Փաստ ինֆո

Ի տարբերություն պարոն Մամիջանյանի՝ ինձ համար շատ կարևոր է, թե որ խմբակցությունն ինչպես կքվեարկի, որ պատգամավորն ինչպես կքվեարկի ԱԺ դատին ներկայացված այս կամ այն պաշտոններում տարբեր թեկնածուների քվեարկության ժամանակ։ Դիմելով Մրցակցության պաշտպանության հանձնաժողովի անդամի պաշտոնում ընդդիմադիրների առաջադրած թեկնածու Անահիտ Սարգսյանին՝ հայտարարեց ԱԺ ՔՊ խմբակցության պատգամավոր Արման Եղոյանը։ Ինչպես արդեն տեղեկացրել ենք՝ Ա.Սարգսյանի թեկնածությունը ներկայացրել է «Պատիվ ունեմ» խմբակցության ղեկավար՝ Հայկ Մամիջանյանը՝ հայտարարելով, որ իրեն չի հետաքրքրում, թե ՔՊ խմբակցությունն ինչպես կքվեարկի իրենց թեկնածուի օգտին։

Եղոյանի խոսքով՝ ԱԺ պատգամավորը, ՀՀ Սահմանադրությամբ, ներկայացնում է ամբողջ ժողովրդին, և ոչ միայն այն մարդկանց, որոնք ընտրել են իրենց խմբակցությունը։ Նա շնորհակալություն հայտնեց Սարգսյանին՝ առաջադրումն ընդունելու և ԱԺ-ում գտնվելու համար։

Եղոյանը հիշեց, որ ՀՀ նախկին նախագահ Սերժ Սարգսյանը դեռևս 2014 թվականին Չեխիայում հայ գործարարների հանդիպման ժամանակ, արձագանքելով Հայաստանում մոնոպոլիաներ լինելու հարցին, բարկացած արձագանքել էր՝ հայտարարելով, թե «բա ի՞նչ եք ուզում լինի։ Մի փոքր երկրում հո 10 հոգի շաքար չի՞ ներկրի»։ Նրա գնահատմամբ՝ այս հայտարարությունն, ըստ երևույթին, վերաբերել է նաև մեծ ծավալներով ներկրվող մյուս ապրանքներին։ Այս համատեքստում Եղոյանը Սարգսյանից հետաքրքրվեց՝ արդյո՞ք այդ մոտեցումը ճիշտ է՝ անգամ Հայաստանի նման փոքր երկրի դեպքում։

«Կա՞ ինչ-որ մի թիվ, որ այդքան մարդ պիտի ներկրի շաքար, կամ բենզին, ձեթ։ Եվ արդյո՞ք ճիշտ է, որ մեկ կամ երկու հոգի պետք է ներկրեն։ Չի՞ կարող, օրինակ, եթե ո՛չ 10 ապա գոնե 5 կամ 6 հոգի ներկրել նույն շաքարը կամ բենզինը»,- ասաց նա։
Արձագանքելով հարցին՝ Սարգսյանն ասաց, որ տնտեսագիտության մեջ կա այսպխես կոչված, մասշտաբի էֆեկտ։ Իր խոսքով՝ երբ խոշոր ընկերությունը ներկրում է, բնականաբար, իր ծախսերն ավելի քիչ են։ Այս դեպքում , ըստ Սարգսյանի, ապրանքի ինքնարժեքն ավելի ցածր է, ու այն ավելի ցածր գնով է ներկայացվում այդ ապրանը՝ շուկայում։

«Այո, ՀՀ-ն շատ փոքր է և, եթե , ենթադրենք, 10 խոշոր ընկերություն բերի այդքան մեծ ծավալներով, որպեսզի իր մոտ այդ ինքնարժեքը ցածր լինի և ապրանքը կարողանա էժան վաճառել՝ այդ դեպքում այդ ապրանքը չի վաճառվի։ Բնականաբար, պետք է բերեն մանր ընկերություններ, որոնց համար ինքնարժեքը բարձր կլինի, որովհետև ինչքան քիչ ես բերում, այնքան ինքնարժեքը բարձրանում է, այնքան ապրանքի գինը բարձրանում է»,- ասաց նա։

Սարգսյանի խոսքով՝ Հայաստանի՝ ԵԱՏՄ-ում ներառվելու ժամանակ շուկան բացվել էր ու սկսել էին շաքարավազ ներկրել՝ արդեն Ռուսաստանից՝ ավելի ցածր գներով, քանի այլ երկրներից ներկրելու ժամանակ։ Սարգսյանը հայտնեց, որ իր աշխատելու տարիներին իրենք մանրամասն ուսումնասիրել են այդ ոլորտը, և այդ ընկերությունները չդիմանալով մրցակցությանը՝ դադարեցրին գործունեությունը։

«Դա պայմանավորված էր նրանով, որ մենք ունենք խոշոր շաքարավազի ներկրող և այո՛, նրա մոտ ինքնարժեքը ցածր էր, և գինը համեմատաբար ցածր էր։ Արդյունքում փոքր ընկերոթյունները չդիմացան մրցակցությանը»,- ասաց նա։
Սարգսյանը նաև հայտարարեց, որ երբեմն 1 կամ 10 ներկրողի առկայությունն այնքան էլ չի վկայում Մրցակցության հանձնաժողովի գործունեության արդյունավետության կամ ո՛չ արդյունավետության մասին։ Իր խոսքով՝ այլ ոլորտներում կարող են լինել խնդիրներ և լինի այդպիսի խնդիր, որը դուրս է լիցենզավորման դաշտից։

Աղբյուր` Փաստինֆո