Փաստ ինֆո

Ռուսաստանին պատժամիջոցներից խուսափելու հարցում Հայաստանի օգնելու մասին ԱՄՆ պետդեպարտամենտի հայտարարությունը Հարավային Կովկասի համար աշխարհաքաղաքական մրցակցություն ստեղծելու նպատակ ունի։ «Փաստինֆո»-ի հետ զրույցում այս մասին ասաց քաղաքագետ Ստեփան Դանիելյանը։

Այս համատեքստում, սակայն, ԱՄՆ-ն կարծես աչք է փակում Ադրբեջանի կողմից տարվող ագրեսիվ արտաքին քաղաքականության վրա։ Քաղաքագետի խոսքով՝ Արևմուտքը ցանկանում է Ռուսաստանին կտրել Իրանից, որպեսզի նրանց միջև բացառվի ցամաքային որևէ ճանապարհ։ Խոսքն, այս դեպքում, վերաբերում է երկաթուղային ճանապարհին։

Այդ համատեքստում, ըստ «Փաստինֆո»-ի զրուցակցի, ԱՄՆ-ն նպատակ ունի Ադրբեջանին ևս հանել Ռուսաստանի ազդեցությունից։ Իսկ Ռուսաստանը հակառակը, ամեն կերպ ցանկանում է Ադրբեջանին պահել իր վերահսկողության ներքո։

«Պայքարը գնում է Ադրբեջանի համար։ Եթե բանակցությունը գնում է Արևմուտքում, ապա դրա հիմնական կետերն ուղղված են Ռուսաստանին։ Եթե այդ բանակցություններն ընթանում են Ռուսաստանում, ապա նույն գործընթացն իրականացվում է Արևմուտքի դեմ։ Եվ այդ հայտարարությունները կախված են նաև իրավիճակից»,- ասաց նա։

Փորձագետի կարծիքով, Ռուսաստանին աջակցելու մասին հայտարարությունից հետո, այդուհանդերձ, Հայաստանի նկատմամբ որևէ պատժամիջոց չի կիրառվի։ Դա լինելու դեպքում, ըստ նրա, Հայաստանն այլ տարբերակ չի ունենա, քան ամբողջությամբ անցնել ՌԴ ազդեցության ու վերահսկողության ներքո։

«Այդ հայտարարություններն, ավելի շուտ, սպառնալիքներ են, և ոչ թե գործողություններ։ Եթե նման գործողություն լինի, ապա Արևմուտքը կկորցնի Հայաստանը»,- ասաց նա։

Աղբյուր` Փաստինֆո