Փաստ ինֆո

«Կիևում Ռուբեն Հախվերդյանի մասնակցությամբ տեղի ունեցած բարեգործական համերգը շատ լավ անցավ։ Համերգի ընթացքում պատկառելի գումար հավաքվեց, որը ծառայելու է պատերազմի  ընթացքում Ուկրաինայի Զինված Ուժերի վիրավոր զինծառայողների բուժման նպատակով»,- «Փաստինֆո»-ի  հետ զրույցում ասել է Հայաստանի Եվրոպական կուսակցություն ղեկավար Տիգրան Խզմալյանը, ով  վերջերս Ուկրաինայի մայրաքաղաք Կիև կատարած այցի ընթացքում, հարցազրույց է տվել տեղի՝ լիբերալ գաղափարախոսությամբ հայտնի լրատվամիջոցներից մեկին, խոսելով ինչպես բարեգործական համերգի, այնպես նաև՝  աշխարհաքաղաքական և ռազմական զարգացումների  թեմայով։

Վերոհիշյալ հարցազրույցում հնչած թեզերից մի քանիսի վերաբերյալ «Փաստինֆո» լրատվականը փորձել է ստանալ Տիգրան Խզմալյանի մեկնաբանությունները.

-Պարոն Խզմալյան, ի՞նչ նպատակով էր ձեր՝ Ուկրաինա կատարած այցը։

-Նախ, այցի ընթացքում նախատեսված էր բարեգործական համերգ՝ Ռուբեն Հախվերդյանի մասնակցությամբ, հետո այնտեղ ես հանդիպումներ ունեցա Ուկրաինայի և Մոլդովայի խորհդարանների անդամների հետ, կիսվեցի Հայաստանի Եվրոպական կուսակցության մոտեցումներով, քննարկեցինք Եվրոմիության ինտեգրման հեռանկարները։

- «Європейська правда» հեռուստաընկերության եթերում, խոսելով ռուս – ուկրաինական հակամարտության ընկալման թեմաների մասին, մասնավորապես, նշեցինք, թե Հայաստանում մարդիկ աղոթում են, որպեսզի այդ հակամարտությունն ավարտվի Ուկրաինայի հաղթանակով, որովհետև գիտակցում են՝ այդ հաղթանակը վճռորոշ է լինելու նաև ՀՀ -ի համար։ Հետաքրքիր կլիներ իմանալ՝ ի՞նչ ստատիստիկ տվյալների վրա հիմնվելով էիք անում այդ հայտարարությունը, որովհետև Ձեր խոսքից տպավորություն էր, թե մի ողջ ազգ աղոթում է այդ հաղթանակի համար։

-Ստատիստիկ տվյալներ, որպես այդպիսին, ես չունեմ։ Հիմնվել եմ Հայաստանի ազգային շահերի՝ իմ պատկերացումների վրա, ինչպես նաև՝ իմ բազմաթիվ ծանոթների, ընկերների, կուսակիցների հայտնած կարծիքների  և քննարկումների վրա, որոնք ձգվում են, արդեն, մեկ տարուց ավել, այնքան, որքան տևում է այդ պատերազմը։

- Դուք պատմեցիք նաև, որ ամիսը մեկ անգամ, արտախորհրդարանական ուժերի ձևաչափով, հանդիպումներ եք ունենում ՀՀ վարչապետի հետ և մեկ ամբողջ օր, միասին անցկացնելով, քննարկում եք ներքաղաքական և արտաքին քաղաքականությանն առնչվող հարցեր։ Կկիսվե՞ք մեզ հետ՝ ի՞նչ խնդիրներ են վերհանվում այդ հանդիպումների ընթացքում, եթե դրանք հանրայնացման ենթակա թեմաներ են։

-Վեջին հանդիպումը՝ Ուկրաինա կատարած այցով պայմանավորված, ես բաց եմ թողել։ Ինչ վերաբերում է բարձրացվող խնդիրներին՝ կա ներքին  պայմանավորվածություն՝ չբարձրաձայնել այդ մասին։ Ընդհանուր առմամբ, պետք է ասեմ՝ լինելով արտախորհրդարանական ընդդիմադիր ուժի ղեկավար, իմ կողմից բարձրացվում են աշխարհաքաղաքական խնդիրներին, երկրի արտաքին ու ներքին հացերին առնչվող խնդրահարույց հարցեր, դրանք քննարկվում են, տրվում են դրանց լուծման բանալիները։ Որպես սեփական առաջնահերթություն, վարչապետի հետ քննարկում եմ Հայաստանի՝ Եվրոինտեգրման գաղափարը, որը խիստ կարևոր լուծվելիք  հարց է՝ մոտ առաջիկայում։  

- Ձեր կողմից  հնչեցվեցին ընդգծված հակառուսական դիրքորոշումներ, օրինակ, այն, որ ՀՀ-ն տասնամյակներ շարունակ գտնվում է ՌԴ-ի քայքայիչ լծի ներքո կամ ասել, թե ՀՀ-ն և ՌԴ-ն դաշնակիցներ են, այդքան ծիծաղելի չէր հնչի, եթե չլիներ այդքան ողբերգական։ ՀՀ վարչապետի հետ հանդիպումների ձեր հաճախականությունն ու տևականությունը հաշվի առնելով, կարելի՞ է ենթադրել, որ այս հարցերը նրա հետ ևս քննարկվում են և արդյո՞ք նա, նույնպես, համակարծիք է ձեր այս դիրքորոշումների հետ։

