Փաստ ինֆո

«Ժողովրդի օգուտն, այս պահի դրությամբ, այն կլիներ, որ, գոնե, կորցրած ցանքատարածքների ցորենի բերքի փոխհատուցմը պատշաճ կատարվեր։ Ոչ մի բան էլ դեռ չեն տվել։ Սպասում ենք, տեսնենք՝ ի՞նչ կլինի»,- «Փաստինֆո» լրատվականի հետ զրույցում ասում է Սյունիքի մարզի Տեղ խոշորացված համայնքի ավագանու անդամ Մասիս Զեյնալյանը ։

Հիշեցնենք՝ մարտի վերջին ադրբեջանական զինուժի հերթական սադրանքից հետո Տեղի բնակիչները անակնկալի էին եկել պարզելով, որ իրենց ցորենի դաշտերն անցել են ադրբեջանական կողմի վերահսկողության տակ, որտեղ էլ՝ ադրբեջանցիները խրամատներ էին փորել ու դիրքավորվել։

Տեղի բնակիչների պահանջն ու ակնկալիքը մեկն է՝ հետ վերադրաձնեն իրենցից խլված և իրենց պատկանող հողերը, որպեսզի կարողանան ցանք անեն, արարեն, ապրեն, ասում է համայնքապետն ու հավելում՝ մարզպետարանից խոստացել են, որ լուծելու են բերքի փոխհատուցման հարցը, ներքին կարգով ինչ – որ քայլեր ձեռնարկվել են. «Գյուղացիների ցանած գարին, արդեն, հասել է, սակայն, մնացել թշնամու վերահսկողության տակ։ Հիմա արդեն պետք է հնձեինք։ Ցորենի հունձքն էլ՝ մի քանի օրից կլիներ, բայց, հենա, տեսնում եք՝ չստացվեց…Ուզում ենք հավատանք, որ մարզպետն ամեն ինչ անում է՝ խնդիրը լուծելու համար։ Ես ինքս ներկա եմ գտնվել վերջին հանդիպումներից մեկին, անձամբ խոսել եմ մարզպետի հետ, ով հավաստիացրեց, որ միջոցներ ձեռնարկվում են՝ գոնե ցորենի փոխհատուցման վնասը՝ մի սեզոնի կտրվածքով, կարգավորելու համար։ Թե ի՞նչ դուրս կգա վերջում՝ կտեսնենք։ Հույսով սպասում ենք», - ասում է Մայիս Զենյալյանը, ով, ըստ լրատվամիջոցի ունեցած տեղեկությունների, Ադրբեջանի ապրիլյան ռազմական սադրանքից հետո, նույնպես, կորցրած՝ մոտ 2 հա հողատարածք ունի ։

Խոսելով Տեղ գյուղի տարածքից ադրբեջանական Զինուժի կողմից օկուպացված հողերի հետ վերադարձի թեմայով, համայնքապետն ասում է՝ ոչինչ ասել չի կարող, տեղյակ չէ, թե ի՞նչ է նախատսվում անել կամ ի՞նչ պայմանավորվածություններ կան. «Գիտե՞ք ստեղ խնդիրը ո՞րն է՝ էն, որ հայելային հետքաշման մասին են խոսում։ Իբր, դա ի՞նչ է նշանակում՝ չենք հասկանում։ Թուրքերն իրենց զավթած հողի վրա պաշտպանական մեխանիզմներ են կառուցել, հենակետեր են դրել, որոնցից ամեն մեկի վրա միլիարդների գումար է ծախսվել։ Հիմա էդ հայելային հետքաշում ասողները ո՞նց են պատկերացնում՝ իրենք էդ իրենց կահավորված, ընտիր սարքած հենակետերը թողնելու են ու հե՞տ քաշվեն…Պարզ չէ՞, որ սրանք մեզ նորից խաբելու են, հերթական խաբեությունն է։ Թուրքերը կտեսնեն զորք չկա, իրենց դրոշներն առած, նորից առաջ կգան, թե ինչքա՞ն՝ Աստված գիտի»,- ասում է բանախոսը։

Ամփոփելով զրույցը՝ Սյունիքի մարզի Տեղ խոշորացված համայնքի ավագանու անդամ Մասիս Զեյնալյանը նշում է՝ ապրիլյան խոշոր ռազմական սադրանքից հետո թշնամին, այլևս, կրակ չի բացել բնակավայրի ուղղությամբ, բնակիչներն էլ, ինչ – որ չափով հանգիստ են, գոնե այնքանով, որ կրակոցներ չկան։ Հուսահատ և թևաթափ չեն, ապրում են իրենց հողում, գիտեն, որ պաշտպանում են Հայրենիքից՝ իրենց բաժին հասած կտորը, սակայն, հույս ունեն, որ ապրիլից ադրբեջանական վերահսկողության տակ անցած ցանքատարածքների կորցրած բերքի դիմաց փոխհատուցման հարցը չի ուշանա և, գոնե, հացի խնդրի առաջ չեն կանգնի։

Աղբյուր` Փաստինֆո