Փաստ ինֆո

Հայ-ադրբեջանական բանակցություններից առաջ և հետո Ադրբեջանը կրկին փորձում է գետնի վրա ավելի ագրեսիվ վարքագիծ դրսևորել՝ նպատակ ունենալով ավելին ստանալ բանակցությունների սեղանի շուրջ։ Այս մասին ԱԺ-ում լրագրողների հետ ճեպազրույցում ասաց ԱԺ արտաքին հարաբերությունների մշտական հանձնաժողովի նախագահ Սարգիս Խանդանյանը՝ անդրադառնալով վերջին շրջանում Ադրբեջանի կողմից սահմանային գոտում լարվածության հրահրմանը։

Այս առումով՝ ըստ Խանդանանի, երեկվա միջադեպը հատկանշական էր այն առումով, որ թիրախավորվել էին քաղաքացիական օբյեկտներ, որտեղ նաև ամերիկյան պրոյեկտներ կան ու շատ կարևոր են ՀՀ-ի համար։

Թշնամին Հայաստանի հետ սահմանին լարվածություն է հրահրում՝ չնայած ԵՄ քաղաքացիական առաքելության ներկայությանը, ըստ Խանդանյանի, ԵՄ քաղաքացիական առաքելությունն արձանագրած իրադարձությունների զեկույցները ներկայացնում է ոչ թե ՀՀ կառավարությանը, այլ Եվրոպական հանձնաժողովին ու անդամ երկրներին։ Նա ենթադրություն հայտնեց, որ երեկվա Երասխի միջադեպի առումով ևս եղել է դիտարկում։

«Եզրահանգումս այն, որ ագրեսիան զսպելու լավագույն ճանապարհը խաղաղության ուղղությամբ շարժվելն է։ Հայաստանի կառավարությունը, կարծում եմ, որ արդեն արել է առավելագույնը՝ ցույց տալու իր հանձնառությունն ու նվիրվածությունը՝ այս գործընթացի մասով։ Սա ակնհայտ է նաև մեր միջազգային գործընկերների համար։ Մեր կոչն ու նաև մեր պահանջն է մեր միջազգային գործընկերներից, որպեսզի զսպեն ադրբեջանին և բերեն կառուցողական միջավայրի շրջանակ»,- ասաց նա։

Անդրադառնալով ադրբեջանական կողմի այս ագրեսիայի դրդապատճառներին՝ Խանդանյանն ասաց, որ հստակ չի կարող ասել, թե պատճառը գործարանի աշխատանքի խափանումն է, թե խաղաղության գործընթացի վիժեցումը։ Նա ենթադրություն հայտնեց, որ հաշվի առնելով բնապահպանական հայտարարությունները՝ ադրբեջանական կողմը փորձել է ցույց տալ իր դժգոհությունն այդպիսի նախագծերի մասով։ Այդուհանդերձ, Խանդանյանը հայտարարեց, որ չի տեսնում բանակցային գործընթացի հետաձգելու անհրաժեշտություն։

«Ընդհակառակը, պետք է շարունակել պահպանել բանակցային գործընթացի դինամիկան։ Ես հույս ունեմ, որ Վաշինգտոնյան բանակցություններն այս ամսվա ընթացքում կամ հնարավորինս մոտ ապագայում, ի վերջո, կկազմակերպվեն։ Մյուս հանդիպումը ևս, գիտեք, որ երկրների ղեկավարների մակարդակում նար հուլիսին է հանդիպում նախապատրաստվում Բրյուսելում»,- ասաց նա։

Անդրադառնալով հարցին, թե կարո՞ղ են ուժի գործադրման միջոցով ճնշում գործադրելու փորձերը որևէ ձևով անդրադառնալ բանակցային գործընթացի վրա՝ Խանդանյանն ասաց, որ Հայաստանին վերաբերող հարցերում մեր երկրի կառավարության դիրքորոշումը հստակ է։ Իր խոսքով՝ որևէ իրավիճակ չի կարող փոխել այն։

Աղբյուր` Փաստինֆո