Փաստ ինֆո

Կարծում եմ, որ այդ հարցն ինձ չէ ուղղված։ Դրանով պետք է գլխավոր դատախազությունը զբաղվի, որն իրավասու մարմինն է։ Այս մասին այսօր՝ հունիսի 14-ին, Աժ-ում հարցուպատասխանի ժամանակ ասաց Նիկոլ Փաշինյանը։ Հարցի հեղինակը քպական պատգամավոր էր, որը հայտարարեց, թե որպես թիմի անդամ անհանգստացած են ԱԺ «Հայաստան» խմբակցության պատգամավոր Աղվան Վարդանյանի հարցազրույցներից մեկում հնչեցրած մտքից առ այն, որ վարչապետի պաշտոնավարումը դադարեցնելու համար պետք է 100 քաղաքական մահապարտ, որոնք պատրաստ կլինեն մեռնել, որ երկիրն ազատեն չարիքից։ Նա նաև ասել էր, որ այդ մարդիկ պետք է ռազմական ռեժիմով գործողությունների պլանը ձեւակերպեն ու գնան մինչեւ վերջ:

«Պետք է հույս հայտնել, որ այդ մահապարտների ցանկում 44-օրյա պատերազմում դասալիքների հատուկ ստորաբաժանում կլինի՝ այդ խնդիրը լուծելու համար: Կարծում եմ՝ ադապտացիայի «ճիշտ մեթոդ» են գտել: Այսինքն ենթադրում եմ, որ այդ ուղղությամբ էլ աշխատանքներ կանեն»,- ասաց նա։

Ինչ վերաբերում է երկրում տեղի ունեցող իրավիճակին՝ Փաշինյանը հայտարարեց, որ քաղաքական ուղեգիծը օրենքի գերակայությունը եւ օրենքի դիկտատուրան է: Սա, ըստ նրա, իրենց նախընտրական թեզն է։ Նա հայտարարեց, որ բոլոր նրանք, որոնք կխախտեն օրենքի գիծը՝ օրենքով նախատեսված ուղիներով կգտնեն իրենց տեղը այս կյանքում:

«Առաջիկայում, կարծում եմ՝ ԼՂ բանակցային գործընթացի վերաբերյալ շատ մանրամասն խոսակցություն կունենանք, այդ թվում քննիչ հանձնաժողովում եւ նաեւ մի շարք իրադարձությունների մասին: Եթե այդպես մահապարտների ջոկատներ կազմող էին, իրենք են ընդունել սկզբունքները, որոնցով ԼՂ-ը ճանաչել են Ադրբեջանի մաս: Գնացել են, դրսում ճանաչել են, եկել ու ներսում մահապարտների ջոկատներ են կազմել: Իսկ այդ ջոկատները ձեր նշած մարդու նման նախարարական կաբինետներում նստած զբաղված են եղել բոլորովին այլ խնդիրների լուծմամբ: Ես կառաջարկեի այդ հարցին քաղաքական մեկնաբանություններ շատ չանել, դրահայտարարեց Նիկոլ Փաշինյանը:

Աղբյուր` Փաստինֆո