Փաստ ինֆո

Հանրային քննարկման է ներկայացվել Արմավիրի թիվ 4 ավագ դպրոցը Արմավիրի Ռ. Եղոյանի անվան թիվ 1 ավագ դպրոցին միացման ձևով վերակազմակերպելու ՀՀ կառավարության որոշման նախագիծը: Այս մասին հայտնում են ԿԳՄՍՆ-ից։

«Գործընթացի վերաբերյալ պարզաբանումները ներկայացնելու նպատակով ՀՀ ԿԳՄՍ նախարարի տեղակալ Արաքսիա Սվաջյանն այսօր այցելել է Արմավիրի թիվ 4 ավագ դպրոց:

Նրան ուղեկցել են ԿԳՄՍՆ հանրակրթության վարչության հանրակրթության և արտադպրոցական հաստատությունների համակարգման բաժնի պետ Ստալ Սարդարյանը և ՀՀ Արմավիրի մարզպետարանի կրթության, մշակույթի և սպորտի վարչության պետ Սոնյա Բուդաղյանը:

ԿԳՄՍ նախարարի տեղակալը նախ հանդիպել է դպրոցի ուսուցչական կազմի հետ, այնուհետև դպրոցի աշակերտական խորհրդի անդամներին, ներկայացրել պետական քաղաքականությունը, գործընթացի մանրամասները, նպատակը և դրդապատճառները, ինչպես նաև պատասխանել մանկավարժներին և աշակերտներին հուզող հարցերին:

Արաքսիա Սվաջյանը նախ անդրադարձել է Կառավարության բարեփոխումների ընդհանուր ծրագրին, ինչի համատեքստում իրականացվում են նաև դպրոցների միավորումներ:

Փոխնախարարն ընդգծել է, որ դպրոցների միավորման գործընթացն իրականացվում է հանրապետության տարբեր մարզերում և Երևանում, որը պայմանավորված է 1400 դպրոցների մեծ մասի թերբեռնված աշխատանքով և ոչ բարենպաստ շենքային պայմաններով:

«Ինչպես գիտեք, իրականացվում է հանրակրթության նոր չափորոշչի ներդրման գործընթացը, և այժմ բարեփոխումների ակտիվ փուլում ենք, որն ուղղված է կրթության որակի բարձրացմանը, ուսուցիչների կարողությունների և դպրոցների ենթակառուցվածքների զարգացմանը: Եթե ցանկանում ենք ունենալ որակյալ կրթություն, ապա պետք է ունենանք նաև պատշաճ պայմաններ, որպեսզի ուսուցիչը և աշակերտը հնարավորություն ունենան լաբորատոր փորձեր անելու և հագեցած գրադարանից օգտվելու»,- ասել է Արաքսիա Սվաջյանը:

Նախարարի տեղակալն անդրադարձել է Կառավարության «300 դպրոց, 500 մանկապարտեզ» ծրագրին, որն ընդգրկում է թե՛ գյուղական, թե՛ քաղաքային դպրոցները: Նրա տեղեկացմամբ՝ Կառավարության որոշմամբ արդեն իսկ հաստատվել է մարզային դպրոցների ցանկը, որը ներառվելու է ծրագրում:

«Մեր դպրոցները հիմնականում կառուցվել են 1960-70-ական թթ. և լուրջ ներդրումների կարիք ունեն: Բնականաբար, հնարավոր չէ 1400 դպրոց միանգամից վերակառուցել, և զուգահեռ իրականացվում է 3-րդ գործընթացը: Այն դպրոցները, որոնք այս փուլում չեն ընդգրկվել «300 դպրոց, 500 մանկապարտեզ» ծրագրում և թերբեռնված են, խնդրահարույց են արդյունավետ գործունեության տեսանկյունից։

Փորձում ենք միավորել և ստանալ ավելի մեծ, ուժեղ ու ամբողջական, պատշաճ ենթակառուցվածքներով դպրոցներ՝ դիտարկելով դրանց բարելավումը պետական աջակցության ծրագրերի շրջանակում,- ասել է ԿԳՄՍ նախարարի տեղակալ Արաքսիա Սվաջյանը և հավելել,- այս համատեքստում ուսումնասիրության արդյունքում պարզ է դարձել, որ ավագ դպրոցները ևս շատ թերբեռնված են: Փորձել ենք հասկանալ, թե ինչպես կարող ենք արդյունավետ կազմակերպել դրանց գործունեությունը՝ տալով համարժեք լուծումներ»:

Արմավիրի թիվ 4 ավագ դպրոցի մանկավարժների և աշակերտների հարցերն ու մտահոգությունները հիմնականում վերաբերել են միավորման արդյունքում մանկավարժական հաստիքների հնարավոր կրճատմանը, նոր միջավայրում աշակերտների ինտեգրմանը և այլն:

Արմավիրի թիվ 4 ավագ և Արմավիրի Ռ. Եղոյանի անվան թիվ 1 ավագ դպրոցների միավորումը, ըստ ԿԳՄՍ նախարարի տեղակալի, բխում է նաև այն հանգամանքից, որ դպրոցներն ամբողջական ծանրաբեռնվածությամբ չեն աշխատում։ Արմավիրի թիվ 1 ավագ դպրոցում սովորում է 287 աշակերտ, սակայն դպրոցն ունի 1000 աշակերտ տեղավորելու հնարավորություն։ Արմավիրի թիվ 4 դպրոցում սովորում է 244 աշակերտ, որն ունի 680 աշակերտ տեղավորելու հնարավորություն։

Արմավիրի թիվ 1 դպրոցի շենքային պայմաններն անհամեմատ ավելի լավն են, ինչը ուսուցիչներին և աշակերտներին պատշաճ պայմաններում ուսումնառությունը կազմակերպելու լայն հնարավորություն կտա: Փոխնախարարը շեշտել է, որ միավորման արդյունքում կարևորվելու է մասնագիտական ներուժը լավագույնս օգտագործելու խնդիրը՝ հաշվի առնելով նաև այն հանգամանքը, որ հանրապետության բազմաթիվ դպրոցներում մանկավարժների կարիք կա»։

Աղբյուր` Փաստինֆո