Փաստ ինֆո

Ադրբեջանը քայլ առ քայլ գնում է Արցախն Ադրբեջանին բռնակցելու ճանապարհով, ինչին, ցավոք, որևէ հակազդեցություն հայկական կողմից՝ թե ՀՀ, թե Արցախի, չկա։ Արցախի իշխանությունները չնե կարողանում վճռականություն ու կամք դրսևորել և չկատարել ադրբեջանական պահանջները։ Այսպես շարունակվելու դեպքում՝ կարճ ժամանակ անց, Ալիև- Փաշինյան ծրագիրը՝ Արցախը հայաթափելու և Ադրբեջանին բռնակցելու վերաբերյալ, կյանքի է կոչվելու։ Այդ մասին «Փաստինֆո»-ի հետ զրույցում ասաց Արցախի ԱԺ «Արդարություն» խմբակցության ղեկավար Դավիթ Գալստյանը։

«Ժողովրդին շատ ավելի հիասթափեցնում է սեփական իշխանությունների գործելաոճը, քան թշնամու ցանկացած սադրանք։ Երբ հունվարին տարբեր բնակավայրերում հանդիպումներ էինք ունենում, մարդիկ այնքան ոգևորված էին ու ողջունում էին, որ իշխանությունն ու ընդդիմությունը միակամ որոշել են չտրվել ադրբեջանական սադրանքներն և թշնամու որևէ պահանջ չկատարել։ Հիմա գործնականում տեսնում ենք, որ Արցախի իշխանությունները չկարողացան հետևողական լինել և ժողովրդի կամքն առաջ տանել։ Եթե այսպես մի քիչ էլ շարունակվեց, ապա, ըստ իս, ժողովուրդը ոտքի է կանգնելու ու պահանջելու է իշխանություններից՝ կա՛մ կատարել իր կամքը, կա՛մ հեռանալ։
Արցախի ԱԺ պատգամավորը կրկին սթափության կոչ անելով հայությանը՝ շեշտում է՝ իրավիճակից դւորս գալու ելքեր միշտ էլ կան, խնդիրը վճռականություն դրսևորելն ու բացառապես ազգային-պետական շահերով առաջնորդվելն է և ոչ թե իշխանությունը պահելու համար կռիվ տալը։
Հասարակության ճնշման տակ Արցախում իշխանափոխության հնարավորությունը չբացառելով՝ պատգամավորը նկատում է՝ եթե իրավական դաշտ գանք, ապա Սահմանադրության բազմաթիվ դրույթներ տևական ժամանակ է՝ խախտված են․ իշխանությունը չի կարողանում սեփական ժողովրդի առջև ստանձնած պարտավորությունները կատարել։

Անընդունելի համարելով ներկա իրավիճակում պոպուլիզմով երկիր կառավարելու ու իշխանությւոն պահելու գործելաոճը՝ Գալստյանը նշում է՝ ռեալ լուծումներ պետք է տալ օրեցօր ավելացող խնդիրներին, ձեռք բերել ժողովրդի վստահությունն ու համախմբել նրան՝ մարտահրավերներին դիմակայելու համար։

Պատգամավորը ցավով նկատում է՝ զգալիորեն մեր դիրքերը զիջում ենք նաև տեղեկատվական դաշտում։

«Ինչպես 44-օրյա պատերազմի ժամանակ, այնպես էլ հիմա Ադրբեջանը նպատակաուղղված ապատեղեկատվություն է տարածում, մանիպուլացնում միջազգային հանրությանը, խաբում, թե, իբր, Լաչինի միջանցքը բաց է։ Միևնույն ժամանակ, հայկական մեդիադաշտը՝ առանձնապես արցախյանը, փոխանակ ցույց տա իրական պատկերը, փաստերով ապացուցի, որ Ադրբեջանը խաբում է, կենտրոնացած է իշխանության քյալերն արդարացնելու վրա․ ուզում են ցույց տալ, թե, իբր, իշխանությունների քայլերը համահունչ են ստեղծված վիճակին։ Պետական քարոզչությունը հիմա հստակ ուղղվածություն պետք է ունենար՝ արտաքին լսարանի համար բացահայտեր ադրբեջանական կեղծիքը»,-ասում է պատգամավորն ու հավելում, որ ադեկվատ քայլերի բացակայությունից տպավորություն է ստեղծվում, թե հայկական ու ադրբեջանական իշխանությունները համահունչ են գործում։

Աղբյուր` Փաստինֆո