Փաստ ինֆո

Մինչ Հայաստանում խոսում են ապագայի մասին՝ նկատի ունենալով տարածքներ զիջելու դիմաց «խաղաղության» հասնելը, Ադրբեջանը հետևողականորեն Հայաստանից ու Արցախից ռեսուրսներ է պոկում, օկուպացված տարածքներում փոխում գետերի հունը, որպեսզի ջրային ռեսուրսից ևս զրկի Հայաստանի ու Արցախի բնակչությանը։ Այդ մասին «Փաստինֆո»-ի հետ զրույցում ասում է քաղաքագետ, տնտեսագետ Հրանտ Միքայելյանը՝ մեկնաբանելով Ադրբեջանի՝ ՀՀ-ի ու Արցախի տնտեսությանը հարվածելու ակնհայտ գործելաոճը։

«Հասկանալի է, որ Ադրբեջանի նավթն ու գազն անսպառ չեն, և այս ընթացքում մեզնից ռեսուրսներ կորզելով՝ այդ երկիրը ռեսուրսներ է կուտակում հետագայի համար։ Բացի դրանից, մեր այն ռեսուրսները, որոնք թիրախավորել է Ադրբեջանը, ներկա պահին թեկուզ առանձնակի կարևորություն չունեն այդ երկրի համար, կարելի է ասել՝ ինքնանպատակ է, միևնույն է՝ փորձում են կորզել մեզնից, որպեսզի վնաս հասցնեն մեր երկրին։ Սա բացասական գումարով խաղ է։ Ադրբեջանի քաղաքականությունը թե՛ քաղաքական, թե՛ էթնիկ առումով հիմնված է հակահայկականության վրա։ Նրանք ռազմավարական նպատակ են սահմանել՝ վերացնել հայկական պետությունը։ Ըստ այդմ՝ Հայաստանի տնտեսությանը հասցվող վնասը երկարատև կտրվածքով հենց այդ նպատակին է ծառայում»,-շեշտում է Միքայելյանը և հավելում՝ եթե ՀՀ-ում կան որոշակի սպասելիքներ, այսպես կոչված, «խաղաղության պայմանագրի» հետ կապված, ապա Ադրբեջանում ոչ թե խաղաղություն են ուզում, այլ՝ հաղթանակ։

Քաղաքագետի գնահատմամբ՝ ուժային ճանապարհով խնդիրները լուծելու Ադրբեջանի միտումը նկատելի է դեռևս 1988 թվականից, բայց առավել ակնհայտ դրսևորվել է 2001, 2011 և 2020 թվականներին։

«2001 և 2011թթ․ Քի Վեսթի ու Կազանի բանակցությունների տապալումից հետո պարզ երևաց Ադրբեջանի բռնած ուղին, իսկ ամենապարզունակ մտածողի համար դա ակնհայտ դարձավ 2020թ․-ի ադրբեջանական ռազմական ագրեսիայից հետո։ Հիմա Ադրբեջանը փորձում է արագ լուծել Արցախի ու Սյունիքի «հարցերը»։ Դա պարզ երևում է Արցախից ու Հայաստանից օկուպացված տարածքներում կառուցվող ենթակառուցվածքներից՝ ռազմական հոսպիտալներ, ճանապարհներ, թունելներ, զորամասեր և այլն»,-նշում է Միքայելյանը։

Մեկնաբանելով ԱՄՆ Պետդեպի՝ այսօր տարածած հաղորդագրությունը, որով արգելում էր իր քաղաքացիներին այցելել Արցախ, Սյունիք ու Գեղարքունիքի, Տավուշի և Վայոց ձորի որոշ հատվածներ, քաղաքագետը նկատում է՝ ռազմական գործողությունների վերսկսման վտանգ է տեսնում նաև ԱՄՆ-ն։

«Թեկուզ Պետդեպը նման բովանդակությամբ հաղորդագրությունը բացատրել է զբոսաշրջային սեզոնի բացմամբ, բայց, իմ համոզմամբ, ուղղակի ԱՄՆ-ն, հաշվի առնելով Հայաստանի նկատմամբ ունեցած Ադրբեջանի նկրտումները, ՀՀ-ի վրա ադրբեջանական հարձակման լուրջ վտանգ է տեսնում։ Այլապես ոչ թե այսօր, այլ հունիսի 1-ին՝ սեզոնի սկզբին կամ, ասենք, 31-ին կտարածվեր այդ հաղորդագրությունը։ Ուշադրություն դարձրեք, որ հաղորդագրության մեջ արգելված է այցելել այն տարածքները, որոնք Ադրբեջանը հայտարարել է, իբր «Գյոլչա-Զանգեզուրի հանրապետություն»»,-նշում է քաղաքագետը։

Նախօրեին օկուպացված Շուշիում Էդողանի արած՝ այնտեղ հյուպատոսություն բացելու Թուրքիայի պատրաստակամության մասին հայտարարությունը, Միքայելյանի խոսքով, դարձյալ հեռահար նպատակ ունի։

«Ցանկացած հյուպատոսություն նշանակում է որոշակի դիվանագիտական աջակցություն։ Եթե դիցուք, ՀՀ-ում իշխանափոխություն լինի, ռազմական առումով վերականգնվենք ու փորձենք ազատագրել Շուշին, ապա Թուրքիան օգտագործելու է այնտեղ հյուպատոսություն ունենալու փաստը և Հայաստանի վրա հարձակման փորձ է անելու»,-ասում է Միքայելյանն ու հավելում՝ ներկա փուլում օկուպացված Շուշիում թուրքական հյուպատոսություն բացելու մտադրությունն այնտեղ ադրբեջանական վերահսկողությունն ընդգծելու համար է նաև արվում և, դա, այսպես կոչված, «Շուշիի հռչակագրի», հայ-թուրքական համատեղ խաղերի շարքից է։

Աղբյուր` Փաստինֆո