Փաստ ինֆո

«Ցորի» զորամասի զոհված զինծառայողների ծնողները վերաքննիչ բողոք են ներկայացրել՝ Նիկոլ Փաշինյանի դեմ քրգործ հարուցելու պահանջով բողոքը մերժելու որոշման դեմ։

Ինչպես արդեն տեղեկացրել ենք՝ Հակակոռուպցիոն դատարանը՝ դատավոր Վարդգես Սարգսյանի նախագահությամբ, մերժել է դատախազության անգործության դեմ բողոքը, որով զոհված զինծառայողների ծնողները պահանջում էին պարտավորեցնել վարույթն իրականացնող մարմնին՝ Նիկոլ Փաշինյանի վերաբերյալ ներկայացված հանցագործության մասին հաղորդման հիման վրա առանձին քրեական գործ հարուցելուն։ Դատարանն արձանագրել էր, որ դատախազության կողմից անգործություն չի դրսևորվել, քանի որ դատախազությունը ծնողների ներկայացրած հաղորդումն ուղարկել է ՀՀ հակակոռուպցիոն կոմիտե՝ Մովսես Հակոբյանի հայտարարությունների վերաբերյալ քրեական վարույթին կցելու համար։ Ըստ դատարանի՝ հաղորդում ներկայացրած անձինք, որոնք դատավարությանը մասնակցում են, կարող են միջնորդություններով հանդես գալ։ Իսկ ինչ վերաբերում է ՀՀ քրեական դատավարության նախկին օրենսգրքի 181-րդ հոդվածի կարգի խախտման վերաբերյալ բողոքաբեր կողմի պնդումներին, ապա դատարանը գտել է, թե ՀՀ գլխավոր դատախազության՝ ՀՀ հակակոռուպցիոն կոմիտեում մինչդատական վարույթի օրինականության նկատմամբ հսկողության վարչության ավագ դատախազ Ա.Մուրադյանի կողմից ՀՀ նախկին քրեական դատավարության օրենսգրքի 181-րդ հոդվածի 3-րդ կետի պահանջը՝ բովանդակային առումով չպահպանելը չի կարող հանգեցնել դիմումատուների իրավունքների և օրինական շահերի խախտմանը, քանի որ վերջիններիս կողմից ՀՀ գլխավոր դատախազին հասցեագրված հաղորդումը քննարկման առարկա է դարձել Մովսես Հակոբյանի հայտարարությունների հիման վրա հարուցված քրեական գործի շրջանակներում:

Զոհված զինծառայողների ծնողները, սակայն, համաձայն չեն դատարանի որոշման հետ, պնդում են՝ այն հիմնավորված չէ, ըստ այդմ, ինչպես «Փաստինֆո»-ի հետ զրույցում հայտնեց փաստաբան Լիպարիտ Սիմոնյանը՝ վերաքննիչ բողոք են ներկայացրել՝ պահանջելով բեկանել դատարանի որոշումը։ Բողոքաբեր կողմի դիտարկմամբ՝ Մովսես Հակոբյանի հայտարարությունների հիման վրա հարուցված քրեական գործը բոլորովին այլ փաստական հանգամանքների շուրջ է, մինչդեռ, ծնողների ներկայացրած հաղորդման հանգամանքները վերաբերում են այն հանգամանքին, որ ՀՀ վարչապետ Նիկոլ Փաշինյանը նախապես պատկերացնելով, կանխատեսելով պատերազմի հետևանքները, մարդկային կորուստները, դիտավորությամբ չի կանխել պատերազմը, ավելին իր անգործությամբ՝ համապատասխան միջոնցներ չձեռնարկելով իր պարտականությունները չկատարելով, դրդել է Ադրբեջանի Հանրապետությանը Արցախի Հանրապետության դեմ սանձազերծել լայնածավալ պատերազմական գործողություններ, որի հետևանքով Հայայստանի Հանրապետության և Արցախի Հանրապետության 3800-ից ավելի զինծառայողներ և քաղաքացիական անձինք զոհվել են, անհայտ կորել են 100-ից ավելի անձինք, գերևարվել են 500 ավելի զինծառայողներ և քաղաքացիական անձինք, հրազենային վիրավորումներ ստանալու հետևանքով հաշմանդամ են դարձել 11000-ից ավել զինծառայողներ և քաղաքացիական անձինք, ինչպես նաև տեղի են ունեցել տարածքային կորուստներ: Ըստ այդմ, ՀՀ դատախազությունը պարտավոր էր կայացնելու միայն քրեական գործ հարուցելու մասին որոշում, ինչի կապակցությամբ դրսևորել է անգործություն: Փաստաբանն արձանագրել է, որ դատախազությունը, հանցագործության մասին հաղորդումը կցելով Մովսես Հակոբյանի հայտարարությունների վերաբերյալ քրեական գործի նյութերին՝ թույլ է տրվել ՀՀ քրեական դատավարության օրենսգրքի 25-րդ գլխի խախտում, որի արդյունքում էլ խախտվել է բողոքաբերների իրավունքները, իսկ ՀՀ հակակոռուպցիոն դատարանը բողոքը մերժելու մասին որոշում կայացնելով, թույլ է տվել դատական սխալ, չի կիրառել ներկայացված բողոքում մատնանշված ՀՀ նախկին քրեական դատավարության օրենսգրքով նախատեսված նորմերը, ինչպես նաև, դատարանի որոշումը հակասում է ՀՀ վճռաբեկ դատարանի նախկինում կայացված որոշումներում և ՀՀ Սահամանադրական դատարանի որոշումներում արտահայտած իրավական դիրքորոշումերին։

