Փաստ ինֆո

«Փաստինֆո»-ն հերթական հարցումն է իրականացրել յութուբյան իր ալիքում՝ պարզելու հայրենակիցների տեսակետը՝ մեր երկրի դաշնակիցների հարցում։ Հարցմանը մասնակցել է յութուբի՝ մոտ 4400 օգտատեր։

Արդյունքները բավականին հետաքրքրական են ստացվել։ Պարզվում է, որ հարցման մասնակիցների մոտ  45 տոկոսը,  ստեղծված բարդ ռազմաքաղաքական իրավիճակում Հայաստանի դաշնակից է համարում Ֆրանսիային։ Այս տեսակետը պատճառները պարզելու համար ուսումնասիրեցինք նաև հարցման ներքո արված մեկնաբանությունները։

Դաշնակցային հարաբերությունների բացատրություն, որպես այդպիսին չկար, սակայն, մեկնաբանություններում այդ երկիրը ներկայացված էր որպես «բարեկամ երկիր»։ Այս ֆոնին, սակայն, մեկնաբանություններից արձանագրեցինք, որ մասնակիցների մի մասը Եվրոպայից գործնական տեսանելի քայլերի սպասելիքներ, այդուհանդերձ, չունի։

Հետաքրքրական է, որ որպես մեր երկրի դաշնակից Ռուսաստանի տարբերակը դիտարկում է հարցվածների միայն 31 տոկոսը։ Հատկապես մեկնաբանություններում մեր հայրենակիցները տեսակետ են հայտնել, որ Հայաստանն իրական որևէ դաշնակից չունի։ Ըստ նրանց՝ կան միայն աշխարհաքաղաքական շահեր, ինչից էլ փորձում են օգտվել մյուս երկրները։

«Ես կարծում եմ Հայաստանը, ոչ մի դաշնակից կամ բարեկամ չունի, բոլորը ներկայանում են բարեկամի քողի տակ, բայց իրականում առաջ են մղում իրենց երկրի շահերը»,- գրում է օգտատերերից մեկը։

Նույն մեկնաբանություններում առավել հաճախ քննարկվող երկրներից է հատկապես Իրանը։ Հարցման շրջանակներում, սակայն, այդ երկրին կողմ է քվեարկել և մեր դաշնակից է համարում հարցվածների միայն 8 տոկոսը։ Հատկանշական է, որ հատկապես անցած տարվա ընթացքում ադրբեջանական ԶՈւ-երի՝ ՀՀ սուվերեն տարածք ներխուժելուց հետո Իրանն այն երկրներից էր, որը «կարմիր գծեր» սահմանեց՝ հայտարարելով, որ թույլ չի տա սահմանային որևէ խախտում՝ Սյունիքում։ Մեր հայրենակիցները, սակայն, ներկա աշխարհաքաղաքական իրավիճակում, Իրանին ակնհայտորեն չեն դիտարկում որպես դաշնակից։

Ավելին, ըստ նրանց՝ ստեղծված իրավիճակում դաշնակցային՝ համեմատաբար ավելի բարձր դիրքում է Միացյալ նահանգները՝ ձայների 9 տոկոսով։

Այդուհանդերձ, մեկնաբանություններում մեծ համընկնում կա՝ մեկ հիմնական գաղափարի շուրջ. մեր հայրենակիցների հիմնական մասի կարծիքով՝ Հայաստանի իրական դաշնակիցը հենց մեր երկիրն ու մեր բանակն են։

«Եվ վերջապես !!! Հայաստանը ունի միայն մեկ հավատարիմ դաշնակից !!! Դա սեփական ԲԱՆԱԿՆ է, որ պետքա արդիականացնել, հարկ եղած ժամանակ շուտ համալրել եվ աչքի լույսի պես պահել ...»,-գրում է մեկ այլ օգտատեր։

Աղբյուր` Փաստինֆո