Փաստ ինֆո

«Այդ նախագիծը լրիվ անհեթեթություն է։ Պապոյանը երևի ո՛չ փետ է տեսել, ո՛չ ցեմենտ է տեսել, ո՛չ պեմզաբլոկ եւ ոչ էլ բետոն։ Ֆինանսից է խոսում ու չգիտի՝ գործընթացը ոնց է կատարվում»։ «Փաստինֆո»-ի հետ զրույցում ասաց «Գևմիկ» կառուցապատող ընկերության տնօրեն Հրաչ Աթանեսյանը՝ անդրադառնալով ՀՀ ԱԺ ՔՊ պատգամավոր Գևորգ Պապոյանի առաջարկած նախագծին։

Ավելի վաղ «Փաստինֆո»-ն հայտնել էր, որ առաջարկվում է հիփոթեքային պայմանագրերի գումարները կառուցապատողներին տրամադրել ոչ թե սկզբում, այլ վերջում։

Մեր զրուցակիցը հայտնեց, որ գնորդների կողմից գնման իրավունքի ձեռքբերման դեպքում այդ գումարը գալիս ու սառում է կառուցապատողի հատուկ հաշվին։ Այդ գումարը որևէ ձևով չի գործածվում մինչև շենքի կառուցման ավարտը։ Նախագծի ընդունման դեպքում, ըստ Աթանեսյանի, ստացվում է, որ իրենք կառուցապատման փուլում չեն կարող ձևակերպել գնման իրավունք։ Այսինքն, բնակարանի վաճառքը կսկսեն միայն այն դեպքում, երբ շենքի կառուցումն ավարտված լինի։

«Դա ապուշության բարձրագույն աստիճանն է։ Միայն մորուք թողնելով չէ։ Որ չես թրաշվում, հետո էլ փողկապ ես կապում, չի նշանակում, որ գործից հասկանում ես։ Ես առաջարկություն եմ անում. ծրագի՞ր էին ուզում իրականացնել, թող կանչեին, հավաքեին կառուցապատողներին։

Մենք էլ այդ Պապոյանին կբացատրեինք՝ ինչ է նշանակում ավազը, ցեմենտը, բետոնը, շենքը, հետո էլ՝ ձևակերպումը»,- ասաց նա։

Մեր զրուցակցի խոսքով՝ այս նախագիծն առավելապես նպատակ ունի բանկերի համար գումարի նոր աղբյուր ստեղծելու։ Ըստ նրա՝ կառուցապատողին տրամադրվող գումարները, որոնք այժմ սառեցվում են հատուկ հաշիվներում, իրենց ընդամենը 3 տոկոս ավանդ են բերում։

«Բա այդ գումարները որտե՞ղ են սառեցվելու։ Եթե հիմա գումարը ձևակերպել են, վերջում այդ գումարներն ո՞ւր են գնալու։ Պապոյանի՞ գրպանն է լցվում երկու տարով, ո՞ւմ գրպանն է լցվում։ Հիմա Պապոյանին երևի ասել են՝ ընկեր ջան, փողկապավոր տղա ես, մի հատ էնպիսի բան գրիր, որ այդ գումարները մենք տնօրինենք, ոչ թե կառուցապատողը։ Բայց մենք չենք տնօրինում, ընդամենը մի փոքր ավանդ է գալիս դրա վրա։ Իրենց կռիվն ընդամենը 3 տոկոս ավանդի համար է, որը պապոյաններն ուզում են տանել բանկ»,- ասաց նա։

Մեր զրուցակցի խոսքով՝ նոր նախագծով հիփոթեքը ձևակերպվում է, բանկը գումարը տալիս է գնորդին, այդ գումարի դիմաց գանձում է տոկոսներ, իսկ գումարը մնում է բանկի հաշվին։ Այսինքն, ըստ մեր զրուցակցի, ստացվում է, որ բանկն այսպիսով կրկնակի ազատ գումար է ունենում։ Բացի այն, որ այդ գումարի վրա տոկոս է ավելանում, միևնույն ժամանակ, բանկը հնարավորություն է ստանում այդ գումարը շարունակել օգտագործել ու շահույթ ստանալ։

Անդրադառնալով տեղեկությանը, որ կառուցապատողները խնդրի քննարկման համար հանդիպում են պահանջել Փաշինյանի հետ՝ Աթանեսյանն ասաց, որ ինքը չի պատրաստվում գնալ որևէ հանդիպման։ Համոզմունք հայտնեց, որ որևէ հանդիպման դեպքում էլ որևէ փոփոխություն չի ակնկալում։

«Ես անգրագետ որևէ մասսայի հետ որևէ ցանկություն չունեմ հանդիպելու։ Եթե իրենք որոշել են, ապա մեկ է՝ անելու են։ Ցույց տվեք մեկ հանտ գաղափար, որ իրենք նպատակ են ունեցել իրականացնելու, սակայն չեն արել։ Մեկ է, ինչ որոշել են՝ անելու են։ Մեր խոսելով որևէ խնդիր էլ լուծում չի կարող ստանալ։ Այդ խնդիրները լուծվում են այնպես, ինչպես իրենք են ուզում։ Որ մտածեմ՝ մասնակցեմ հանդիպմանը, հնարավոր է իրենք հետ կանգնեն իրենց մտքից, այդ թվում և այդ անգրագետ Պապոյանը, ես անիրատեսական եմ համարում։ Դա Պապոյանը չի արել, իրեն ասել են, որ անի դա»,- ասաց նա։

Աղբյուր` Փաստինֆո