Փաստ ինֆո

Որքան էլ քաղաքացիները դժգոհ են պարեկային ծառայության ոչ պրոֆեսիոնալությունից, այնուհանդերձ, սեփական պարեկային ծառայությունից գոհ իշխանությունն արդեն անցել է ոստիկանական ողջ համակարգի «բարեփոխմանը», որը քպ-ի պարագայում համակարգի ամբողջական քպացում է նշանակում։ Ներքին գործերի նախարարության «մոնստրացմանը» զուգահեռ այսօր ԱԺ-ում ներկայացվում էր այս ոլորտում առաջիկայում կիրականացվելիք կադրային բարեփոխումների քաղաքականությունը։

Միայն թե հարց է, թե որքանով այն կարող է լինել բարեփոխում, քանի որ բոլորի աչքի առաջ է եղել քպականների իրականացրած դատական և դատախազական ոլորտի «բարեփոխումները»։

Իսկ վերջին տարիներին ոստիկանությունում՝ օպերատիվ գործողությունների հիմքում առավելաբար իշխող է եղել քպական առաջնորդի սիրած ոճը՝ ազդանշաններ, լուսարձակներ, արագություն, պարտադիր՝ կարմիր լույսի տակով անցնելու բացառիկության շեշտում, ծեծ ու ջարդ, յուրայինների նկատմամբ՝ ամենաթողություն։

Մեկ փաստ ևս․ ամեն անգամ մեր քաղաքացիները /օտարները՝ ևս/ աժիոտաժի և ցուցադրանքի չտեսաագույն դրսևորման ականատեսն են լինում, երբ պատահաբար բախվում են «ա» կետից «բ» կետ փաշինյանական «կորտեժի» շարժին։

Գանք ոստիկանությունում ծառայությանը և այս համատեքստում՝ կադրային բարերփոխումներին, որի գաղափարաբանության ներկայացումը ԱԺ-ում, մի շարք հարցեր է ծնում։ Ընդ որում, ոստիկանության ստորաբաժանումների փոփոխությունները թողնելով մասնագետներին, անդրադառնանք կադրային «բարեփոխումներին»։

Ի դեպ, նման բարեփոխումների գործընթաց այսօր այլ գերատեսչություններում ևս ընթանում են։ Եվ անհասկանալի է, թե ինչու քրեական ոստիկանության կադրային բանկը համալրելու գործընթացը պարզորոշ դարձնելու համար բերում են պարեկների օրինակը, մոռանալով, որ պարեկային ծառայությունը համալրվեց առնվազն միջնակարգ կրթություն ունեցողներով, միջակություններով, որոնց տրվեց իշխանություն ու այն բանեցնելու լայն լիազորություն՝ իր ամենավատ դրսեւորումներով։ Մեկ այլ բան է քրեական ոստիկանությունը, որտեղ պարտադիր պիտի լինի մասնագիտական բազային գիտելիքը։ Բայց եկեք տեսեք, որ այս դեպքում իշխանությունն առաջնորդվում է «բակալավրի դիպլոմ» ունենալու պարտադիր պայմանով։ Նկատենք, որ ներկա իշխանության ժամանակ էր նաև, որ իրավաբանական կրթությունը որոշեցին սկսել մագիստրատուրայից՝ այդպիսով համալրելով թափուր պաշտոններն՝ իրանց ուզած կադրերով։ Հիմա՝ հերթը ոստիկանությանն է։ Այնպես որ, չզարմանաք, եթե պատմաբանի ու կենսաբանի, ժուռնալիստի և երկրաբանի, քիմիկոսի մասնագիտություն ստացածը 5-ամսյա դասընթաց անցնելով՝ որոշի ոստիկանության համակարգ մտնել։ Ի դեպ, դժվար է ասել, այս էքսպերիմենտը որքանո՞վ կնպաստի բարեկիրթ և պրոֆեսիոնալ ոստիկաններ ունենալուն, քանի որ քպականների համար կարևորը «թիմին հավատարմության երդում տալն է»։

Հետաքրքիր է՝ Ոստիկանական ակադեմիայու՞մ էին կրթություն ստացել բաժանմունքներից մեկում «քաղաքացուն ձեռնաշղթաներ հագցնող, նրան ծեծող, ծխախոտը քթին հանգցնող, բազմաթիվ վնասվածքներ պատճառած ոստիկանները։ Այս ոստիկանները բարեվարքության քննություն չէի՞ն հանձնել։

Թե այս կարգի սադիստ-ոստիկանները հատկապես մայրաքաղաքում՝ Երևանի ավագանու ընտրություններին ընդառաջ պետք են, ի վերջո, քպականները գիտակցում են, որ չունեն վարկանիշ ու հույսները հանցավոր տարրերն են, որոնց նկատմամբ հսկողություն սահմանելու համար պետք է ձեւավորել վախի մթնոլորտ։

Աղբյուր` Փաստինֆո