Փաստ ինֆո

Երևանի ընդհանուր իրավասության դատարանում՝ դատավոր Մանվել Շահվերդյանի նախագահությամբ, ընթանում է Աշոտ Փաշինյանին իբրև առևանգելու վերաբերյալ Ազգուշ Մարտիրոսյանի գործով դատական նիստը՝ դռնփակ ռեժիմով։ Դատարանը որոշել է դռնփակ ռեժիմով քննել գործը, սակայն պաշտպանության կողմը տարակուսած է և անտեղյակ, թե ով է միջնորդություն ներկայացրել՝ գործը դռնփակ ռեժիմով քննելու վերաբերյալ։

«Փաստինֆո»-ի թղթակցի հաղորդմամբ՝ դատական նիստի մեկնարկից առաջ պաշտպան Վարդուհի Էլբակյանը լրագրողների հետ զրույցում հայտնել է, որ կարգադրիչներից է իմացել, որ գործը դռնփակ ռեժիմով է քննվելու։

«Երեք պաշտպան ենք և նման միջնորդություն չենք պատրատել։ Մեզ համար դա նույնպես անակնկալ էր, մենք նման միջնորդությամբ հանդես չենք եկել։ Այսօր հերթական դատական նիստն է, որը նշանակվել էր, ունենք երեք միջնորդություն, այդ թվում՝ ինքնաբացարկի»,- ասաց Էլբակյանը։

Հիշեցնենք, որ մայիսի 17-ին Նիկոլ Փաշինյանի ընտանիքին պատկանող «Հայկական ժամանակ» օրաթերթը գրել էր՝ Աշոտ Փաշինյանին զոհված զինծառայողների ծնողների կողմից իբրև առևանգելու փորձի մասին՝ նշելով, թե իբրև Աշոտ Փաշինյանին նստեցրել են ավտոմեքենան, ապա ՀԺ-ի կողմից հրապարակվել է տեսանյութ, թե ինչպես է Աշոտ Փաշինյանն իրեն դուրս նետվում ավտոմեքենայից։

Հատկանշական է, որ ՀԺ հրապարակմամբ նշվում էր մի քանի ծնողի տվյալներ, նշվում կոնկրետ անուն՝ Գարիկ Գալեյան, սակայն հետագայում պարզվեց՝ ավտոմեքենայի ղեկին եղել է միայն Գայանե Հակոբյանը։ Իսկ «Որդիների կանչ» ՀԿ-ի կողմից տարածված տեսանյութից պարզ էր դառնում, որ Աշոտ Փաշինյանը սեփական կամքով է նստել մեքենան։

Ավելի ուշ արդեն պաշտոնապես հայտնի դարձավ, որ Աշոտ Փաշինյանը հանցագործության մասին հաղորդում է ներկայացրել, ինչի հիման վրա ՀՀ ՔԿ Երևան քաղաքի քննչական վարչության ծանր հանցագործությունների քննության բաժնում նախաձեռնվել է քրեական վարույթ՝ ՀՀ քրեական օրենսգրքի 191-րդ հոդվածի 2-րդ մասի 1-ին կետի հատկանիշներով։ Քրեական վարույթի շրջանակներում ձերբակալվել է Գայանե Մարտիրոսյանը։ Նրան մեղադրանք է ներկայացվել։ Ազգուշ Մարտիրոսյանի նկատմամբ դատավոր Ժորա Չիչոյանի որոշմամբ՝ որպես խափանման միջոց է ընտրվել կալանավորումը։

Նշենք, որ գործով նախաքննությունը բավականին կարճ է տևել։ Գործն այժմ գտնվում է Երևանի ընդհանուր իրավասության դատարանի դատավոր Մանվել Շահվերդյանի վարույթում։

Հեղինակ՝ Իզաբել Սահակյան

Աղբյուր` Փաստինֆո