- Ես ՀՀ վարչապետի խոսնակը չեմ, այդ հարցերը նրան ուղղեք, միգուցե՝ պատասխանի։ Ինչ վերաբերում է ձեր կողմից որակավորված հակառուսական եզրույթին, ուզում եմ այստեղ մի ճշտում մտցնել՝ լինել պուտինյան ռեժիմի ընդդիմադիր, դեռևս չի նշանակում՝ լինել հակառուսական գաղափարների կրող։  Սրանք, բացարձակապես, տարբեր բաներ են։ Ինչ վերաբերում է իմ ընդգծված ընդդիմադիր կեցվածքին՝ պուտինյան ռեժիմի նկատմամբ, դուք, երևի, ծանոթ պետք է լինեք Հաագայի միջազգային դատարանի որոշմանը, համաձայն որի՝ Պուտինը միջազգային դատարանի կողմից ճանաչվել է որպես ռազմական հանցագործ։ Սա իմ սեփական կարծիքը կամ դիրքորոշումը չէ։

- Այդ հարցազրույցում դուք հանդես եկաք հայտարարությամբ, ասելով, որ ՀՀ-ն, այս պահի դրությամբ, իր առջև դրված առաջնահերթություններ ունի՝ Արցախից դուրս բերելու ռուս խաղաղապահ առաքելություն իրականացնող զորամիավորմանը, ինչպես նաև՝ Գյումրու 102-րդ ռազմաբազան։ Այսօրինակ զարգացումների պարագայում՝ ի՞նչ այլընտրանք եք առաջարկում դուք։

 - Երբ  ասեցի, որ ռուս խաղաղպահները պետք է դուրս բերվեն Արցախից, չասեցի, թե այնտեղ, անվտանգային հարցերով պայմանավորված, որևէ այլընտրանք չեմ տեսնում։ Դա կարող են լինել միջազգային խաղաղապահ առաքելութուն իրականացնող ուժերը, որովհետև այն, ինչ անում է այնտեղ ռուսական զորամիավորումը, այլ բան չէ, քան սադրանք և, հենց, իրենք են փակ պահում Արցախի հետ ՀՀ սահմանը։ Ինչ վերաբերում է ՀՀ-ում ռուսական ռազմաբազայի առկայությանը, ընդհուպ մինչև՝ Զվարթնոց օդանավակայանում իրենց ներկայությունն ապահովող ռուսական ФСБ-ի զորքերին, այս ամենին մեկ անուն կարելի է տալ՝ աշխարհում ոչ մի երկիր նման խայտառակություն չունի, ինչպիսին սա է, երբ քո երկրի սահմանները վերահսկում է երրորդ պետության զորքը։

-Պարոն Խզմալյան, եթե դուք ջատագով եք ՀՀ-ից ռուսական ներկայության հեռացմանը, ապա պե՞տք է լինի որևէ այլընտրանք, որը, գոնե, կկատարի այն նույն գործառույթները, որն իրականացնում է այդ զորքն, արդեն, տարիներ շարունակ այստեղ՝ ՀՀ-ում։

-Մեր առաջարկը հետևյալն է՝ ՀՀ-ն պետք է դառնա Եվրոմիության և ՆԱՏՕ-ի անդամ։ Դրա անդամակցության հայտը վաղուց պետք է տրվեր։ Այդ առաջարկը մեզ արդեն արվել է։ Հույս ունեմ, մինչև տարեվերջ՝ հարցը լուծված կլինի։

-Չկա՞ մտավախություն, որ հայտնվելով ՆԱՏՕ-ի կազմում, մենք կարող ենք, մեխանիկորեն, հայտնվել այդ կառույցին անդամագրված՝ թվով առաջին կամ երկրորդ հզորությամբ բանակն ունեցող՝ Թուրքիայի անմիջական ռազմական թիրախում։  

-Ձեր ունեցած տեղեկությունները, թե Թուրքիան ՆԱՏՕ-ի առաջին կամ երկրորդ հզորությամբ բանակ ունեցող պետությունն է՝ հնացել են։ Թե՛ ԱՄՆ-ն, թե՛ Եվրոպան, Թուրքիային չեն դիտում, որպես իրենց դաշնակից անդամ։ Բացի այդ, ինտեգրվելով ՆԱՏՕ-ին, կարծում եմ, տեղի կունենա ճիշտ հակառակը։ Սա կարող է մեզ համար անվտանգային մեծ երաշխիք ապահովել՝ ապավինել ՆԱՏՕ-ի իրական առաջնորդների՝ ԱՄՆ-ի՝ Թուրքիայի նկատմամբ  դրսևորած զսպողական քաղաքականությանը։ Սա այնքան տրամաբանական է, որ չեմ կարողանում հասկանալ ձեր երկմտանքների իրական պատճառները։  

Հ.Գ.Փորձում էինք կապ հաստատել երգիչ - երգահան Ռուբեն  Հախվերդյանի հետ՝ պարզելու, ինչ զգացում էր ունենում բարեգործական  համերգ տալով այն երկրի զինվորների համար, որի տրամադրած  հատուկ զենքը  Ադրբեջանը կիրառում էր 44 օրյա պատերազմի ժամանակ արցախահայության դեմ, սակայն զանգերին, ցավոք, չպատասխանեց։

Աղբյուր` Փաստինֆո