Փաստ ինֆո

Ես երբեք չեմ ասել, որ այս ամենին վերաբերվում եմ ժամանակավրեպ։ Ես ասել եմ, որ ձեր կողմից ու ձեր կառավարության կողմից երկրին, բացի չարիքից, ուրիշ որևէ բան բերելը շատ բարդ է։ ՀՀ ԱԺ նիստի ընթացքում այսպիսի հայտարարություն արեց ԱԺ «Պատիվ ունեմ» խմբակցության ղեկավար Հայկ Մամիջանյանը՝ արձագանքելով ՔՊ պատգամավոր, Տնտեսական հարցերի մշտական հանձնաժողովի նախագահ Բաբկեն Թունյանի հարցին։ Վերջինս հետաքրքրվել է, թե ընդդիմադիր խմբակցությունն ինչ խնդիրներ է լուծելու և ինչ ակնկալիքներ ունի ԱԺ տնտեսական հանձնաժողովում իրենց թեկնածուն ունենալով, եթե նախորդ օրը, իր գնահատմամբ, ելնելով քաղաքական հակամարտության տեսանկյունից, դեմ էին քվեարկել կառավարության ներկայացրած բոլոր նախագծերին։

Ինչ վերաբերում է ՀՀ Մրցակցության պաշտպանության հանձնաժողովի անդամի իրենց թեկնածուին՝ Մամիջանյանը վստահության հայտնեց, որ Անահիտ Սարգսյանը պրոֆեսիոնալ է, և հանձնաժողովում իր ներկայությունն օգուտ է բերելու երկրին։
«Թե դրան ինչպես կքվեարկեք՝ ինձ, ճիշտն ասած, շատ քիչ է հետաքրքրում։ Բայց համենայն դեպս, երկիրը նման պրոֆեսիոնալից կշահի»,- ասաց նա։

Ի պատասխան Մամիջանյանի հայտարարությանը՝ Թունյանը հետաքրքրվեց, թե այդ դեպքում ինչու են առաջադրել թեկնածուին։ Այս համատեքստում, նրա դիտարկմամբ, եթե ընդդիմադիրները համարում են, որ բոլոր պետական ինստիտուտները հակապետական, ո՛չ պրոֆեսիոնալ որակներ ունեն՝ մի հոգով ինչպես են հարց լուծելու։

«Ես ասացի, որ ՔՊ-ն չարիք է բերում։ Ես բացարձակ չորակավորեցի այն պրոֆեսիոնալներին, որոնց հույսով, իմիջայլոց, շարունակվում է պետական ինստիտուտների գործունեությունը։ Խոսքը վերաբերում է պետական ծառայողներին, քաղաքացիական ծառայողներին, որոնց ես երբեք չեմ պիտակավորել ու երբեք չեմ համարձակվի նման բան անել»,- արձագանքեց Մամիջանյանը։
Անդրադառնալով իրենց թեկնածուի օգտին քվեարկելու հարցին՝ «Պատիվ ունեմ» խմբակցության ղեկավարը հայտարարեց, որ այն օրենքները, որոնք իրականացնելու է իշխող ուժը, շատ վատ հետևանքներ են ունենում։ Իր խոսքով՝ նույնիսկ ամենաբարվոք օրենքներն իրականացվում են այնպիսի խայտառակ բացթողումներով, որ ձեռնպահ քվեարկությունն այդպիսի դեպքերում միակ հնարավոր տարբերակն է մնում։

«Որոշ պարագաներում մենք փորձում ենք որևէ մի լավ բան, որ երկիրը շարունակի գոնե գոյատևել՝ մինչև ազատվենք ձեզնից»,- ասաց նա։

Այս պատասխանից հետո ընդդիմադիր թեկնածուի օգտին քվեարկելու հարցին արձագանքեց ԱԺ փոխնախագահ Ռուբեն Ռուբինյանը։ Նա հետաքրքրվեց՝ արդյո՞ք ընդդիմադիր թևին առհասարակ հետաքրքրում է իրենց թեկնածուի ընտրվելու հարցը։ Մամիջանյանը կրկնեց, որ թեկնածուի ընտրությամբ ՀՀ-ն կշահի։

«Իսկ ինչ վերաբերում է ձեր քվեարկության հետաքրքրել- չհետաքրքրելուն, ես մինչև այսօր խոսքի ու գործի շեղում, կարծում եմ, երբեք չեմ առաջացրել։ Եթե ես ասում եմ, որ չեմ ընկալում ձեզ որպես հայրենասեր իշխանություն, ապա դրանից հետևում է, որ ինձ չի հետաքրքրում ձեր քվեարկությունը։ Իրոք ենթադրում էիք, որ ձեզնից մեկի մոտ կգամ ու կխնդրեմ՝ քվեարկել մեր թեկնածուի օգտի՞ն։ Ձեր ակնկալիքը կմնա զուտ ակնկալիք։ Հակառակ դեպքում՝ կտուժի հանձնաժողովը»,- ասաց նա։

Ռուբինյանը կրկնեց իր հարցը՝ նորից հետաքրքրվելով՝ արդյո՞ք ընդդիմությանը հետաքրքրում է քվեարկության արդյունքը։ Մամիջանյանն ասաց, որ իր դանդաղ խոսելը ևս չփրկեց, ստիպված պետք է լինի խոսել անգլերենով՝ հավելելով, որ ինքը կարծում էր, թե եկել է զեկույցի համար եկել է ԱԺ և ոչ թե դպրոցական հանդեսի՝ հայտնելով, որ նկատի ունի դահլիճի աղմուկը։ Ռուբինյանն էլ արձագանքեց՝ ասելով, որ ինքը հարգալից վերաբերմունք է ցուցաբերում նրա նկատմամբ։ Մամիջանյանն ընդհատեց՝ հայտարարելով, որ ինքն է որոշում, թե ինչ ոճով ու ինչ տոնայնությամբ պատասխանել հարցերին։

«Ես հաշվետու եմ ՀՀ քաղաքացիների առաջ, հաստատ ոչ ձեր։ Եթե դուք մեր ընտրողն եք՝ դա հետագայում կարող ենք քննարկել։ Կրկնում եմ, ինձ հետաքրքրում է Անահիտ Սարգսյանի՝ հանձնաժողովի անդամ դառնալը, որովհետև վստահ եմ, որ որպես կոմպետենտ մասնագետ կկարողանա իր փորձը ներդնել իր փորձը՝ իր աշխատանքային գործունեությունը որակյալ իրականացնելու համար։ Բայց թե դուք ոնց եք քվեարկելու՝ ինձ հետաքրքրում է մի քիչ ավելի քիչ, քան փոկերի գլխաքանակը»,- ասաց նա։

Աղբյուր` Փաստինֆո