Փաստ ինֆո

Շրջափակման առաջին իսկ օրերից ապրանքների գները գրեթե անվերահսկելի են դարձել Արցախում․ ով ինչ գին ուզում, դնում է։ «Փաստինֆո»-ի հետ զրույցում այդ մասին ասում է Ստեփանակերտի բնակիչ Արշակ Աբրահամյանը, ով խնդրի մասին մի քանի անգամ բարձրաձայնել է։

«Նեղանում են, որ բարձրաձայնում ես, ասում ես, որ վերահսկողություն չկա, բայց, իրոք, վերահսկողությունը նորմալ չի արվում կամ հնարավոր չի լինում անել։ Համենայնդեպս, եթե անգամ պետական համապատասխան մարմինը սահմանում է գին, ապա մի երկու ժամ է պահպանվում այդ գինը։ Վաճառողն ինչ գին ուզում՝ դնում է ժամեր անց»,-ասում է Արշակը։

Միրգ-բանջարեղենն, առհասարակ, դժվար է գտնվում Արցախում։ Ծիրանի ու բանանի համար մարդիկ ժամերով հերթ են կանգնում․ ում բախտ է վիճակվում մեկ կգ միրգ առնել, «բախտավորություն է»․․․

Մարտունու շրջանի Ճարտար քաղաքի խանութներում, օրինակ, ամսից ավել է՝ միրգ ընդհանրապես չկա։

«Մի անգամ միրգ բերեցին՝ նարինջ, բանան, մանդարին․․․ Էդ էր, դրանից հետո է՛լ միրգ չես գտնի խանութներում։ Ով այգում կեռասի կամ շուտահաս խնձորի ծառ ունի՝ ունի, ով չունի՝ չունի»,-«Փաստինֆո»-ի հետ զրույցում ասում է Ճարտարի բնակիչ տիկին Վերան։

Բանջարեղեն կար, բայց գները դարձյալ շատ բարձր էին։ Կարտոֆիլն, օրինակ, մոտ մեկ ամիս առաջ 2800-3000 դրամ էր, հիմա՝ 400-500 դրամ։ Գնային կտրուկ փոփոխությունը տիկին Վերան կապում է տեղական կարտոֆիլի հասունացման հետ։

«Արդեն կարտոֆիլն էլ, ջերմոցի վարունգը, լոիկն էլ հասել են։ Վարունգ-լոլիկը եթե մեկ շաբաթ առաջ 1000-1200 դրամ էր, հիմա 450-850 դրամ է։ Լոբին էլ էր շատ թանկ, բայց մեր տեղականը հասնելուն զուգընթաց՝ քիչ-քիչ էժանացավ։ Հիմա օրինակ 1000-1200 դրամ է կգ-ը։ Մի քանի օրից իմ այգու լոբին էլ արդեն կքաղեմ»,-ասում է տիկին Վերան ու հավելում՝ մարդիկ բանջարաբոստանային տարբեր մշակաբույսեր են ցանել․ կարտոֆիլի սերմով, տնկիներով Արցախի կառավարությունն օգնել է, մարդիկ էլ աշխատել են ցանել, որ սեփական այգու բերքը ստանան։

«Այն մթերքները, ապրանքները, որոնք կտրոնով են, էժան է։ Շաքարավազը, նպարեղենը, ձեթը, լվացքի փոշին խելամիտ գներով են, համ էլ դրանց մեծ մասն ազատ վաճառքում չկան էլ։ Կտրոնի մեջ միրգ-բանջարեղեն էլ է նշված, բայց չկա։ Ով կարողանում, տարբեր ճանապարհներով բերում է ու ինքն էլ գին սահմանում։ Քաղցրավենիքն, օրինակ, շատ թանկ է․ սովորական կոնֆետի մեկ կգ-ը 4000 դրամից է սկսում»,-նշում է մեր զրուցակիցը։

Թաղավարդի բնակիչ Ռուդիկ Բադասյանն էլ ասում է՝ գյուղում գրեթե բոլորն արդեն բանջարեղեն ունեն․ Կարտոֆիլ բոլորն են ցանել ու արդեն բերքն են հավաքում, լոլիկ-վարունգն էլ ջերմոցում են ցանել։ Բադասյանը վստահեցնում է՝ արցախցին սոված չի մնա, քանի որ աշխատում է, պարապ չի նստում, միայն թե այն ապրանքները, որոնք տեղում չեն արտադրվում կամ դեռ չկան, պետք է վերահսկվի, որ աշխատավարձերին համապատասխան գներով վաճառվեն։

Աղբյուր` Փաստինֆո