛թ է, ամո՛թ։ Եվրոպացի պաշտոնյաների մասին էլ չեմ խոսում․նրանք վաղուց ոչ միայն ժողովրդավարության մասին են մոռացել, այլև հեռացել են Աստծուց»,-ասում է Բաբայանն ու կրկին սթափության կոչ անում համայն հայությանը՝ շեշտելով, որ բացառապես ինքներս կարող ենք փոխել իրադարձությունների ընթացքը։

Աղբյուր` Փաստինֆո