Փաստ ինֆո

«Թե՛ Ալիևը, թե՛ Էրդողանը շատ լավ տեղեկացված են, թե ինչ է իրականում կատարվում Հայաստանի ներսում։ Նրանք հստակ գիտակցում են, որ Փաշինյանի դիրքերն այստեղ սարսափելի թուլացած են, նրա հեղինակությունը հավասարվել է զրոյի, հետևաբար, խիստ շահագրգռված են, և անում են ամեն ինչ, որպեսզի ձեռք գցեն ստորագրված մի թղթի կտոր, որով Արցախը, փաստացի, կճանաչվի որպես Ադրբեջանի տարածքային ամբողջականության մաս»,- «Փաստինֆո» լրատվականի հետ զրույցում ասել է «Արաբո» ջոկատի հրամանատար Մանվել Եղիազարյանը։

Հիշեցնենք, որ արհեստածին Ադրբեջանի նախագահ Իլհամ Ալիևը «խաղաղության պայմանագրի» ստորագրման վերաբերյալ հերթական նախապայմանն է առաջ քաշել։ Պակիստանի վարչապետի հետ Բաքվում տեղի ունեցած բանակցություններից հետո կայացած ասուլիսի ժամանակ հայտարարել է, թե Հայաստանը պետք է թղթի վրա ամրագրի, որ Ղարաբաղն Ադրբեջան է. «Հայաստանի հետ խաղաղության պայմանագիրը ստորագրելու հեռանկարներ կան։ Սակայն, դա անելու համար Հայաստանը պետք է քաղաքական կամք դրսևորի»,- մասնավորապես ասել է Ալիևը։

Եղիազարյանը նկատում է՝ ևս 2-3 ամիս և Փաշինյանը, հնարավոր է, այլևս երկրի ղեկավարի պաշտոնում չլինի. «Հետևաբար, թուրք – ադրբեջանական դավադիր տանդեմը սարսափելի շտապողական տրամադրությունների մեջ է հայտնվել։ Սակայն, այստեղ ուզում եմ շեշտել՝ միայն թշնամին չէ, որ շտապում է։ Շտապում ենք նաև մենք։ Ինչ վերաբերում է, այսպես կոչված, Խաղաղության պայմանագրի ստորագրմանը, ապա՝ ստորագրվի այն, թե՝ ոչ, մենք պետք է դա չճանաչենք։ Դա մեզ համար առ ոչինչ պետք է լինի, որովհետև հոգեկան հիվանդի կողմից ստորագրված որևէ փաստաթուղթ, այն էլ՝ միջպետական մակարդակի, չի կարող վավեր ճանաչվել։ Նա իրավունք չունի խոսելու իմ կամ մեր անունից։ Արցախը մեր Հայրենիքին է, և որևէ մեկը չի կարող միանձնյա բախտորոշ որոշումներ կայացնել, հատկապես, եթե այդ մեկը անհավասարակշիռ հոգեկան կերտվածքով հայտնի Փաշինյանն է»,- ասում է հրամանատարը։

Այնուամենայնիվ, այդ փաստաթղթի ստորագրումը պետք է խափանվի, ասում է բանախոսն ու հավելում՝ Սևրի պայմանագիրն էլ, ժամանակին, ստորագրվել է, ուրեմն՝ ինչո՞ւ մեզ չեն վերադրաձնում Վիլսոնի նկարագրած սահմաններով Հայաստանը։

Հարցին՝ ինչպե՞ս և ի՞նչ մեթոդներով կարելի է խափանել, այսպես կոչված, Խաղաղության պայմանագրի ստորագրումը, Մանվել Եղիազարյանը պատասխանում է՝ բոլորին պետք է տներից հանել դուրս, բոլորին պետք է հայտարարել, որ Հայաստանը վաճառվում է.«Մենք պարտավոր էինք ազգովի փողոցներում քնել, մենք պետք է մոռանայինք տուն վերադարձնող ճանապարհը, որովհետև մեր դարավոր թշնամին մեզ անհայրենիք դարձնելու դավադիր ծրագրին է անցել։ Իշխանությունները պետք է գիտակցեն, որ այդ փաստաթուղթը ստորագրելուց հետո, իրենց կյանքում ամեն ինչ հարթ չի անցնելու, իսկ հասարակությունն, իր հերթին, պետք է գիտակցեր, որ այդ փաստաթղթով ստորգրվում է նաև հայ ժողովրդի մահախոսականը։ Ահա, սրանք են այս պահին մեր առջև ծառացած խնդիրները, որ չեն գիտակցում ո՛չ իշխանությունները, ո՛չ հասարակությունը և սա ողբերգություն է»։

