Փաստ ինֆո

Եթե այս իշխանությունը դեմ գնաց ժողովրդի կամքին, հայկական ազգային և պետական շահին, ապա՝ եկեղեցին առավել ընդգծված է շարունակելու խուլ դիմադրությունը։ «Փաստինֆո»-ի հետ զրույցում ասել է Շիրակի թեմի առաջնորդ Գերշնորհ Տեր Միքայել արքեպիսկոպոս Աջապահյանը։

Արքեպիսկոպոսի դիտարկմամբ՝ տեսականորեն հնարավոր է եկեղեցուն զրկել խոսքի իրավունքից, բայց, արդյոք, ասենք, նմանօրինակ օրինագիծ ընդունվելու դեպքում, որը կարգելի հոգևորականներին արտահայտել իրենց կարծիքը՝ այս կամ այն տեսակի հարցերի շուրջ, արդունավետ կլինի, կամ կտա՞ այն արդյունքը, որին ձգտում են եկեղեցուն խոսքազուրկ անել ցանկացողները։ «Այս մասին է պետք մտածել»,- ասում է Շիրակի թեմի առաջնորդը։

Այն, որ Հայ Առաքելական եկեղեցին ինչպես անցյալում, այնպես նաև հիմա՝ մեր օրերում, հանդես է գալիս ազգային շահերի տեսանկյունից, որ եկեղեցու խոսքը կշիռ ու հեղինակություն ունի, ակնհայտ է։ Հավանաբար, հենց այս հանգամանքով է պայմանավորված երկիրը նոր տոտալ պարտության տանող օրվա իշխանությունների վախերը եւ մտադիր են եկեղեցուն զրկել խոսքի ազատության իրավունքից։

Միքայել արքեպիսկոպոս Աջապահյանը նկատում է՝ իհարկե, այս ամենը խոսում է այն մասին, որ իշխանության ղեկին կանգնածների խոսքն ու գործը, հերթական անգամ, իրար հետ չեն համընկնում.«Այսինքն, այս մարդկանց թվում է, թե այն, ինչ չէր կարելի նախկիններին, կարելի՞ է իրենց։ Երբ եկեղեցին չէր խոսում, ընդդիմադիր Փաշինյանն Ազգային Ժողովի ամբիոններից հոխորտում էր, թե, իբր, եկեղեցին լուռ է, անկախ խոսք չի ասում՝ երկրում տեղի ունեցող այս կամ այն իրողության վերաբերյալ։ Հիմա, երբ եկեղեցին խոսում է, իսկ ստեղծված իրավիճակում չէր էլ կարող չխոսեր, որովհետև այնպիսի իրավիճակ, որում հայտնվել է Հայաստանն ու Արցախը վերջին տարիներին, աննախադեպ է, այս մարդը՝ հիմա էլ եկեղեցուն մեղադրում է խոսելու մե՞ջ և սպառնում օրենքներով փակել՝ երկրի և այդ երկրում ապրող մարդկանց ճակատագրով մտահաոգ հոգևորականների բերանը։ Բա իրենք չէի՞ն ժողովրդավարության հիմնադիրները Հայաստանում, իրենց իշխանությունը չէ՞ր ժողովրդավարության միանձնյա ջատագովը անկախ Հայաստանի ողջ պատմության մեջ, իսկ Փաշինյանը՝ ժողովրդավարության քայլող ինստիտուտ չէ՞ր…»,-կիսահեգնական նկատում է հոգևորականը։

Սրբազանը նշում է՝ եթե իշխանությունները ցանկանում են օրենքի ուժով փակել եկեղեցու բերանը, խնդիր չկա, թող ընդունեն իրենց ցանկացած օրենքը, որը կարգելի հոգևորական դասին՝ բարձրաձայնելու երկրի առջև ծառացած մտահագությսւնների մասին և կտեսնեն, թե ինչ կլինի. «Որովհետև որևէ օրենք չի կարող արգելել հոգևորականին՝ խոսելու երկրում տիրող իրավիճակին մասին, որն սպառնում է պետության և ժողովրդի անվտանգությանը։ Իհարկե, մենք չենք լռելու, եթե խոսելու կարիքը լինի։ Թող դատեն մեզ, հատկապես, եթե, իրենք իսկ շատ լավ գիտեն և ընդունում են, որ թույլ են, տկար ու ողորմելի։ Թող դատեն մեզ, գնանք կնստենք մի քիչ կհանգստանանք՝ Փաշինյանի ղեկավարած պետության հաշվին։ Իսկ եթե իրենց թվում է, թե մենք բանտում վատ ենք ապրելու՝ սխալվում են։ Այսքան տարի պետության հաշվին չենք ապրել, թող մեզ մտահոգ խոսքի համար տանեն դատեն, կգնանք իրենց ղեկավարած պետության հաշվին մի քանի տարի կապրենք».- կեսկատակ նկատում է բարձրաստիճան հոգևորականը։

Օրեր առաջ տեղի ունեցավ Գերագույն հոգևոր խորհրդի ժողովը, որի ընթացքում բարձրաստիճան հոգևոր դասը՝ Վեհափառ Հայրապետի գլխավորությամբ, մեկ անգամ ևս, դատապարտել է Հայաստանի օրվա իշխանությունների վարած քաղաքականությունը՝ հորդորելով հրաժարվել ազգի արժանապատվությունը ոտնահարող գործողություններից, ինչպես նաև՝ արտաքին թշնամիների նվաստացուցիչ հավակնություններին ու պահանջներին հակադրեն իրատեսական և բացառապես հայանպաստ դիրքորոշումներ՝ վճռականորեն պաշտպանելով Արցախի ժողովրդի ինքնորոշման անսակարկելի իրավունքը։ Բանախոսն ասում է՝ թե՛ Մայր Աթոռը, թե՛ Կիլիկո կաթողիոսարանը, բացառապես, միակարծիք են արցախյան հիմնահարցի շուրջ իրենց դիրքորոշումներում, այն է՝ Արցախը չի կարող լինել Ադրբեջանի կազմում.«Իսկ եթե, հանկարծ, պատահեց այնպես, որ այս իշխանությունը դեմ գնաց ժողովրդի կամքին և հայկական ազգային և պետական շահին, ապա եկեղեցին առավել ընդգված կերպով է շարունակելու խուլ դիմադրությունը։ Եթե Արցախի հանձնման պարագայում եկեղեցու խուլ դիմադրությունը վերաճի համաժողովրդական ապստամբության, այստեղ մենք ոչինչ անել չենք կարող»։

Աղբյուր` Փաստինֆո