Փաստ ինֆո

ՀՀ երկրորդ նախագահ Ռոբերտ Քոչարյանին առնչվող քրեական գործով հսկողություն իրականացնող դատախազական խմբից որևէ դատախազ այժմ դատազական համակարգում չի մնացել, իսկ շուրջ չորս տարի ձգված դատավարության արդյունքում գործով վաղեմության ժամկետներն արդեն ավարտվել են։

Հիշեցնենք, որ ՀՀ երկրորդ նախագահ Ռոբերտ Քոչարյանի, ՀՀ նախկին փոխվարչապետ Արմեն Գրիգորյանի և ՀՀ ԶՈՒ ԳՇ նախկին պետ, այդ ժամանակ ՀԱՊԿ գործող քարտուղար Յուրի Խարատուրովի, ՀՀ ՊՆ նախկին նախարար Սեյրան Օհանյանի նկատմամբ հետապնդում է իրականացվել՝ 2018թ հեղափոխությունից հետո։ Քրեական գործը դատարանում է 2019թ. ապրիլի 29-ից՝ դատավոր Աննա Դանիբեկյանի վարույթում։ Ի սկզբանե՝ նախկին պաշտոնյաներին մեղադրում էին 2008թ. մարտի 1-*ի իրադարձությունների ժամանակ սահմանադրական կարգը տապալելու, իսկ Ռ. Քոչարյանին և Արմեն Գրիգորյանին՝ նաև առանձնապես խոշոր չափի կաշառք ստանալու մեջ։ 2021թ. մարտի 26-ին ՍԴ-ն ՀՀ քրեական օրենսգրքի 300.1-րդ հոդվածը ճանաչել է Սահմանադրության 78-րդ և 79-րդ հոդվածներին հակասող և անվավեր՝ բավարարելով ՀՀ երկրորդ նախագահ Ռոբերտ Քոչարյանի և Երևանի ընդհանուր իրավասության դատարանի դատավոր Դավիթ Գրիգորյանի դիմումները։ ՍԴ որոշումից հետո ՀՀ երկրորդ նախագահ Ռոբերտ Քոչարյանի, պաշտպանության նախկին նախարար Սեյրան Օհանյանի, նախկին փոխվարչապետ Արմեն Գեւորգյանի, ԶՈՒ ԳՇ պետ Յուրի Խաչատուրովի նկատմամբ ՀՀ քրեական օրենսգրքի 300.1-րդ հոդվածով քրեական հետապնդումը դադարեցվել է հանցադեպի բացակայության հիմքով:

Այժմ դատարանի վարույթում է Սիլվա Համբարձումյանից ենթադրյալ կաշառք ստանալու և փողերի լվացման դրվագը։ Մասնավորապես, ըստ մեղադրանքի՝ Ռոբերտ Քոչարյանը Սիլվա Համբաձումյանի ընկերությանը տրամադրված ընդերքն օգտակար հանածոների շահագործման նպատակով ուսումնասիրության հատուկ լիցենզիաներով ընկերության 100 տոկոս բաժնեմասը ՀՀ-ում ոչ ռեզիդենտ ընկերությանը վաճառելու գործարքին չխոչընդոտելու համար, 2008 թվականի փետրվարին և մայիսին Սամվել Մայրապետյանի օժանդակությամբ նրանից ստացել է առանձնապես խոշոր չափերով՝ 927․000․000 ՀՀ դրամին համարժեք 3․000․000 ԱՄՆ դոլար կաշառք։ Արմեն Գևորգյանը վերոնշյալ գործարքի շրջանակներում Սամվել Մայրապետյանի օժանդակությամբ Սիլվա Համբարձումյանից ստացել է առանձնապես խոշոր չափերով՝ 309․000․000 ՀՀ դրամին համարժեք 1․000․000 ԱՄՆ դոլար կաշառք և օրինականացրել է ստացված եկամուտները:

Հենց այս դրվագով էլ, ինչպես պարզվում է, անցել են արդեն վաղեմության ժամկետները, սակայն, մինչ վարույթն իրականացնող մարմինը՝ դատավոր Աննա Դանիբեկյանը, կառաջարկեր վաղեմության հիմքով քրեական հետապնդում դադարեցնելու և գործը կարճելու հարցը, Աննա Վարդապետյանի՝ գլխավոր դատախազի պաշտոնում նշանակումից հետո ներքին հակասությունների ֆոնին պաշտոնից ազատվել են ՀՀ գլխավոր դատախազի տեղակալ Գևորգ Բաղդասարյանը, Կոտայքի մարզի արդեն նախկին դատախազ Պետրոս Պետրոսյանը, որոնք սույն գործով մեղադրանքը պաշտպանող դատախազներն են եղել։

Ի դեպ, գործը հսկող դատախազական խմբի անդամներից փաստացի ոչ ոք այս պահին դատախազության համակարգում չէ։ Դատախազ Կարեն Բիշարյանն արդեն տևական ժամանակ է, ինչ տեղափոխվել է դատական համակարգ և Վճռաբեկ դատարանի դատավոր է, դատախազ Վահագն Մուրադյանն ազատված է պաշտոնից, նախկին գլխավոր դատախազ Արթուր Դավթյանը, որը նույնպես ներգրավված էր գործով, այժմ դատախազությունում ծառայություն չի իրականացնում։ Փաստացի, գործով պետք է ներգրավվի բոլորովին նոր դատախազ, որը ժամանակ կուզի նյութերին ծանոթանալու համար, հետեւապես գործով քննությունը դեռ երկար կձգձգվի, եթե իհարկե երկրորդ նախագահը առարկի վաղեմության ժամկետներն անցած լինելու հիմքով գործի կարճմանը, ինչը դժվար սպասելի է։

Հեղինակ՝ Իզաբել Սահակյան

Աղբյուր` Փաստինֆո