Անդրադառնալով Թուրքիայի նախագահ Էրդողանի՝ Բաքվում կատարած հայտարարությանը, թե իրենք պատրաստվում են Շուշիում թուրքական հյուպատոսություն բացել, Մանվել Եղիազարյանը նկատում է՝ սա հետևանք է այն բարձիթողի վիճակի, որում մեր ամենաթողությամբ հայտնվել են Արցախն ու ինքնիշխան Հայաստանը. «90 ական թվականներին էլ, մեր շուրջ նույն այս իրավիճակն էր հասունացել՝ Ռուսաստանի գլուխը խառն էր, նոր -նոր փլուզված ԽՍՀՄ-ից հետո նրա վիճակը կայուն չէր, ադրբեջանցիներն, ինչպես այսօր, լկտիացել էին, հիշենք Սումգայիթի և նմանօրինակ այլ դրվագներ, բայց նրանց մի լավ ջարդ տալուց հետո՝ խելքներն, անմիջապես, գլուխները հավաքեցին։ Եվ, քանի որ նրանք այսօր՝ շնորհիվ ՀՀ ապաշնորհ իշխանությունների վարած դավաճանական քաղաքականության, նույն պարարտ հողի վրա են հայտնվել, բնական է, որ շտապում են՝ ինչքան հնարավոր է ճանկռելով պոկեն – տանեն մեզանից։ Մենք պարտավոր ենք պայքարել Արցախի հայապահպանության համար՝ մինչև մեր արյան վերջին կաթիլը, այստեղ այլ տարբերակ լինել չի կարող, բացառված է, քանզի միայն Արցախով չեն ավարտվելու հայ ժողովրդի և մեր պետականության լինելիության խնդիրները»,- ասում է բանախոսը։

Հարցին՝ երբ Թուրքիայի նախագահը հայտարարում է, թե Շուշիում պատրաստվում է թուրքական հյուպատոսարան բացել, արդյո՞ք սրանով չի ակնարկում՝ թե այն հետ բերել ցանկացողները ստիպված են լինելու պայքարել ոչ միայն Արդրբեջանի, այլ նաև՝ թուրքական բանակի դեմ, «Արաբո» ջոկատի հրամանատարը պատասխանում է՝Թուրքիան իրավունք չունի Շուշիում պատերազմ մղել մեր դեմ.«Եթե մենք կարգին իշխանություններ ունենայինք, նաև հավատարիմ ռազմական դաշնակիցներ կլինեին մեր կողքին։ Պետք լիներ՝ Հնդկաստանը կլիներ, Չինաստանը, Պարսկաստանը կամ, հենց, ՌԴ-ն մեզ թիկունք կկանգնեին, որովհետև թվարկածս բոլոր պետությունները դեմ են, որպեսզի Թուրքիան այս տարածաշրջանում ընդլայնի իր դիրքերն ու ազդեցությունը։ Մյուս կողմից՝ Թուրքիան բոլորովին էլ այն երկիրը չէ, որով սարսափեցնում են հայ ժողովրդին։ Այդ երկիրն ամբողջությամբ միֆ է։ Նրանք, անգամ, չկարողացան քրդերի դեմ կռիվ տան, մոռացե՞լ եք, թե 6-7 ամիս առաջ մռութները ոնց ջարդեցին։ Նրանք միայն խոսում են և, այն էլ, մեկ նպատակով՝ որպեսզի մեր մեջ վախ ու խուճապ մտնի, որ մենք ինքներս մեզ ներսից թուլացնենք մեր վախերով։ Սա վատ չէ, որովհետև թույլերը սրանից թուլանալու են, իսկ ուժեղներն ավելի ուժեղ են դառնալու, այնպես որ՝ վախենալու ոչինչ չկա»,- ասում է հրամանատարը։

Խոսելով հատկապես վերջին օրերին ադրբեջանական Զինուժի կողմից ՀՀ սահմաններին, պարբերաբար, իրականացվող ռազմական սադրանքների մասին՝ Մանվել Եղիազարյանն ասում է՝ անգամ այս իրավիճակում Ադրբեջանը մեզ ոչինչ չի կարող անել, նրան չի հաջողվի մեզ ընկճել։ Սա, նույնպես, թուրքական քաղաքականություն է՝ խուճապ հրահրել։ Փոխարենն, ըստ Եղիազարյանի, պետք է շարունակել ամուր կանգնած մնալ մեր դիրքերի վրա և պատրստ լինել՝ ցանկացած ռազմական սադրանքի, այդ ընթացքում, սակայն, չմոռանալով օր առաջ իշխանության ղեկից հեռացնել կամազուրկ և դավաճան օրվա իշխանութուններին, քանզի վերջին տարիների մեր բոլոր պարտությունները, ըստ հրամանատարի, կյանքի են կոչվել, հենց, նրանց կողմից վարած անողնաշար և կործանարար քաղաքականության արդյունքում։

Աղբյուր` Փաստինֆո