Բացի այդ, Դատարանը բողոքի քննարկմանը մասնակից չի դարձրել նաև՝ հանցագործության մասին հաղորդում ներկայացրած մյուս անձանց, այսինքն սույն բողոքին առընչվող շահագրգիռ անաձանց, որի հետևանքով, ըստ փաստաբանի, թույլ է տվել քրեադատավարական օրենքի էական խախտումներ։

Հիշեցնենք, որ Ցորի զորամասի՝ 44-օրյա պատերազմում զոհված և անհետ կորած զինծառայողների ծնողները 2022թ ապրիլի 18-ին հանցագործության մասին հաղորդում են ներկայացրել ՀՀ գլխավոր դատախազություն առ այն, որ Նիկոլ Փաշինյանն է սպանել իրենց որդիներին։ Ծնողները հիմք են ընդունել Նիկոլ Փաշինյանի Ազգային ժողովում հնչեցրած հայտարարությունը՝ «Կարող էինք կանխել պատերազմը, որի արդյունքում կունենայինք նույն վիճակը՝ իհարկե, առանց զոհերի» հայտարարությունը։

ՀՀ գլխավոր դատախազությունը ներկայացված հանցագործության մասին հաղորդումն ուղարկել է Հակակոռուպցիոն կոմիտե՝ Մովսես Հակոբյանի հայտարարությունների հիման վրա հարուցված քրեական գործի շրջանակներում քննության առարկա դարձնելու համար, ինչի հետ համաձայն չեն տուժողները։ Նրանք պահանջում են հաղորդումն առանձին քննության առարկա դարձնել և անհապաղ հարուցել քրեական գործ և, ըստ այդմ, դատարան բողոք են ներկայացրել՝ դատախազության անգործության դեմ։ Նրանք դատական կարգով պահանջում են քրեական գործ հարուցել Նիկոլ Փաշինյանի դեմ։

Բողոքն ի սկզբանե մակագրված է եղել Երևանի ընդհանուր իրավասության դատարանի դատավոր Դավիթ Արղամանյանին, որը ավելի քան վեց ամիս չի քննել այն, իսկ օրենսդրական փոփոխություններով պայմանավորված Արղամանյանը և մինչդատական վարույթի նկատմամբ դատական վերահսկողության, այսպես ասած, «կալանքի» դատարանի դատավորներն ուղարկվեցին կադրերի ռեզերվ։ Արդյունքում գործը վերակամագրվեց և քննվեց Հակակոռուպցիոն դատարանի դատավոր Վարդգես Սարգսյանի կողմից, որն էլ մայիսի 31-ին մերժեց այն:

Հեղինակ՝ Իզաբել Սահակյան

Աղբյուր` Փաստինֆո