Փաստ ինֆո

Ուզում եմ ընկալեք այն, ինչ հիմա կասեմ։ ԱԺ ամբիոնից հայտարարեց Նիկոլ Փաշինյանը՝ ըստ էության վիճարկելով Արարատ սարի պատկերում ՀՀ զինանշանի վրա։

Նա մասնավորապես պատգամավորների ուշադրությունը հրավիրեց զինանշանին պատկերված խորհրդանիշներին։ Հայտարարեց, որ զինանշանն արտահայտում է մեր ժողովրդի հոգեբանությունը և որևէ ձևով կապված չէ մեր ներկա Հանրապետության հետ։

«Ի՞նչ է պատկերված այնտեղ, Նոյյան տապանը՝ Արարատ սարի վրա։ Հայաստանի 4 դինաստիաների, 4 հարստությունների զինանշանները։ Այդ զինանշանին նայելիս վերջերս ինձ մոտ հարց է ծագել։ Իսկ այդ զինանշանը 1991 թվականին հիմնադրված պետության հետ ի՞նչ կապ ունի։ Ինչի՞ մասին է։ Ընդ որում, նայելով կենտրոնին, Արարատ սարի վրա Նոյյան տապանն է։ ՀՀ այսօրվա տարածքը ջրհեղեղի տակ է։ Առյուծ, որն արդեն Հայաստանում բնական պայմաններում վաղուց չի ապրում։ Եվ այս խնդիրը, որը մենք քննարկում ենք, մեզնից յուրաքանչյուրի մեջ պատմական ու իրական Հայաստանի երկվության մասին է։ Իրական Հայաստա՞նը պետք է ծառայի պատմական Հայաստանին, թե՞ պատմական Հայաստանը պետք է ծառայի իրական Հայաստանին։ Սա է այն պատմական ու դարակազմիկ հարցը, որի պատասխանը մենք պիտի տանք»,- ասաց նա։

Փաշինյանն իր խոսքում նշեց, որ պատմական Հայաստանի 12 մայրաքաղաքներից 6-ը գտնվում են ներկա Հայաստանի տարածքում։

«Իսկ այդ մայրաքաղաքներում ե՞րբ եք եղել։ Տեսե՞լ եք դրանց վիճակը, գնահատե՞լ եք՝ ինչ վիճակում են։ Բա այդքան ավանդույթներից ենք խոսում, արժեքներից ենք խոսում։ Մեր մայրաքաղաքները, մեր պատմական սիմվոլներն այսօր ավերակների տակ են։ Կներեք, սա էլ ասելու բան չէ, Հայաստանից դուրս գտնվող որոշ մայրաքաղաքներ կարող է պարզվի, որ ավելի լավ վիճակում են, քան ՀՀ տարածքում գտնվողները։ Սա ինչի՞ մասին է վկայում։ Մենք մտածե՞լ ենք սրա մասին։ Մտածե՞լ ենք՝ էս պատկերն այսօր Հայաստանում ամեն ընտանիքի, ամեն երեխայի, ամեոն ծնողի, ամեն հոր, ամեն մոր հետ ինչպես է առնչվում և ինչ է ասում ապագայի մասին»,- ասաց նա։

Այս համատեքստում, Փաշինյանն անդրադարձավ «Հայաստան» խմբակցության պատգամավոր Գեղամ Մանուկյանի հայտարարությանը, որ կադաստրի թուղթն առկա է, ինչո՞ւ եք փնտրում՝ Փաշինյանն ասաց, որ եթե մենք հայտարարենք, որ սա մեր կադաստրի թուղթն է, ապա իր խոսքով, կնշանակի, որ մենք կհայտարարենք «ոչնչացրեք մեզ»։ Նա հայտարարեց, որ որևէ մեկն իրենից ավելի հայրենասեր չի կարող լինել։
«Ես կարող է շատ ճոռոմ բան ասեմ, բայց չեմ կարող պատկերացնել մի մարդ, կներեք, ամենայն հարգանքով բոլորիդ հանդեպ, որը կարող է իմ հայրենիքն ինձնից շատ սիրի։ Չի կարող այդպիսի բան լինել, բացառված է։ Որովհետև, եթե ես մտածեմ, որ որևէ մեկն ինձնից շատ է սիրում իմ հայրենիքը, դա նշանակում է, որ ես չեմ սիրում իմ հայրենիքը։ Այդպես պետք է մտածեք յուրաքանչյուրը»,- ասաց նա։

Աղբյուր` Փաստինֆո