Փաստ ինֆո

Ոչ միայն խաղաղության պայմանագրի շուրջ, այլև բոլոր հնարավոր ուղղություններով ընթացող բանակցություններին զուգահեռ, Ադրբեջանը մշտապես փորձում է ուժի գործադրմամբ փոխել, խաթարել բանակցությունների ընթացքը և ՀՀ-ին պարտադրել միայն իր համար ցանկալի լուծումները։

ԱԺ-ում Կառավարության հետ հարցուպատասխանի ժամանակ այս մասին ասաց ՀՀ արտգործնախարար Արարատ Միրզոյանը՝ անդրադառնալով ՔՊ-ական պատգամավոր Սերգեյ Բագրատյանի դիտարկմանը, որ անհասկանալի է, թե խաղաղության գնալիս ինչու պետք է Երասխում Ադրբեջանը կրակի հայկական դիրքերի ուղղությամբ։ Բագրատյանը նաև հայտարարել էր, որ տեղի ունեցող իրադարձությունները պետք է արժանանան միջազգային հանրության գնահատականին։

«Սա առաջին դրսևորումը չէ, վստահ եմ՝ նաև վերջին դրսևորումը չէ։ Այլ հարց է, որ և՛ մենք, և՛ միջազգային հանրությունը պետք է այսպիսի վարքագծի նկատմամբ շատ կտրուկ դիրքավորվի։ Կա՛մ մենք բանակցում ենք բարի կամքով, ինչպես ընդունված է ասել, գտնելու փոխադարձաբար ընդունելի լուծումներ, կա՛մ, եթե ուժի գործադրմամբ է, ապա այսպիսի քաղաքականությունը մեզ համար առնվազն անընդունելի է։ Հուսով ենք, որ դա անընդունելի է նաև միջազգային հանրության համար»,- ասաց նա։

Արարատ Միրզոյանը հատուկ շեշտեց, որ այս ու նախորդ մի շարք դեպքերում խոսքը վերաբերում է Հայաստանի Հանրապետության միջազգայնորեն ճանաչված սահմաններին։ Իր խոսքով՝ այդ սահմանները պետք է մնան անխախտելի։ Պետք է վերականգնվի Հայաստանի Հանրապետության տարածքային ամբողջականությունը և միջազգային հանրությունը պետք է իր դերակատարությունն ունենա այս գործում։

«Կոնկրետ Երասխի դեպքի պարագայում, իհարկե, նոր մի նրբերանգ էլ կա։ Գիտեք, նախապես հայտարարվել էր, որ այնտեղ մետալուրգիական գործարան է կառուցվում։ Նախնական գնահատականներով, այս գործարանը գործունեության ընթացքում էականորեն նպաստելու է ՀՀ տնտեսական զարգացմանը։ Եվ ահա, Ադրբեջանական կողմը կեղծ, շինծու բնապահպանական մեղադրանքներով հանդես եկավ։ Մինչդեռ մենք մեր բոլոր միջազգային պարտավորությունները, այդ թվում նաև բնապահպանական կոնտեքստում ունեցած, կատարում ենք։ Դա փաստ է նաև այս գործարանի պարագայում։ Սա ուղղակի մերկապարանոց հայտարարություն չէ, այլ ստուգված ու վերստուգված»,- ասաց նա։

Այս համատեքստում Միրզոյանը հիշեցրեց ադրբեջանական կեղծ մեղադրանքների մասով հայկական կողմի հերքման փաստը։ Հայտարարեց, որ այդ մասով հետագա հավաստիացումներ կարելի է ստանալ նաև միջազգային հարթակներում առկա փաստերով։ Նրա գնահատմամբ՝ այս գործելաոճը ոչ միայն հրադադարի խախտում ու ոտնձգություն է Հայաստանի սահմանների նկատմամբ, այլև նպատակ է կեղծ մեղադրանքներով խաթարել Հայաստանի տնտեսության զարգացմանը նպաստող ծրագիրը։

«Թեև դա նաև միջազգային իրավունքն է ինքնին պահանջում, բայց բազմիցս, նաև Ադրբեջանի ղեկավարությունը, նաև միջազգային այլ դերակատարների ներկայությամբ ստանձնել է հավելյալ պարտավորություն՝ չդիմելու ուժի կիրառման։ Այդպիսի պայմանավորվածություն ձեռք է բերվել նաև ՀՀ վարչապետի հետ հերթական բանակցությունների արդյունքում։ Այդ մասին նաև հաղորդագրություն է տարածվել, որից հետո ադրբեջանական կողմից չի հնչել որևէ հերքում»,- ասաց նա։

Միրզոյանը նաև հայտնեց, որ այսօր Երասխ է այցելել ԵՄ քաղաքացիական մշտադիտարկման առաքելությունը։ Վաղը՝ ՀՀ իշխանությունների հրավերով այնտեղ կլինեն նաև ՀՀ-ում հավատարմագրված միջազգային դիվանագիտական կորպուսի ներկայացուցիչներ։

Աղբյուր` Փաստինֆո