Փաստ ինֆո

Վազգեն Սարգսյանը Ղարաբաղը տալի՞ս էր, դրա համար սպանվեց, թե՞ կարող է՝ դուք էիք Մեղրին տալիս, դրա համար սպանվեց։ ԱԺ-ում նման հայտարարությամբ է հանդես եկել ՀՀ վարչապետ Նիկոլ Փաշինյանը՝ 2022 թվակաի պետական բյուջեի կատարման հաշվետվության քննարկմանը նվիրված եզրափակիչ ելույթում։

«Բա ո՞նց է եղել հոկտեմբերի 27-ը: Եղել է այն, որ սենց սրճարաններում, այդ թվում՝ դահլիճում ներկա որոշ մարդիկ Նաիրիհունանյանների հետ խոսելիս ասել են՝ Վազգենն ա սաղ պրոբլեմը, էս երկրի բոլոր պրոբլեմների մեղավորն ա, այ որ Վազգենը չլինի... Իրենց կադրն էր, գիտեին թույլ կողմերը, որ կետերի վրա սեղմեն: Մեկը խմբակցություններից մեկի ղեկավարն էր, մյուսը՝ ԱԱԾ տնօրենը, որի աշխատակիցը զեկուցում էր, որ այսպիսի մի մարդ կա, ասում է՝ մտնելու եմ, գնդակահարեմ խորհրդարանում: Իսկ որտե՞ղ էր Սերժ Սարգսյանը 1999-ի հոկտեմբերի 27-ին, քաղաքում չէր:

Այդ ատելությունը նույն ձեւով ինչի՞ էիք գեներացնում Վազգեն Սարգսյանի դեմ: Վազգեն Սարգսյանը Ղարաբաղը տալի՞ս էր: Կամ եթե դուք Ղարաբաղը չէիք տալիս, Մեղրին ինչի՞ պետք է տայիք, որ Ղարաբաղը վերցնեք: Դուք Մեղրին Ղարաբաղի հետ փոխանակման թեմա նույնիսկ քննարկելով, ընդունել եք, որ Ղարաբաղը Ադրբեջանինն է»,- հայտարարեց Փաշինյանը:

Նա պնդեց, թե տրենից շատ ոչ ոք Հայրենիքը չի սիրում եւ որ ՀՀ զինված ուժերի համար ոչինչ չի խնայում։

«Բանակի համար չենք խնայել ոչինչ։ Ոչինչ, մինչև այս պահն էլ եմ ասում։ Մենք վստահել ենք մեր բանակին։ Ընդ որում, իմացել ենք քաղաքական կապվածության մասին, ինչ-որ բաներ իմանալիս աչք ենք փակել։ Մենք վստահել ենք և չենք խնայել ոչինչ։ 2018 թվականից մինչև այսօր չկա մի դեպք, որ բանակում որևէ բան տեղի ունեցած չլինի այն պատճառով, որ Կառավարությունը ասի փող չկա։ Բացառված է։ Չի կարող այդպիսի բան լինել։

Գուցե դա է եղել մեր ամենամեծ սխալը, որ վստահել ենք բանակին, որովհետև հիշում եք, պատմել եմ, որ նույնիսկ պատերազմի ժամանակ նույնիսկ հարազատ մարդիկ եկել են ինձ մոտ, փորձել են ասել ինչ-որ մի բարձրաստիճան հրամանատար ինչ-որ մի բան չի անում, ես դուրս եմ հանել այդ մարդուն և ասել, որ թույլ չեմ տա, որ իմ երկրի բանակի սպայի մասին այդպիսի բան ասես։ Այսօր այդ սպան որպես մեղադրյալ անցնում է քրեական գործով»,- ընդգծել է Փաշինյանը։

Աղբյուր` Փաստինֆո